சென்னை மே 8 : தமிழக வெற்றி கழகத்திற்கு விசிக ஆதரவு வழங்க முடிவு செய்ததாக தகவல் வெளியாகியுள்ளது. கூட்டணி அமைச்சரவை அமையும் சூழல் தமிழக அரசியலில் பரபரப்பை ஏற்படுத்தியுள்ளது.
தமிழக அரசியல் களம் தற்போது எதிர்பாராத திருப்பங்களால் சூடுபிடித்துள்ளது. தமிழக வெற்றி கழகம் ஆட்சி அமைக்க தயாராகி வரும் நிலையில், விடுதலை சிறுத்தைகள் கட்சி எடுத்துள்ளதாக கூறப்படும் முக்கிய முடிவு அரசியல் வட்டாரத்தில் பெரும் பரபரப்பை ஏற்படுத்தியுள்ளது. தமிழக வெற்றி கழகத்திற்கு ஆதரவு வழங்குவது மட்டுமல்லாமல், அமைச்சரவையிலும் பங்கேற்க வேண்டும் என்ற கோரிக்கை விசிக உயர்நிலை குழுக் கூட்டத்தில் வலுத்ததாக தகவல்கள் வெளியாகியுள்ளன.
More to Read : தமிழக முதல்வராகிறார் தவெக தலைவர் விஜய்
தமிழக வெற்றி கழகம் நாளை காலை 11 மணிக்கு பதவியேற்கும் சூழல் உருவாகியிருப்பதாக கூறப்படும் நிலையில், பெரும்பான்மைக்கு தேவையான 117 இடங்களும் கிடைத்திருப்பதாக அரசியல் வட்டாரங்களில் பேசப்படுகிறது. இந்த சூழலில்தான் விடுதலை சிறுத்தைகள் கட்சி நடத்திய ஆன்லைன் உயர்நிலை குழுக் கூட்டம் முக்கிய கவனம் பெற்றுள்ளது.
அந்த கூட்டத்தில் பேசிய பெரும்பாலான நிர்வாகிகள், “இது ஒரு வரலாற்று வாய்ப்பு” என்று வலியுறுத்தியதாக தகவல் வெளியாகியுள்ளது. தமிழக வெற்றி கழகத்திற்கு ஆதரவு வழங்குவது மட்டுமல்லாமல், அமைச்சரவையிலும் பங்கேற்க வேண்டும் எ முன்வைக்கப்பட்டதாக தகவல்கள் வெளியாகியுள்ளன..
அமைச்சரவையில் இடம் கோரும் விசிக நிர்வாகிகள்
விசிகவுக்கு தற்போது இரண்டு சட்டமன்ற உறுப்பினர்கள் உள்ள நிலையில், அவர்களில் ஒருவருக்கு அமைச்சரவை வாய்ப்பு கிடைக்கலாம் என்ற எதிர்பார்ப்பு உருவாகியுள்ளது. யாருக்கு அந்த வாய்ப்பு வழங்கப்படும் என்பது இன்னும் உறுதியாகவில்லை என்றாலும், அமைச்சரவை பங்கேற்பு குறித்து கட்சிக்குள் உற்சாகமான மனநிலை உருவாகியுள்ளதாக தகவல்கள் தெரிவிக்கின்றன. கட்சியின் பல நிர்வாகிகள், “மக்களுக்கான உரிமைகளை தொடர்ந்து பேசுவது மட்டும் போதாது. ஆட்சியிலும் பங்கெடுத்தால்தான் கொள்கைகளை செயல்படுத்த முடியும்” என்ற கருத்தை வலியுறுத்தியதாக கூறப்படுகிறது.
விடுதலை சிறுத்தைகள் கட்சி தொடங்கப்பட்ட நாளிலிருந்தே ஆட்சி அதிகாரத்தில் பங்கேற்க வேண்டும் என்ற இலக்குடன் செயல்பட்டு வந்ததாக நிர்வாகிகள் கூட்டத்தில் குறிப்பிட்டதாக தகவல் வெளியாகியுள்ளது.
“அடித்தட்டு மக்களின் உரிமைக்காக போராடி, பல சவால்களை கடந்து வளர்ந்த கட்சிக்கு இது மிகப்பெரிய அரசியல் வாய்ப்பு” என்று பலர் கருத்து தெரிவித்ததாக கூறப்படுகிறது. இரண்டு எம்.எல்.ஏக்கள் மட்டுமே இருந்தாலும், தற்போதைய அரசியல் கணக்கில் அவர்களின் ஆதரவு முக்கிய பங்கு வகிப்பதாகவும் பேசப்பட்டுள்ளது.
ஏற்கனவே இடதுசாரி கட்சிகள் ஆதரவு அளிப்பதாக அறிவித்திருந்தாலும், அமைச்சரவையில் பங்கேற்கமாட்டோம் என்ற நிலைப்பாட்டை எடுத்துள்ளன. ஆனால் விசிக தரப்பில் அமைச்சரவை பங்கேற்பு குறித்து தீவிர ஆர்வம் இருப்பதாகவும், சில மாதங்களுக்கு முன்பே “ஆட்சியில் பங்கு” குறித்து கட்சித் தலைவர் முன்வைத்த கருத்துக்கள் அரசியல் வட்டாரத்தில் விவாதத்தை ஏற்படுத்தியிருந்தன. தற்போது அதற்கான வாய்ப்பு உருவாகியிருப்பதாக விசிக நிர்வாகிகள் கருதுவதாக தகவல் வெளியாகியுள்ளது.
