பக்தி தொகுப்பு , ஜூன் 8: மனித வாழ்வில் எதிர்கொள்ளும் சவால்கள், தடைகள் மற்றும் அச்சங்களை நீக்கி, மனவலிமையையும் வெற்றியையும் தரும் முதன்மை தெய்வமாக அன்னை துர்க்கா தேவி விளங்குகிறாள். மும்மூர்த்திகள் மற்றும் தேவர்களின் ஒட்டுமொத்த சக்தியின் வடிவமாகத் திகழும் துர்க்கை அம்மனை வழிபடுவதற்கான வரலாற்றுப் பின்னணி கிழமை வாரியான பலன்கள், வழிபாட்டு முறைகள் மற்றும் நெய்வேத்தியங்கள் குறித்த ஆன்மிக வழிகாட்டல்களை ஆன்மிகச் சொற்பொழிவாளர் தேசமங்கற்கரசி விவரித்துள்ளார்.
இது குறித்து அவர் பகிர்ந்துள்ள விரிவான செய்தித் தொகுப்பு பின்வருமாறு:
துர்க்கை அம்மன் தோற்றப் பின்னணி
ஆண்களால் தனக்கு அழிவு நேரிடக் கூடாது என்ற வரத்தைப் பெற்ற மகிஷாசுரன், பெண்கள் பலமற்றவர்கள் என்ற ஆணவத்தில் தேவர்களுக்கும் முனிவர்களுக்கும் பல்வேறு இன்னல்களைக் கொடுத்து வந்தான். ஆண் சக்திகளால் அவனை வெல்ல முடியாத சூழலில் சிவபெருமானின் ஆலோசனையின்படி மும்மூர்த்திகளின் சக்திகளும், தேவியரின் (பார்வதி, லட்சுமி, சரஸ்வதி) ஆற்றல்களும் ஒன்றிணைந்து ‘துர்க்கை’ என்னும் மகா சக்தியாக உருவெடுத்தன.
மகிஷாசுரன் அவளது அழகில் மயங்கி தன்னைத் திருமணம் செய்து கொள்ளக் கோரியபோது ‘போரில் என்னை வெல்பவரையே மணப்பேன்’ என அன்னை நிபந்தனை விதித்தாள். தொடர்ந்து நடைபெற்ற போரில், நவராத்திரி உள்ளிட்ட பல்வேறு தினங்களில் பல அசுரர்களை வதம் செய்த தேவி இறுதியாக மகிஷனை வதம் செய்து ‘மகிஷாசுரா மர்த்தினி’யாகக் காட்சி அளித்து பூலோகத்தைக் காத்தாள்.
கிழமை வாரியான வழிபாட்டுப் பலன்கள்
துர்க்கை அம்மனை வாரத்தின் ஏழு நாட்களும் வழிபடலாம் என்றாலும் குறிப்பிட்ட கிழமைகளில் வழிபடுவது பிரத்யேகப் பலன்களைத் தரும் என பெரியோர்கள் வகுத்துள்ளனர்:
- திங்கட்கிழமை: கல்வி ஞானம் பெருகும். மூட்டு சம்பந்தமான உடல் உபாதைகள் நீங்கும்.
- செவ்வாய்க்கிழமை: ராகு தோஷங்கள், திருமணத் தடைகள் நீங்கும். வறுமை ஒழிந்து கடன்கள் தீரும்.
- புதன்கிழமை: உத்தியோகத்தில் பதவி உயர்வு (புரமோஷன்) கிடைக்கும். ரத்தம் சம்பந்தப்பட்ட நோய்கள் குணமாகும்.
- வியாழக்கிழமை: நலிந்த வியாபாரத்தில் லாபம் பெருகும். இதயம் சம்பந்தமான நோய்களிலிருந்து நிவிருத்தி கிடைக்கும்.
- வெள்ளிக்கிழமை: குடும்ப ஒற்றுமை, ஆயுள் பலம் மற்றும் செல்வம் பெருகும். பரம்பரைத் தோஷங்கள் மற்றும் முன்னோர்களின் சாபங்கள் நீங்கும்.
- சனிக்கிழமை: புதிய வேலைவாய்ப்புகள் அமையும். அரசியல் மற்றும் தலைமைப் பதவிகளில் வெற்றி கிட்டும். சிறுநீரகம் சார்ந்த நோய்கள் குணமாகும்.
- ஞாயிற்றுக்கிழமை: பிரிந்த குடும்பங்கள் ஒன்று சேரும். வெளிநாட்டுப் பயணங்களுக்கான விசா மற்றும் கிரீன் கார்டு தடைகள் அகலும். ஒட்டுமொத்த நோய் நொடிகள் தீருவதுடன், எதிரிகளின் தொல்லைகள் ஒழியும்.
இவை தவிர பௌர்ணமி மற்றும் வளர்பிறை அஷ்டமி ஆகிய தினங்களில் துர்க்கையை வழிபடுவது மிக உயர்ந்த தனிப்பட்ட வேண்டுதல்களையும் நிறைவேற்றக் கூடிய சிறப்பம்சமாகும்.
வழிபாட்டு நேரமும் முறைகளும்
துர்க்கை வழிபாட்டிற்கு உகந்த மிக முக்கிய நேரம் ‘ராகு காலம்’ ஆகும். பொதுவாக ராகு காலம் சுப காரியங்களுக்குத் தவிர்க்கப்பட்டாலும் துர்க்கை வழிபாட்டிற்கு இதுவே மிகச் சிறந்த பலனைத் தரக்கூடியது.
- கோவில் வழிபாடு: கோவில்களில் உள்ள விஷ்ணு துர்க்கை அல்லது சிவ துர்க்கை சந்நிதியில் இரண்டு நெய் விளக்குகள் ஏற்றி வழிபட வேண்டும்.
- வீட்டு வழிபாடு: ராகு காலத்தில் கோவிலுக்குச் செல்ல இயலாதவர்கள் வீட்டிலேயே ஒரு மரப்பலகையில் (மனை) சிகப்புத் துணியை விரித்து அதன் மேல் அம்பாளின் படத்தை வைக்க வேண்டும். அன்னைக்கு அரளி, செம்பருத்தி அல்லது செந்தாமரை போன்ற சிகப்பு நிற மலர்களைச் சாற்றி வழிபடலாம். சிகப்பு மலர்கள் கிடைக்காத பட்சத்தில் மல்லிகைப் பூவையும் பயன்படுத்தலாம். மேலும் துளசி மற்றும் வில்வ இலைகளாலும் அர்ச்சனை செய்யலாம்.
வேண்டுதல் மற்றும் நெய்வேத்தியம்
முக்கியமான வேண்டுதல்கள் நிறைவேறியவுடன், அன்னைக்கு விரலி மஞ்சள் அல்லது குண்டு மஞ்சளை மஞ்சள் நூலில் மாலையாகக் கட்டிச் சாற்றுவதாகப் பிரார்த்தனை செய்து கொள்ளலாம். அன்னைக்கு நெய்வேத்தியமாக சர்க்கரைப் பொங்கல், பானகம், எலுமிச்சை சாதம் அல்லது புளி சாதம் ஆகியவற்றை எளிமையான முறையில் தயாரித்து படைக்கலாம்.
முக்கியத் தலங்கள் மற்றும் மன அமைதி
தமிழ்நாட்டில் கும்பகோணம் அருகில் உள்ள பட்டீஸ்வரம் தேனுபுரீஸ்வரர் கோவிலில் எழுந்தருளியுள்ள துர்க்கை அம்மன், மகிஷனின் தலைமேல் கால் வைத்து அத்தியானந்த கோலத்தில் காட்சி தரும் மிக பிரசித்தி பெற்ற தலமாகும். அதேபோல் ஆந்திர மாநிலம் விஜயவாடாவில் உள்ள கனக துர்க்கை அம்மன் கோவிலும் உலகப் புகழ்பெற்றது.
காரணமே தெரியாமல் மனதில் பயம், பதற்றம் அல்லது நடுக்கம் ஏற்படும் தருணங்களில் அருகில் உள்ள சிவன் கோவிலில் உள்ள துர்க்கை அம்மன் சந்நிதியில் ஒரு விளக்கேற்றி, இரண்டு நிமிடங்கள் அவளது திருமுகத்தைப் பார்த்துக் கொண்டு நின்றாலே மனக்குழப்பங்கள் நீங்கி, பேரமைதியும் தைரியமும் பிறக்கும் என்பது பலரது அனுபவப்பூர்வமான உண்மையாகும்.
