புதுதில்லி , ஜூன் 19 : நாட்டில் வேலைவாய்ப்புகளைப் பெருக்கும் நோக்கில், முதன்முறையாகப் பணியில் சேரும் இளைஞர்களுக்கு 15,000 ரூபாய் ஊக்கத்தொகை வழங்கும் ‘வளர்ச்சி அடைந்த பாரதம் வேலைவாய்ப்பு திட்டத்தை’ (Viksit Bharat Rozgar Yojana) பிரதமர் நரேந்திர மோடி அதிகாரப்பூர்வமாகத் தொடங்கி வைத்துள்ளார். புது தில்லியில் உள்ள விஞ்ஞான் பவனில் நடைபெற்ற சிறப்பு நிகழ்வில், இதற்கான மின்னணு பொத்தானை அழுத்திப் பிரதமர் இந்தத் திட்டத்தை முறைப்படி ஆரம்பித்து வைத்தார். தொடக்க விழாவின் ஒரு பகுதியாக, நாடு முழுவதும் உள்ள சுமார் 15 லட்சம் பயனாளிகளுக்கு முதற்கட்டமாக 2,400 கோடி ரூபாய் நிதி நேரடியாக விநியோகிக்கப்பட்டது.
மத்திய அரசின் இந்த புதிய முன்னெடுப்பானது வேலை தேடும் இளைஞர்களுக்கும் வேலைவாய்ப்புகளை வழங்கும் நிறுவனங்களுக்கும் ஒருசேர ஊக்கமளிக்கும் வகையில் வடிவமைக்கப்பட்டுள்ளது. இந்தத் திட்டத்தை முழுமையாகச் செயல்படுத்துவதற்காக மத்திய அரசு 99,446 கோடி ரூபாயை ஒட்டுமொத்தமாக ஒதுக்கியுள்ளது. வரும் இரண்டு ஆண்டுகளுக்குள் நாடு முழுவதும் சுமார் 3.55 கோடி புதிய வேலைவாய்ப்புகளை உருவாக்குவதே இந்த பிரம்மாண்ட திட்டத்தின் முதன்மையான நோக்கம் என்று மத்திய அரசு வட்டாரங்கள் தெரிவிக்கின்றன.
தொழில்துறை உற்பத்தியை அதிகரிப்பதற்காக மத்திய அரசு வழங்கி வரும் உற்பத்தி சார்ந்த ஊக்கத்தொகை (PLI) திட்டத்தைப் போலவே சேவை மற்றும் உற்பத்தி உட்பட அனைத்துத் துறைகளிலும் வேலைவாய்ப்புகளை அதிகரிக்க இந்த புதிய ஊக்கத்தொகை வழிமுறை கொண்டு வரப்பட்டுள்ளது. இதன் மூலம் நிறுவனங்கள் கூடுதல் பணியாளர்களைத் தங்களின் கீழ் பணியமர்த்த முன்வரும் என்று எதிர்பார்க்கப்படுகிறது.
இந்தத் திட்டத்தின் மிக முக்கிய அம்சமாக முதன்முறையாக ஒரு பணியில் இணைந்து தொழிலாளர் வருங்கால வைப்பு நிதி (EPF) கணக்கில் தங்களைப் பதிவு செய்து கொள்ளும் ஊழியர்களுக்கு 15,000 ரூபாய் ஊக்கத்தொகை நேரடியாக வழங்கப்படவுள்ளது. இந்தத் தொகை பயனாளிகளின் வங்கி கணக்குகளில் ஒரே தவணையாகச் செலுத்தப்பட மாட்டாது. மாறாக ஊழியர்களின் பணித் தொடர்ச்சியை உறுதி செய்யும் வகையில் இரண்டு சமமான தவணைகளாகப் பிரித்து வழங்கப்படும்.
அதன்படி ஒரு நிறுவனத்தில் பணியில் சேர்ந்து முதல் ஆறு மாத காலத்தைப் வெற்றிகரமாக நிறைவு செய்யும் ஊழியர்களுக்கு முதற்கட்டமாக 7,500 ரூபாய் அவர்களின் வங்கி கணக்கில் செலுத்தப்படும். அதன் தொடர்ச்சியாக அதே பணியில் 12 மாதங்களை நிறைவு செய்த பின்னர், எஞ்சிய 7,500 ரூபாய் இரண்டாவது தவணையாக விடுவிக்கப்படும் என்று திட்டத்தின் வழிகாட்டுதல்களில் விரிவாகக் குறிப்பிடப்பட்டுள்ளது.
மறுபுறம் வேலைவாய்ப்புகளை உருவாக்கும் நிறுவனங்களுக்கும் இந்தத் திட்டத்தின் கீழ் கணிசமான நிதி ஊக்கத்தொகை அறிவிக்கப்பட்டுள்ளது. உற்பத்தித் துறை மட்டுமன்றி அனைத்துத் துறைகளைச் சேர்ந்த நிறுவனங்களும் தங்களின் வணிக விரிவாக்கத்திற்காகப் புதிய பணியாளர்களைக் கூடுதலாக வேலைக்கு அமர்த்தும்போது அந்த நிறுவனங்களுக்குப் பணியாளர் ஒருவருக்கு மாதம் 3,000 ரூபாய் வீதம் நிதியுதவி வழங்கப்படும். இந்த ஊக்கத்தொகை அதிகபட்சமாக 12 மாதங்களுக்கு அந்தந்த நிறுவனங்களுக்கு மத்திய அரசால் வழங்கப்படும் என்று தெரிவிக்கப்பட்டுள்ளது.
இருப்பினும் இந்தத் திட்டத்தின் கீழ் பயன் பெறுவதற்குக் குறிப்பிட்ட சில தகுதி வரம்புகளை மத்திய அரசு விதித்துள்ளது. இந்தத் திட்டத்தின் மூலம் ஊக்கத்தொகை பெற விரும்பும் ஊழியர்களின் அதிகபட்ச மாதச் சம்பளம் ஒரு லட்சம் ரூபாய்க்குள் இருக்க வேண்டும் என்பது கட்டாயமாக்கப்பட்டுள்ளது. இந்தச் சம்பள வரம்பிற்குள் வரும் புதிய பணியாளர்கள் மட்டுமே மத்திய அரசின் இந்த நேரடிப் பணப் பலனைப் பெறத் தகுதியுடையவர்கள் ஆவர்.
கடந்த ஆண்டு ஆகஸ்ட் ஒன்றாம் தேதி முதல் இந்த வேலைவாய்ப்புத் திட்டம் நடைமுறைக்கு வந்திருந்தாலும், தற்போது இதற்கான நிதி ஒதுக்கீடுகளும் முறையான பயனாளிகள் சேர்க்கையும் முழு வீச்சில் தொடங்கப்பட்டுப் பிரதமரால் முறைப்படி தொடங்கி வைக்கப்பட்டுள்ளது. இந்தத் திட்டத்தின் மூலம் இந்தியாவின் தொழில் சந்தையில் புதிய பணியாளர்களின் சேர்க்கை பல மடங்கு அதிகரிக்கும் என்றும் பொருளாதாரத் தேவைகளுக்கான வேலைவாய்ப்புச் சூழல் வலுவடையும் என்றும் மத்திய அரசின் கொள்கை வகுப்பாளர்கள் நம்பிக்கை தெரிவித்துள்ளனர்.
