மும்பை , ஜூன் 16 : ஒரு காலத்தில் உயர்தட்டு மக்களின் அடையாளமாகப் பார்க்கப்பட்ட கிரெடிட் கார்டுகள், இன்று நடுத்தர வர்க்கத்தினரின் அத்தியாவசியத் தேவைகளில் ஒன்றாக மாறிவிட்டன.அதேவேளையில், முறையான திட்டமிடல் இல்லாத காரணத்தால் பலரும் இதில் கடன்பாக்கியைச் செலுத்தி, கூடுதல் வட்டிப் பொறியில் சிக்கித் தவித்து வருகின்றனர்.ஆனால், சலுகைகளைச் சரியாகப் பயன்படுத்தினால் கிரெடிட் கார்டுகள் மூலமே கணிசமான தொகையைச் சேமிக்க முடியும் என்பதை நிரூபித்துக் காட்டியுள்ளார் மகாராஷ்டிராவைச் சேர்ந்த எழுத்தாளர் பிரணம் சக்கதேவ்.தன்னிடம் உள்ள 21 கிரெடிட் கார்டுகளைக் கொண்டு, அவர் ஆண்டுக்கு 50,000 ரூபாய் வரை சேமித்து வருவது நிதி மேலாண்மை குறித்த புதிய பார்வையை ஏற்படுத்தியுள்ளது.
தன்னுடைய இந்த வித்தியாசமான சேமிப்பு உத்தி மற்றும் அதன் பின்னணியில் உள்ள ரகசியங்கள் குறித்து பிரணம் சக்கதேவ் விரிவாகப் பகிர்ந்துள்ளார்.ஒவ்வொரு மாதத்தின் தொடக்கத்திலும், அன்றைய மாதத்திற்கான அத்தியாவசியச் செலவுகள் குறித்துத் தனது மனைவியுடன் விரிவாக ஆலோசித்து, அதற்கேற்ப பட்ஜெட்டைத் திட்டமிடுவதாக அவர் குறிப்பிடுகிறார்.சந்தையில் உள்ள பல்வேறு வங்கிகளின் கிரெடிட் கார்டுகளும் வெவ்வேறு விதமான சலுகைகளை அள்ளித் தருகின்றன.அதனைத் துல்லியமாகக் கணக்கிட்டு, எந்தெந்தச் செலவுகளுக்கு எந்தெந்த கார்டுகளைப் பயன்படுத்த வேண்டும் என்பதில் அவர் தெளிவான வழிமுறையைப் பின்பற்றி வருகிறார்.
அதன்படி, மளிகைப் பொருட்கள் வாங்குவதற்கு ஒரு கார்டு, ஆன்லைன் ஷாப்பிங் செய்வதற்கு ஒரு கார்டு, வாகனங்களுக்கு எரிபொருள் நிரப்புவதற்குத் தனி கார்டு மற்றும் மின்சாரம், தண்ணீர் போன்ற பயன்பாட்டுக் கட்டணங்களைச் செலுத்துவதற்கு மற்றொரு கார்டு எனப் பிரித்துச் செலவு செய்வதை அவர் வழக்கமாகக் கொண்டுள்ளார்.இப்படி ஒவ்வொரு தேவைக்கும் அதற்குரிய பிரத்யேக கார்டுகளைப் பயன்படுத்துவதன் மூலம், அதிகப்படியான கேஷ்பேக் சலுகைகளையும், ரிவார்டு புள்ளிகளையும் பெற முடிகிறது.பின்னர் இந்த ரிவார்டு புள்ளிகளைத் தனக்குத் தேவையான வேறு பொருட்களை வாங்குவதற்கு அவர் திறம்படப் பயன்படுத்திக் கொள்கிறார்.
இது தவிர செல்போன், லேப்டாப் போன்ற விலையுயர்ந்த மின்னணுப் பொருட்களை வாங்கத் திட்டமிடும்போது, பண்டிகைக் காலச் சலுகைகள் அல்லது ஆன்லைன் வர்த்தகத் தளங்களின் சிறப்பு விற்பனைக் காலங்களை அவர் தேர்ந்தெடுக்கிறார்.அந்த சமயங்களில் குறிப்பிட்ட சில வங்கிகளின் கார்டுகளுக்கு 10 சதவீதம் வரை உடனடி தள்ளுபடிகள் வழங்கப்படுவது வழக்கம்.தன்னிடம் 21 கார்டுகள் இருப்பதால், எந்த வங்கி சலுகை அளித்தாலும், அதற்குரிய கார்டைப் பயன்படுத்தித் தள்ளுபடி விலையிலேயே அந்தப் பொருட்களை வாங்கிவிடுவதாக சக்கதேவ் விவரிக்கிறார்.
இந்தச் சேமிப்பு முறையின் மிக முக்கியமான அடிப்படையாக அவர் குறிப்பிடுவது ஒழுங்கமைக்கப்பட்ட நிதி மேலாண்மை மட்டுமே.தனது வங்கித் கணக்கில் எவ்வளவு பணம் இருக்கிறதோ, அந்த எல்லைக்குள்ளாக மட்டுமே கிரெடிட் கார்டில் செலவு செய்வதை விதியாக வைத்துள்ளார்.மேலும், ஒவ்வொரு மாதமும் பில் வந்தவுடன் அதற்கான முழுத் தொகையையும் எவ்வித நிலுவையும் இன்றி உடனடியாகச் செலுத்தி விடுகிறார்.இதன் காரணமாக, அவர் பயன்படுத்தும் எந்தவொரு கார்டுக்கும் கூடுதல் வட்டித் தொகை விதிக்கப்படுவதில்லை.இத்தகைய முறையான பயன்பாட்டின் மூலமாகவே, தேவையற்ற வட்டிச் சுமையைத் தவிர்த்து ஆண்டுக்கு 50,000 ரூபாய் வரை தம்மால் மிச்சப்படுத்த முடிகிறது என்று அவர் உறுதியுடன் தெரிவிக்கிறார்.
அதே நேரத்தில், இத்தகைய வழிமுறைகளைப் பின்பற்றுவதற்குத் தீவிரமான சுயக்கட்டுப்பாடும் நிதி ஒழுக்கமும் மிக அவசியம் என்று பொருளாதார நிபுணர்கள் எச்சரிக்கின்றனர்.வருமானத்திற்கும் செலவுக்கும் இடையிலான சமநிலையைத் துல்லியமாகக் கண்காணிக்கத் தவறினால், பல கார்டுகளைப் பராமரிப்பது மீள முடியாத கடன் சுழலில் கொண்டு போய் விட்டுவிடும் என்றும் அவர்கள் சுட்டிக்காட்டுகின்றனர்.திறம்படக் கையாண்டால் கிரெடிட் கார்டு ஒரு சிறந்த நிதி ஆயுதம் என்பதை சக்கதேவின் இந்த நடைமுறை உதாரணம் தெளிவுபடுத்துகிறது.
