சென்னை , ஏப்ரல் 22: தமிழ்நாட்டில் ஏப்ரல் 23 அன்று நடைபெறவுள்ள 2026 சட்டமன்றத் தேர்தலை ஒட்டி அரசியல் களம் முன்னெப்போதும் இல்லாத வகையில் புதிய பரிமாணத்தைப் பெற்றுள்ளது. இந்தச் சூழலில் கல்வி மற்றும் வேலைவாய்ப்புக்காக உலகின் பல்வேறு நாடுகளில் வசிக்கும் புலம்பெயர் தமிழர்கள் தங்களது ஜனநாயகக் கடமையை ஆற்றுவதற்காகத் தாயகம் திரும்பும் காட்சிகள் சமூக வலைதளங்களில் வெளியாகி பெரும் விவாதத்தை ஏற்படுத்தியிருக்கின்றன. குறிப்பாக தமிழ்நாட்டை நோக்கிப் பயணிக்கும் ஒரு குறிப்பிட்ட விமானம் முழுவதும் வாக்களிக்கத் திரும்பும் பயணிகளால் நிரம்பியுள்ள ஒரு வீடியோ தற்போதைய தேர்தல் விழிப்புணர்வின் புதிய அடையாளமாக மாறியுள்ளது.
Also : 12 மாற்று ஆவணங்கள் இருந்தால் வாக்களிக்கலாம் என்று தேர்தல் ஆணையம் அறிவிப்பு
பாரம்பரியமாகத் தமிழ்நாட்டு அரசியலில் நிலவி வந்த இருமுனைப் போட்டிகள் மற்றும் குடும்ப அரசியல் ஆதிக்கக் கருத்துகளுக்கு மத்தியில் இந்த முறை புதிய தலைமுறை வாக்காளர்களின் ஈடுபாடு பெருமளவில் அதிகரித்திருப்பதை இந்தத் தேர்தல் களம் உணர்த்துகிறது. நடிகர் விஜய் தலைமையிலான தமிழக வெற்றிக் கழகத்தின் தேர்தல் வருகை மாநிலத்தின் அரசியல் விவாதங்களை இளைஞர்களை நோக்கியும் புதிய மாற்றங்களை நோக்கியும் திருப்பியுள்ள நிலையில் இந்த வைரல் வீடியோ தேர்தல் சூட்டை மேலும் அதிகரித்துள்ளது.
துபாய், சிங்கப்பூர், அமெரிக்கா மற்றும் ஐரோப்பிய நாடுகளில் வாழும் இந்தியக் குடியுரிமை கொண்ட வெளிநாட்டுத் தமிழர்கள் தங்களுக்குத் தபால் வாக்கு அல்லது இணைய வழி வாக்குப்பதிவு போன்ற வசதிகள் இல்லாத நிலையிலும் சொந்தச் செலவில் விமானம் ஏறித் தாயகம் வந்து நேரடியாக மட்டுமே வாக்களிக்க முடியும் என்ற சட்ட விதியை உணர்ந்து இந்த முடிவை எடுத்துள்ளனர். விமானப் பயணிகள் ‘வோட்’ செய்வதற்காகத் தாயகம் திரும்பும் அந்தத் தங்களின் கூட்டு உற்சாகத்தைப் பகிர்ந்துகொள்ளும் காட்சி உலகளாவிய தமிழர்களின் அரசியல் விழிப்புணர்வை வெளிப்படுத்துகிறது
