ஓசூர் , ஜூன் 21:பணத்தை இரட்டிப்பாக்கி தருவதாகக் கூறி மூன்றரை லட்சம் ரூபாய் மோசடி செய்துவிட்டு ஒன்றரை ஆண்டுகளாக தலைமறைவாக இருந்த நபரைத் தேடிப் பிடித்து கடத்திச் சென்று விடிய விடிய கொடூரத் தாக்குதல் நடத்திய மூன்று பேரை ஓசூர் நகர போலீசார் கைது செய்துள்ளனர். கடத்தப்பட்ட நபரின் மனைவி 100 என்ற அவசர உதவி எண்ணிற்கு அளித்த தகவலின் பேரில் போலீசார் இந்த அதிரடி நடவடிக்கையை மேற்கொண்டுள்ளனர்.
தர்மபுரி மாவட்டம் பாப்பிரெட்டிபட்டி தாலுகா பள்ளிபட்டி பகுதியைச் சேர்ந்தவர் 39 வயதான கார்பெண்டர் ரவி. பெங்களூருவில் வேலை செய்து வந்த இவருக்கு ரம்யா என்ற 32 வயது மனைவி உள்ளார். ரவி கடந்த ஒன்றரை ஆண்டுகளுக்கு முன்பு ஓசூர் என்.ஜி.ஜி.ஓ காலனியைச் சேர்ந்த மோகன் என்பவரை அணுகியுள்ளார். தன்னிடம் கொடுக்கும் பணத்தை மிகக் குறுகிய காலத்தில் மூன்று மடங்காக இரட்டிப்பாக்கித் தருவதாக ஆசை வார்த்தை கூறியுள்ளார். இதனை நம்பிய மோகன் ரவியிடம் மூன்றரை லட்சம் ரூபாய் பணத்தை ஒப்படைத்துள்ளார்.
also : பாளையங்கோட்டையில் 150 பேருடன் மாபெரும் யோகா நிகழ்வு… சர்வதேச யோகா தினம் கோலாகலம்!
பணத்தைப் பெற்றுக்கொண்ட ரவி அதற்குப் பதிலாக வெள்ளை தாள்களுடன் கூடிய போலி ரூபாய் நோட்டுக் கட்டுகளைக் கொடுத்துள்ளார். அந்த நேரத்தில் திடீரென போலீஸ் வருவதாகக் கூறி நாடகமாடிய ரவி அங்கிருந்து மோகனை ஏமாற்றிவிட்டுத் தப்பியோடியுள்ளார். அதன் பின்னர் பையில் இருந்த பணத்தை எடுத்துப் பார்த்தபோதுதான் அதில் மிகக் குறைவான அசல் பணமும் அதிகளவில் வெள்ளை தாள்களும் இருந்தது மோகனுக்குத் தெரியவந்தது. தான் ஏமாற்றப்பட்டதை அறிந்து கடும் ஆத்திரமடைந்த மோகன் உடனடியாக ரவியைத் தொடர்புகொள்ள முயன்றபோது அவரது செல்போன் சுவிட்ச் ஆப் செய்யப்பட்டிருந்தது. பணத்தை ஏமாற்றிய ரவி கடந்த ஒன்றரை ஆண்டுகளாக எங்கு இருக்கிறார் என்று தெரியாமல் தலைமறைவாக இருந்து வந்தார்.
இந்த நிலையில் தலைமறைவாக இருந்த ரவி ஓசூர் சீதாராம் மேடு பகுதியில் தங்கியிருப்பதை மோகனும் அவரது நண்பர்களும் ரகசியமாகக் கண்டறிந்துள்ளனர். இதனையடுத்து மோகன் தேன்கனிக்கோட்டையைச் சேர்ந்த தனது நண்பரான சந்தோஷ் மற்றும் அனுசோனையைச் சேர்ந்த ஹரிஷ் ஆகியோருடன் இணைந்து சீதாராம் மேடு பகுதிக்குச் சென்றுள்ளார். அங்கு ரவியை வலுக்கட்டாயமாக மடக்கிப் பிடித்து சானசந்திரம் பகுதிக்குக் கடத்திச் சென்றுள்ளனர். தாங்கள் ஏமாந்த பணத்தைத் திருப்பித் தருமாறு கேட்டு அவரை விடிய விடிய அடித்துத் துன்புறுத்தியுள்ளனர்.
மேலும் ரவியின் மனைவி ரம்யாவைத் தொடர்புகொண்ட கடத்தல் கும்பல் உங்கள் கணவரைக் கடத்தி வைத்திருப்பதாகக் கூறி அவரை உயிருடன் விடுவிக்க வேண்டுமானால் நான்கு லட்சம் ரூபாய் பணம் தர வேண்டும் என மிரட்டியுள்ளது. தனது கணவர் பணத்திற்காகக் கடத்தப்பட்டு கொடூரமாகத் துன்புறுத்தப்படுவதை அறிந்த ரம்யா பதற்றமடையாமல் உடனடியாக காவல்துறை அவசர உதவி எண்ணான 100-க்கு அழைத்துத் தகவல் கொடுத்துள்ளார்.
தகவல் கிடைத்தவுடன் ஓசூர் நகர போலீசார் சம்பவ இடத்திற்கு விரைந்து சென்றனர். கடத்தப்பட்ட ரவியை அவரது மனைவியின் துல்லியமான உதவியோடு மீட்ட போலீசார் அவரை அடைத்து வைத்துத் தாக்கிய எதிரிகளான ஓட்டுநர்கள் மோகன், ஹரிஷ் மற்றும் கட்டுமான தொழில் செய்து வரும் சந்தோஷ் ஆகிய மூன்று பேரையும் அதிரடியாகக் கைது செய்தனர். அவர்களிடமிருந்து தாக்குதலுக்குப் பயன்படுத்தப்பட்ட கத்தி, உருட்டுக் கட்டை, கட்டிங் பிளேடு உள்ளிட்ட ஆயுதங்களையும் ஒரு இருசக்கர வாகனத்தையும் போலீசார் பறிமுதல் செய்தனர்.
கைது செய்யப்பட்ட மூன்று பேர் மற்றும் மோசடி புகாருக்குள்ளான ரவி ஆகிய அனைவரையும் ஓசூர் நகர காவல் நிலையத்திற்கு அழைத்து வந்து போலீசார் தீவிர விசாரணை மேற்கொண்டு வருகின்றனர்.
