வாஷிங்டன் , ஏப்ரல் 26 : அமெரிக்க அரசியல் வரலாற்றை மீண்டும் உலுக்கியுள்ள ஒரு சம்பவமாக, முன்னாள் அதிபர் டொனால்ட் ட்ரம்ப் பங்கேற்ற உயர்மட்ட நிகழ்ச்சி ஒன்றில் துப்பாக்கிச் சூடு நடத்தப்பட்டுள்ளது உலக அரங்கில் பெரும் அதிர்ச்சியை ஏற்படுத்தியுள்ளது. வாஷிங்டன் டிசியில் நடைபெற்ற பத்திரிகையாளர்கள் சந்திப்பு விருந்து நிகழ்ச்சியின் (White House Correspondents’ Dinner) போது இந்தத் தாக்குதல் அரங்கேறியுள்ளது. இது ஒரு சாதாரண பாதுகாப்பு குறைபாடு அல்ல என்றும், டொனால்ட் ட்ரம்ப்பை நேரடியாகக் குறிவைத்து நடத்தப்பட்ட அசாசினேஷன் அட்டம்ப்ட் (Assassination Attempt) எனப்படும் திட்டமிட்ட கொலை முயற்சி என்றும் அமெரிக்கப் புலனாய்வு அதிகாரிகள் சந்தேகிக்கின்றனர்.
Also : தூத்துக்குடியில் 12,000 ஆண்டு பழமையான கடல் புதைபடிவங்கள் கண்டுபிடிப்பு!
தாக்குதலில் ஈடுபட்டதாக கலிபோர்னியாவைச் சேர்ந்த 31 வயதான கோல் டோமஸ் ஆலன் (Cole Tomas Allen) என்ற வாலிபர் சம்பவ இடத்திலேயே கைது செய்யப்பட்டுள்ளார். அதிபர் மற்றும் முக்கியப் பிரமுகர்களுக்கான தீவிர பாதுகாப்புச் சோதனைப் பகுதிக்குள் அத்துமீறி நுழைந்த அந்த நபர், அங்கு பாதுகாப்புப் பணியில் இருந்த அதிகாரி ஒருவரை நோக்கி நேரடியாகத் துப்பாக்கியால் சுட்டுள்ளார். அதிர்ஷ்டவசமாக அந்த அதிகாரி குண்டு துளைக்காத ஆடை (Bulletproof Jacket) அணிந்திருந்ததால் எவ்வித காயமுமின்றி உயிர் தப்பினார். துப்பாக்கிச் சத்தம் கேட்ட அடுத்த சில நொடிகளில், அங்கிருந்த பாதுகாப்புப் படையினர் டொனால்ட் ட்ரம்ப்பைச் சுற்றி வளைத்து, பாதுகாப்பான இடத்திற்கு விரைவாக அழைத்துச் சென்றனர். இதனால் அவர் எவ்வித காயமுமின்றி தப்பினார்.
கைது செய்யப்பட்ட நபரிடம் இருந்து பல அதிநவீன ஆயுதங்களை அதிகாரிகள் பறிமுதல் செய்துள்ளனர். முதற்கட்ட விசாரணையின்படி, இத்தாக்குதல் தன்னிச்சையாகச் செயல்படும் லோன் உல்ஃப் (Lone Wolf) பாணியில் நடத்தப்பட்டிருக்கலாம் என்று உளவுத்துறை அமைப்புகள் கருதுகின்றன. கலிபோர்னியாவில் இருந்து வாஷிங்டனுக்குப் பயணம் செய்துள்ள கோல் டோமஸ் ஆலன், நீண்ட நாட்களாகவே இதற்கான திட்டமிடலில் ஈடுபட்டிருக்கலாம் என்ற கோணத்தில் விசாரணை தீவிரமடைந்துள்ளது. அமெரிக்காவின் மிக உயரிய பாதுகாப்பு வளையத்தைக் கொண்ட ஒரு அதிகாரப்பூர்வ நிகழ்ச்சிக்குள், இவ்வளவு ஆயுதங்களுடன் ஒரு நபர் எவ்வாறு உள்ளே நுழைந்தார் என்பது தற்போது அமெரிக்கப் பாதுகாப்பு அமைப்புகள் மீது அடுக்கடுக்கான கேள்விகளை எழுப்பியுள்ளது.
டொனால்ட் ட்ரம்ப் மீது இத்தகைய கொலை முயற்சி நடப்பது இது முதல் முறையல்ல. கடந்த சில ஆண்டுகளில் அவர் தொடர்ந்து துப்பாக்கிப் கலாச்சாரத்தின் இலக்காக மாறி வருகிறார். இதற்கு முன்னதாக, பென்சில்வேனியாவில் நடைபெற்ற அதிபர் தேர்தல் பிரச்சாரக் கூட்டத்தில் அவர் பேசிக்கொண்டிருந்தபோது, மேடையை நோக்கிக் கடுமையான துப்பாக்கிச் சூடு நடத்தப்பட்டது. அந்தத் தாக்குதலில் ட்ரம்பின் வலது காது கிழிந்து இரத்தம் சொட்டியவாறு அவர் மேடையில் இருந்து பாதுகாப்புடன் வெளியேற்றப்பட்டார். அப்போது தாக்குதல் நடத்தியவர் உடனடியாகப் பாதுகாப்புப் படையினரால் சுட்டுக் கொல்லப்பட்டார். அதனைத் தொடர்ந்து, புளோரிடாவில் உள்ள அவரது சொந்தக் கோல்ஃப் மைதானத்தில் அவர் விளையாடிக் கொண்டிருந்தபோதும், புதர்களுக்குள் மறைந்திருந்த ஆயுததாரி ஒருவர் பாதுகாப்புப் பிரிவினரால் முன்கூட்டியே கண்டறியப்பட்டு முறியடிக்கப்பட்டார். தற்போது வாஷிங்டனில் நிகழ்ந்துள்ள இந்த மூன்றாவது நேரடித் தாக்குதல் முயற்சி, அமெரிக்க அரசியல் வன்முறையின் உச்சக்கட்டத்தை வெளிப்படுத்துகிறது.
இந்தத் தொடர் சம்பவங்கள் உலக நாடுகளின் தலைவர்களிடையே கடும் கவலையையும் கண்டனங்களையும் உருவாக்கியுள்ளன. ஜனநாயகத்தின் மீதான நேரடித் தாக்குதலாகவே இது பார்க்கப்படுகிறது என்று பல்வேறு உலக நாடுகள் தங்களது அதிகாரப்பூர்வ அறிக்கைகளில் சுட்டிக்காட்டியுள்ளன.
