சென்னை , April 22 : தமிழ்நாடு சட்டமன்றத் தேர்தலுக்கான ஏற்பாடுகள் தீவிரமடைந்து வரும் நிலையில், வாக்காளர் அடையாள அட்டை (Voter ID) இல்லாதவர்கள் ஆதார் அட்டை உள்ளிட்ட 12 மாற்று ஆவணங்களைக் காட்டி வாக்களிக்கலாம் என தேர்தல் ஆணையம் அறிவித்துள்ளது. இந்த அறிவிப்பு வாக்காளர்கள் மத்தியில் பெரும் வரவேற்பைப் பெற்றிருந்தாலும், அதே வேளையில் ஒரு முக்கிய குழப்பத்தையும் ஏற்படுத்தியுள்ளது. சமூக ஊடகங்களில் ‘ஆதார் அட்டை இருந்தால் மட்டுமே போதும், நேரடியாகச் சென்று வாக்களித்துவிடலாம்’ என்ற தவறான தகவல் பரவி வரும் சூழலில், தேர்தல் ஆணையம் இது குறித்து மிகத் தெளிவான, இறுதியான விளக்கத்தை அளித்துள்ளது.
தேர்தல் ஆணையத்தின் விதிமுறைகளின்படி, ஒரு குடிமகன் வாக்களிப்பதற்கான ஆகப் பெரிய தகுதி அவரிடம் இருக்கும் அடையாள அட்டை அல்ல; மாறாக, அவருடைய பெயர் அந்தத் தொகுதியின் வாக்காளர் பட்டியலில் இடம் பெற்றிருப்பது மட்டுமே ஆகும். எளிமையாகச் சொன்னால், வாக்காளர் பட்டியலில் பெயர் இல்லாத ஒரு நபர், நாட்டின் மிக உயரிய அடையாள ஆவணங்களைக் காட்டினாலும் வாக்குச் சாவடிக்குள் அனுமதிக்கப்பட மாட்டார். ஆதார் அட்டை, பாஸ்போர்ட் போன்ற ஆவணங்கள் அனைத்தும் வாக்குச் சாவடிக்கு வரும் நபர் ‘அவர்தானா’ என்பதை உறுதிப்படுத்தும் கருவிகள்தானே தவிர, வாக்களிக்கும் உரிமையை வழங்கும் சான்றுகள் அல்ல என்று தேர்தல் அதிகாரிகள் திட்டவட்டமாகத் தெரிவித்துள்ளனர்.
Also : இந்தியாவில் 10 கோடி மக்களுக்கு நீரிழிவு நோய் – தமிழ்நாடு முதலிடமா அல்லது அதிக கண்டறிதலின் விளைவா?
பொதுவாகத் தேர்தல் நேரங்களில் வாக்காளர் அடையாள அட்டை தொலைந்து போவது, சேதமடைவது அல்லது புதிய அட்டை கைக்குக் கிடைக்காமல் போவது போன்ற காரணங்களால் பலரது வாக்குகள் வீணாகின்றன. ஜனநாயகக் கடமையில் அனைவரும் பங்கேற்க வேண்டும் என்ற நோக்கில், மாற்று ஆவணங்களை தேர்தல் ஆணையம் அனுமதிக்கிறது. அதன்படி, வாக்காளர் அட்டை இல்லாதவர்கள் ஆதார் அட்டை, பாஸ்போர்ட், ஓட்டுநர் உரிமம் (டிரைவிங் லைசென்ஸ்), பான் கார்டு, புகைப்படம் ஒட்டப்பட்ட வங்கி அல்லது அஞ்சலக சேமிப்புக் கணக்கு புத்தகங்கள், மத்திய மாநில அரசு ஊழியர்களுக்கான அடையாள அட்டைகள், பொது விநியோக அட்டை (ரேஷன் கார்டு) உள்ளிட்ட 12 அங்கீகரிக்கப்பட்ட ஆவணங்களில் ஏதேனும் ஒன்றை வாக்குச் சாவடியில் காட்டி தங்களின் அடையாளத்தை நிரூபிக்கலாம்.
இந்தச் சலுகை ஒருபுறம் இருந்தாலும், தேர்தலுக்கு முந்தைய சரிபார்ப்பு எவ்வளவு முக்கியம் என்பதை தற்போதைய சூழல் உணர்த்துகிறது. குறிப்பாக, தமிழ்நாட்டில் முதல்முறை வாக்களிக்கக் காத்திருக்கும் லட்சக்கணக்கான இளைஞர்கள் மற்றும் வேலை, திருமணம் காரணமாக அண்மையில் முகவரி மாறிய நகர்ப்புற வாக்காளர்கள் மத்தியில் இது குறித்த விழிப்புணர்வு குறைவாகவே உள்ளது. புதிய இடத்திற்கு மாறும்போது வாக்காளர் பட்டியலில் பெயர் சேர்க்கத் தவறிய பலரும், தங்களின் ஆதார் அட்டையில் முகவரி மாறிவிட்டதால் வாக்களித்துவிடலாம் என்று தவறாகக் கணக்குப் போடுகின்றனர். இந்தத் தவறு தேர்தல் நாளன்று வாக்குச் சாவடிகளில் தேவையற்ற வாக்குவாதங்களுக்கும் ஏமாற்றங்களுக்கும் வழிவகுக்கும் என்பதால், முன்கூட்டியே ஆன்லைன் மூலமாகவோ அல்லது தேர்தல் அலுவலகங்கள் மூலமாகவோ பட்டியலில் பெயர் இருப்பதை உறுதி செய்ய வேண்டும் என அறிவுறுத்தப்பட்டுள்ளது.
