நெல்லை , ஏப்ரல் 21 : திருநெல்வேலி சட்டமன்றத் தொகுதியில் தேர்தல் களம் அதன் இறுதிக்கட்டத்தை எட்டியுள்ள நிலையில் தமிழக வெற்றி கழகத்தின் வேட்பாளர் ஆர்.எஸ். முருகன் இன்று நடத்திய இறுதிப் பரப்புரை ஆளுங்கட்சி மற்றும் எதிர்க்கட்சியினரைத் திரும்பிப் பார்க்க வைக்கும் வகையில் பிரம்மாண்ட மக்கள் திரளுடன் அரங்கேறியுள்ளது. நெல்லை டவுண் கண்ணன் சாலையில் தொடங்கிய இந்த பேரணி ஒட்டுமொத்த ரத வீதிகளையும் ஸ்தம்பிக்கச் செய்து ஒரு மாபெரும் கலாச்சாரத் திருவிழாவைப் போல காட்சியளித்தது.
வழக்கமான அரசியல் ஊர்வலங்கள் மற்றும் மேடைப் பேச்சுகளைத் தாண்டி இந்தப் பரப்புரை நெல்லையப்பர் கோயில் தேரோட்டத் திருவிழாவை நினைவூட்டும் வகையில் திட்டமிடப்பட்டிருந்தது. கேரளா செண்டை மேளம் அதிர ஒட்டுமொத்த ரத வீதிகளும் விழாக்கோலம் பூண்டன. கிரேன் மூலம் வேட்பாளருக்குப் பிரம்மாண்ட மாலை அணிவிக்கப்பட்டதைத் தொடர்ந்து பொய்க்கால் குதிரை, கட்டைக்கால் ஆட்டம், கரகாட்டம், மயிலாட்டம் மற்றும் சிலம்பாட்டம் போன்ற தமிழகத்தின் பாரம்பரிய கலை நிகழ்ச்சிகள் வரிசையாக அணிவகுத்தன. வண்ணக் காகிதங்கள் காற்றில் தூவப்பட வானவேடிக்கை முழக்கங்களுடன் ஒட்டுமொத்த பகுதியும் அரசியல் உற்சாகத்தில் மூழ்கியது.
தமிழக தேர்தலில் ‘தலைமுறை மாற்றம்’ : கூட்டணி கணக்கை உடைக்கும் விஜய் அரசியல் கணக்கு
கட்சியின் கொடி வண்ண பலூன்களால் அலங்கரிக்கப்பட்ட வாகனங்கள் அணிவகுக்க ரத வீதிகளின் இருபுறமும் ஆயிரக்கணக்கான பொதுமக்கள் திரண்டு வேட்பாளருக்கு வரவேற்பு அளித்தனர். இந்த இறுதிப் பேரணியில் உள்ளூர் மக்கள் மட்டுமன்றி சுற்றியுள்ள கிராமப்புறப் பகுதிகளிலிருந்தும் இளைஞர்கள், பெண்கள், முதியவர்கள் எனப் பெருமளவிலான மக்கள் கலந்து கொண்டனர். தவெக தொண்டர்களின் விசில் சத்தமும் இசை முழக்கங்களும் நெல்லை நகரை அதிர வைத்தன. இந்த பிரம்மாண்ட மக்கள் கூட்டம் தற்போதைய தேர்தல் களத்தில் இத்தொகுதியில் நிலவும் கடுமையான போட்டியை வெளிப்படுத்துவதாக அரசியல் விமர்சகர்கள் கருதுகின்றனர். சமூக ஊடகங்களிலும் நெல்லை தவெக பேரணி தொடர்பான காணொளிகள் மற்றும் புகைப்படங்கள் தற்பொழுது வேகமாகப் பரவி வருகின்றன.
பேரணியின் ஊடே திரண்டிருந்த பொதுமக்க மத்தியில் பேசிய வேட்பாளர் ஆர்.எஸ். முருகன் தொகுதி மேம்பாட்டிற்கான அதிரடி வாக்குறுதிகளை முன்வைத்தார். தான் இத்தொகுதியில் வெற்றி பெற்றால் திருநெல்வேலி மண்ணில் வாழ்ந்த அனைத்து சமூகத் தலைவர்களுக்கும் தனது சொந்தச் செலவிலேயே வெண்கலச் சிலைகள் அமைத்துத் தரப்படும் என்று உறுதியளித்தார். மேலும் ஏழை எளிய மக்களின் சுபநிகழ்ச்சிகளுக்காகத் தொகுதி முழுவதும் இலவச திருமண மண்டபங்கள் கட்டித் தரப்படும் என்றும் அவர் குறிப்பிட்டார். இதோடு தவெக தலைவர் விஜய் அறிவித்துள்ள மக்கள் நலத்திட்டங்கள் அனைத்தும் நெல்லை தொகுதியில் முழுமையாகச் செயல்படுத்தப்படும் என்றும் அவர் தனது உரையில் சுட்டிக்காட்டினார். இத்தகைய வாக்குறுதிகள் அடித்தட்டு மக்கள் மற்றும் நடுத்தர வர்க்கத்தினரிடையே பெரும் கவனத்தைப் பெற்றுள்ளன.
பாரம்பரியமாகவே நெல்லை சட்டமன்றத் தொகுதி என்பது முன்னணி அரசியல் கட்சிகளுக்கு இடையே கடும் சவால்கள் நிறைந்த ஒரு களமாகவே இருந்து வந்துள்ளது. இந்தச் சூழலில் 2026 சட்டமன்றத் தேர்தலில் புதிய அரசியல் சக்தியாக உருவெடுத்துள்ள தமிழக வெற்றி கழகத்தின் இந்த அதிரடிப் பிரவேசம் உள்ளூர் அரசியலில் புதிய திருப்பங்களை ஏற்படுத்தியுள்ளது. குறிப்பாக இளைஞர்களையும் பெண்களையும் ஈர்க்கும் நோக்கில் கலை நிகழ்ச்சிகளுடன் ஒருங்கிணைக்கப்பட்ட இந்த இறுதிப் பரப்புரை வாக்காளர்களுடன் ஒரு நெருக்கமான உணர்ச்சிப்பூர்வமான இணைப்பை ஏற்படுத்தியுள்ளதாகக் கள நிலவரங்கள் தெரிவிக்கின்றன.
தமிழக சட்டமன்றத் தேர்தலுக்கான வாக்குப்பதிவு நெருங்கி வரும் வேளையில் அனைத்துக் கட்சிகளும் தங்களின் இறுதிப் பரப்புரையை அதிதீவிரமாக மேற்கொண்டு வருகின்றன. இந்நிலையில் நெல்லை தொகுதியில் தவெக வேட்பாளர் ஆர்.எஸ். முருகன் திரட்டியுள்ள இந்த பிரம்மாண்ட மக்கள் திரளும் அவர் அளித்துள்ள வாக்குறுதிகளும் இறுதி நேரத்தில் வாக்காளர்களின் முடிவில் முக்கியத் தாக்கத்தை ஏற்படுத்தக்கூடும் என எதிர்பார்க்கப்படுகிறது. இந்தத் திருவிழா போன்ற இறுதிப் பிரச்சாரம் வாக்குப்பதிவில் எந்த மாதிரியான எதிரொலியை ஏற்படுத்தப் போகிறது என்பது தேர்தல் முடிவுகளின் போதே தெரியவரும்.
