சென்னை , ஏப்ரல் 21: தமிழகச் சட்டமன்றத் தேர்தல் வாக்கெடுப்பு நெருங்கி வரும் சூழலில், தமிழக வெற்றிக் கழகத்தின் தலைவர் விஜய் வாக்காளர்களுக்கு எழுதியுள்ள விரிவான கடிதம் மாநில அரசியல் வட்டாரத்தில் புதிய விவாதப் புள்ளியை உருவாக்கியுள்ளது. தனது கட்சியின் தேர்தல் சின்னமான ‘விசில்’ என்பதை வெறும் வாக்குச் சின்னமாக மட்டும் சுருக்கிவிடாமல், அதனை ஊழல் மற்றும் பழைமையான அரசியல் நடைமுறைகளுக்கு எதிரான ‘விசில் புரட்சி’ என்ற புதிய அரசியல் கருத்தியலாக அவர் இக்கடிதத்தில் முன்வைத்துள்ளார்.
தேர்தல் நாளுக்கு மிகக் குறுகிய காலமே உள்ள நிலையில் வெளியாகியுள்ள இந்த அறிக்கை, தமிழகத்தின் பாரம்பரிய இருமுனைப் போட்டியைத் தாண்டி புதியதொரு தாக்கத்தை ஏற்படுத்தும் நோக்கில் வடிவமைக்கப்பட்டுள்ளது. இக்கடிதத்தில் தமிழக மக்களை ‘என் சொந்தங்கள்’ என்று விளித்துள்ள விஜய், தான் திரைத்துறையில் சம்பாதித்த புகழையும் செல்வாக்கையும் தாண்டி அரசியலுக்கு வந்ததன் பின்னணியில் இருப்பது மக்கள் தமக்குத் தந்த அன்பிற்கான நன்றிக்கடன் மட்டுமே என்பதை உணர்வுபூர்வமாகப் பதிவு செய்துள்ளார்.
Also : ஹார்மூஸ் நீரிணையில் 14 இந்திய கப்பல்கள் சிக்கின: மீட்புப் பணியில் இந்தியா
ஜெரிமாண்டரிங் என்ற ‘அரசியல் விளையாட்டு’ – இந்தியாவில் Delimitation ஏன் பெரிய சர்ச்சையாக மாறுகிறது?
அதே நேரத்தில், தற்போதைய அரசியல் சூழலில் ஆளும்கட்சியான திமுக மற்றும் மத்தியில் ஆளும் பாஜக ஆகிய இரு பெரும் சக்திகளையும் இக்கடிதத்தில் அவர் நேரடியாகவே சாடியுள்ளார். மக்கள் விரோத சக்திகள் என்றும், பிளவுவாத அரசியல் நடத்துவோர் என்றும் இரு தரப்பையும் ஒரே நேர்க்கோட்டில் வைத்து அவர் விமர்சித்திருப்பது, தமிழகத்தின் தற்போதைய தேர்தல் களத்தை இருவேறு துருவங்களாக மாற்றும் முயற்சியாகவே அரசியல் விமர்சகர்களால் பார்க்கப்படுகிறது.
முக்கியமாக, இந்தத் தேர்தலில் இளைஞர்கள் மற்றும் முதல்முறை வாக்காளர்களைக் கவரும் வகையில் ‘விசில் புரட்சி’ என்ற சொல்லாக்கம் அவரது பிரசார நெடுகிலும் முதன்மைப்படுத்தப்பட்டு வருகிறது. எந்தவிதமான அதிகார அமைப்புகளின் அழுத்தங்களுக்கும், பண பலத்திற்கும் அல்லது முதலீட்டு நெருக்கடிகளுக்கும் தான் ஒருபோதும் வளைந்து கொடுக்கப் போவதில்லை என்று விஜய் இதில் உறுதிபடத் தெரிவித்துள்ளார். தமிழகத் தேர்தல் களத்தில் நீண்டகாலமாகப் பேசப்பட்டு வரும் பண விநியோகம் மற்றும் அதிகார துஷ்பிரயோகம் குறித்த குற்றச்சாட்டுகளுக்குப் பதிலடி கொடுக்கும் வகையில் இந்த நிலைப்பாடு அமைந்துள்ளது.
இக்கடிதத்தின் மற்றொரு முக்கிய அம்சமாகப் பெண்கள் மற்றும் இளைஞர்களின் பங்களிப்பு தனியாகக் குறிப்பிடப்பட்டுள்ளது. தமிழக வெற்றிக் கழகத்தின் தேர்தல் அறிக்கையிலும் இவர்களுக்கான பிரத்யேக நலத்திட்டங்கள் முன்னிறுத்தப்பட்டுள்ள நிலையில், நடுத்தரக் குடும்பங்களின் வாக்கு வங்கியைக் குறிவைத்தே இந்த வியூகம் வகுக்கப்பட்டுள்ளது. அண்மையில், வாக்குக்கு பணம் வாங்கும் பண்பாட்டிற்கு எதிராக இளைஞர்கள் மத்தியில் விஜய் உறுதிமொழி எடுக்கச் சொன்ன நிகழ்வும் இத்தருணத்தில் நினைவுகூரத்தக்கது.
கடிதத்தின் இறுதிப் பகுதியில், ஒட்டுமொத்தக் குடும்பமாக வந்து அனைவரும் ஜனநாயகக் கடமையாற்ற வேண்டும் என்று அழைப்பு விடுத்துள்ள தவிச தலைவர், தேர்தல் களத்தில் எவ்வளவு பெரிய பணமழை பெய்தாலும், வாக்காளர்கள் தங்களின் எதிர்காலத்தைக் கருத்தில்கொண்டு விசில் சின்னத்திற்கே வாக்களிக்க வேண்டும் என நேரடியாகக் கேட்டுக்கொண்டுள்ளார்.
இந்த விவகாரம் தற்போது சமூக வலைதளங்களில் ஆதரவாளர்களிடையே பெரும் வரவேற்பைப் பெற்று வரும் வேளையில், இது வெறும் உணர்ச்சிவயப்பட்ட பிரசாரம் மட்டுமே என்று எதிர்க்கட்சிகள் விமர்சிக்கத் தொடங்கியுள்ளன. உலகெங்கிலும் வாழும் தமிழர்களின் கவனம் இந்தத் தேர்தலின் மீது குவிந்துள்ள நிலையில், விஜய்யின் இந்த நேரடிப் பிரவேசமும் ‘விசில் புரட்சி’ அழைப்பும் வெறும் சினிமா செல்வாக்காக முடிந்துவிடுமா அல்லது மக்கள் அரசியலாக உருவெடுக்குமா என்பதைத் தேர்தல் முடிவுகளே தீர்மானிக்கும்.
