வாஷிங்டன் ,ஏப்ரல் 4 : அமெரிக்காவின் மிக முக்கிய அரசியல் அதிகார மையமான வாஷிங்டன் DC .யின் மேயர் பதவிக்கான தேர்தல் போட்டியில் ,தமிழ்நாட்டை பூர்வீகமாகக் கொண்ட ரினி சம்பத் அதிகாரப்பூர்வமாக களம் இறங்கியுள்ளார். உலகளாவிய அளவில் வாழும் தமிழர்கள் மத்தியில் பெரும் கவனத்தைப் பெற்றுள்ள இந்த நகர்வு ,அமெரிக்க அரசியலில் தெற்காசிய வம்சாவளியினரின் பங்களிப்பில் ஒரு புதிய மைல்கல்லாகப் பார்க்கப்படுகிறது.
also : தமிழ்நாடு தேர்தல் 2026: 27 காங்கிரஸ் வேட்பாளர் பட்டியல் வெளியீடு.மேலூர் தொகுதி இன்னும் நிலுவை
தமிழ்நாட்டின் தேனி மாவட்டத்தில் பிறந்த ரினி சம்பத் ,தனது ஏழு வயதில் பெற்றோருடன் அமெரிக்காவிற்கு இடம்பெயர்ந்தார். தற்போது 31 வயதாகும் இவர் ,கடந்த பத்து ஆண்டுகளுக்கும் மேலாக வாஷிங்டன் டி.சி. பகுதியில் வசித்து வருகிறார். அரசு ஒப்பந்தப் பணிகள் மற்றும் பல்வேறு பொதுச் சேவைத் திட்டங்களில் தீவிரமாகப் பங்காற்றிய அனுபவம் கொண்டவராக இவர் அறியப்படுகிறார்.
வாஷிங்டன் டி.சி.யின் தேர்தல் விதிமுறைகளின்படி ,மேயர் தேர்தலில் போட்டியிடுவதற்கான தகுதியைப் பெற 4,500-க்கும் மேற்பட்ட உள்ளூர் வாக்காளர்களின் கையெழுத்துகளைச் சேகரிக்க வேண்டும் என்பது கட்டாயமாகும். இந்த கடுமையான இலக்கை வெற்றிகரமாக எட்டி ,தேர்தல் வாக்குச்சீட்டில் (Ballot) தனது பெயரைப் பதிவு செய்த முதல் தெற்காசிய வேட்பாளர் என்ற வரலாற்றுச் சாதனையை ரினி சம்பத் படைத்துள்ளார். இவரின் இந்த அதிகாரப்பூர்வ வரவு ,அங்கு வாழும் இந்திய மற்றும் தெற்காசிய சமூகத்தினர் மத்தியில் புதிய அரசியல் எழுச்சியையும் உற்சாகத்தையும் ஏற்படுத்தியுள்ளது.
தனது தேர்தல் பிரசாரம் குறித்து கருத்து தெரிவித்துள்ள ரினி சம்பத் ,“அமெரிக்கக் கனவு என்பது இங்கு வாழும் அடித்தட்டு மக்கள் உட்பட அனைவருக்கும் சாத்தியப்பட வேண்டும்” என்ற உன்னத நோக்கத்துடன் தான் களமிறங்கியுள்ளதாகக் குறிப்பிட்டுள்ளார். மேலும் ,நகராட்சி நிர்வாகச் சேவைகளை முழுமையாக மேம்படுத்துவது ,நாளுக்கு நாள் அதிகரித்து வரும் வாழ்வாதாரச் செலவினங்களைக் கட்டுப்படுத்துவது ,சாலை உள்கட்டமைப்புகள் மற்றும் அடிப்படை வசதிகளைச் சீரமைப்பது ஆகியவற்றைத் தனது முதன்மைத் தேர்தல் வாக்குறுதிகளாக அவர் முன்வைத்துள்ளார்.
தற்போதைய அரசியல் சூழல் குறித்துப் பேசிய அவர் ,தற்போதைய ஆட்சிப் பொறுப்பில் உள்ள பாரம்பரிய அரசியல் தலைவர்கள் மக்களின் மிக அடிப்படைத் தேவைகளைப் பூர்த்தி செய்வதில் கூட தோல்வியடைந்துவிட்டதாகக் கடுமையாக விமர்சித்துள்ளார். எந்தவொரு அரசியல் பின்னணியும் இல்லாத ,சாதாரண எளிய பின்புலத்தைக் கொண்ட ஒரு ‘அவுட்சைடர்’ (Outsider) வேட்பாளராகத் தன்னை முன்னிறுத்தும் ரினி சம்பத் ,தற்போதைய கட்டமைப்புக்கு மாற்றாக ஒரு புதிய நிர்வாக முறையைக் கொண்டு வரப் போவதாக உறுதியளித்துள்ளார்.
