டெல்லி , ஏப்ரல் 27 : டெல்லி ஆம் ஆத்மி கட்சியில் நீண்ட நாட்களாக புகைந்து கொண்டிருந்த உள்கட்சி பூசல் தற்போது பகிரங்கமாக வெடித்துள்ளது. அக்கட்சியின் முக்கிய முகமும் மூத்த தலைவருமான ராகவ் சதா உள்ளிட்ட 7 ராஜ்யசபா எம்பிக்கள் ஒட்டுமொத்தமாக ஆம் ஆத்மி கட்சியிலிருந்து விலகி பாரதிய ஜனதா கட்சியில் இணைந்துள்ளனர். தேசிய அரசியலில் பெரும் அதிர்வலைகளை ஏற்படுத்தியுள்ள இந்த அதிரடி மாற்றம் அரவிந்த் கெஜ்ரிவால் தலைமையிலான ஆம் ஆத்மி கட்சிக்கு நாடாளுமன்ற மேலவையில் மிகப்பெரிய பின்னடைவாக பார்க்கப்படுகிறது.
கட்சியில் இருந்து விலகியது குறித்து ராகவ் சதா வெளியிட்டுள்ள வீடியோ பதிவில் ஆம் ஆத்மி கட்சியின் தற்போதைய செயல்பாடுகள் குறித்து கடுமையான விமர்சனங்களை முன்வைத்துள்ளார். கட்சிக்குள் தற்போது நிலவும் பணிச்சூழல் முற்றிலும் நச்சுத்தன்மை வாய்ந்ததாக மாறிவிட்டதாக சாடியுள்ள அவர் நாடாளுமன்றத்தில் மக்கள் நலன் குறித்து பேசுவதற்குக் கூட தங்களுக்கு கடுமையான கட்டுப்பாடுகள் விதிக்கப்பட்டதாகக் குறிப்பிட்டுள்ளார். உள்கட்சி ஜனநாயகம் முற்றிலும் நசுக்கப்பட்டு விட்டதாகவும் தலைமைக்கும் அடிமட்ட உறுப்பினர்களுக்கும் இடையேயான இடைவெளி அதிகரித்துவிட்டதாகவும் குற்றம் சாட்டியுள்ளார். சுயமரியாதையும் பேசும் உரிமையும் இல்லாத ஒரு சூழலில் தொடர்ந்து அரசியல் செய்ய முடியாது என்பதால் இந்த முடிவை எடுத்ததாக அவர் விளக்கியுள்ளார்.
ஆம் ஆத்மி கட்சி தொடங்கப்பட்ட காலத்திலிருந்தே அதன் வளர்ச்சிப் பாதையில் ராகவ் சதாவின் பங்களிப்பு மிக முக்கியமானது. தனது இளமைக் காலத்தின் 15 ஆண்டுகளை இந்த இயக்கத்திற்காக அர்ப்பணித்ததாகக் குறிப்பிட்டுள்ள அவர் தான் வாழ்வாதாரத்திற்காக அரசியலுக்கு வரவில்லை என்றும் மக்கள் சேவை என்ற உன்னத நோக்கத்திற்காகவே கெஜ்ரிவாலுடன் கைகோர்த்ததாகவும் உருக்கமுடன் தெரிவித்துள்ளார். ஆனால் தற்போதைய ஆம் ஆத்மி கட்சி அதன் ஆரம்பகால தூய்மையான கொள்கைகளில் இருந்து முற்றிலும் விலகி தடம் மாறிவிட்டதாக அவர் வேதனை தெரிவித்துள்ளார்.
கட்சியை விட்டு வெளியேறுவதற்கு முன்னதாக தனது எதிர்காலம் குறித்து மூன்று முக்கிய வழிகளைப் பரிசீலித்ததாக ராகவ் சதா விவரித்துள்ளார். அரசியலை விட்டே முற்றிலும் ஒதுங்குவது அல்லது கட்சிக்குள் இருந்துகொண்டே போராட்டங்களை நடத்தி சீர்திருத்தம் செய்வது அல்லது மாற்றுப் பாதையைத் தேர்ந்தெடுத்து மக்கள் பணியைத் தொடர்வது ஆகிய மூன்று விருப்பங்களில் தற்போதைய சூழலில் மூன்றாவது பாதையே சிறந்தது என முடிவெடுத்து பாரதிய ஜனதா கட்சியில் இணைந்ததாக அவர் தெளிவுபடுத்தியுள்ளார்.
இந்த விவகாரத்தில் அரசியல் நோக்கர்களை உற்றுநோக்க வைத்திருப்பது ஒரே நேரத்தில் 7 எம்பிக்கள் வெளியேறியுள்ள நிகழ்வுதான். இதுகுறித்து எழுப்பப்பட்ட கேள்விக்கு பதிலளித்த ராகவ் சதா ஒருவரோ அல்லது இருவரோ அவசரப்பட்டு தவறான முடிவை எடுக்கலாம் ஆனால் மக்கள் பிரதிநிதிகளாக இருக்கும் ஏழு பேர் ஒரே நேரத்தில் ஒரு தவறான முடிவை எடுக்க வாய்ப்பில்லை என்று சுட்டிக்காட்டியுள்ளார்
