சென்னை, May 7 : தமிழக அரசியல் களம் கடந்த சில நாட்களாக பல்வேறு அதிரடி திருப்பங்களுடன் நகர்ந்து வரும் சூழலில், திமுக தலைவரும் முதலமைச்சருமான மு.க.ஸ்டாலின் ஆங்கில நாளிதழ் ஒன்றுக்கு அளித்துள்ள பேட்டி மாநில அரசியலில் புதிய விவாதங்களையும் பரபரப்பையும் ஏற்படுத்தியுள்ளது. தமிழகத்தில் அடுத்த ஆட்சியை நடிகர் விஜய் தலைமையிலான தமிழக வெற்றிக் கழகம் (தவெக) அமைக்கும் சூழல் உருவானாலும், அதற்கு திமுக எந்தவித இடையூறும் செய்யாது என்று அவர் தெரிவித்துள்ள கருத்து, முக்கிய நகர்வாகப் பார்க்கப்படுகிறது.
தமிழகத்தில் அடுத்த அரசை யார் அமைப்பார்கள், தற்போதைய அரசியல் நகர்வுகளின் பின்னணி என்ன என்பது குறித்த விவாதங்கள் தீவிரமாகி வரும் நிலையில், முதலமைச்சரின் இந்த வெளிப்படையான கருத்து வெளியாகியுள்ளது.
அரசியலமைப்பு சார்ந்த நெருக்கடிகளோ அல்லது தேவையற்ற மறுதேர்தல்களோ தமிழ்நாட்டிற்கு தற்போதைய சூழலில் தேவையில்லை என்பதில் திமுக உறுதியாக இருப்பதாக மு.க.ஸ்டாலின் தனது பேட்டியில் குறிப்பிட்டுள்ளார். மக்கள் அளிக்கும் தீர்ப்பை முழுமையாக மதிப்பதே திமுகவின் அரசியல் பண்பாடு என்றும், மக்கள் தேர்ந்தெடுக்கும் எந்தவொரு அரசையும் ஜனநாயக அடிப்படையில் செயல்பட அனுமதிக்க வேண்டும் என்ற நிலைப்பாட்டை தங்களது கட்சி தொடரும் என்றும் அவர் சுட்டிக்காட்டியுள்ளார்.
புதிதாக ஒரு அரசு பதவியேற்ற உடனே அரசியல் ரீதியிலான விமர்சனங்களை முன்வைக்காமல், குறைந்தது ஆறு மாத காலமாவது அந்த அரசின் செயல்பாடுகளை மக்கள் மதிப்பிடுவதற்கான கால அவகாசத்தை வழங்க வேண்டும் என்ற கருத்தையும் அவர் முன்வைத்துள்ளார். நிர்வாகத் தொடர்ச்சிக்கும் ஜனநாயக முறைப்படி தேர்ந்தெடுக்கப்படும் புதிய அரசின் நிலைத்தன்மைக்கும் இந்த அணுகுமுறை அவசியம் என்பதை முதலமைச்சரின் இந்த பேட்டி உணர்த்துகிறது .
இதற்கிடையில், கடந்த சில தினங்களாகவே சமூக வலைதளங்களிலும் அரசியல் வட்டாரங்களிலும் பல்வேறு அரசியல் யூகங்கள் பரவி வந்தன. குறிப்பாக, திமுக மற்றும் எடப்பாடி கே. பழனிசாமி தலைமையிலான அதிமுக இடையே மறைமுக அரசியல் பேச்சுவார்த்தைகள் மற்றும் புதிய சமன்பாடுகள் குறித்து தகவல்கள் உலா வந்தன. எடப்பாடி பழனிசாமியை மீண்டும் முதலமைச்சராக்கும் நோக்கில் திட்டங்கள் வகுக்கப்படுவதாகவும், வெளியிலிருந்து ஆதரவு வழங்கி திமுக எதிர்க்கட்சியாக அமரத் தயாராகி வருவதாகவும் அதிகாரப்பூர்வமற்ற தகவல்கள் பரவின. இந்தத் தகவல்கள் எவராலும் உறுதிப்படுத்தப்படாத போதிலும், அரசியல் வட்டாரத்தில் தற்காலிக பதற்றமான சூழலை உருவாக்கியிருந்தது.
அதே நேரத்தில், தவெக தலைவர் விஜய்யின் அண்மைக்கால நகர்வுகளும் அரசியல் கவனத்தை ஈர்த்துள்ளன. சென்னை பட்டினப்பாக்கத்தில் உள்ள தனது இல்லத்திலிருந்து நீலாங்கரை இல்லத்திற்கு எவ்வித பாதுகாப்பு வாகனங்களும் இன்றி அவர் சென்ற நிகழ்வு, அரசியல் ஆலோசனைகளுக்கான நகர்வா என்ற கேள்விகளை எழுப்பியது. இதனுடன், அதிமுகவைச் சேர்ந்த சட்டமன்ற உறுப்பினர்கள் புதுச்சேரி ரிசார்ட்டுகளில் தங்கியிருப்பதாக வெளியான செய்திகளும் இணைந்து, தமிழக அரசியலில் அடுத்தகட்ட நகர்வுகள் என்னவாக இருக்கும் என்ற எதிர்பார்ப்பை மக்கள் மத்தியில் அதிகரித்துள்ளது.
திமுக அரசு தற்போது செயல்படுத்தி வரும் முக்கிய மக்கள் நலத்திட்டங்கள் குறித்தும் முதலமைச்சர் மு.க.ஸ்டாலின் தனது பேட்டியில் கவலை பகிர்ந்துள்ளார். ஆட்சியில் மாற்றங்கள் ஏற்பட்டாலும், தற்போதைய அரசால் கொண்டுவரப்பட்ட மாணவர்களுக்கான காலை உணவுத் திட்டம் மற்றும் மகளிர் உரிமைத் தொகை போன்ற முன்னோடித் திட்டங்கள் அரசியல் வேறுபாடுகளுக்கு அப்பாற்பட்டு தொடர்ந்து செயல்படுத்தப்பட வேண்டும் என்பதே தனது விருப்பம் என்று அவர் வலியுறுத்தியுள்ளார். மக்கள் நலனை மையமாகக் கொண்டு தொடங்கப்பட்ட இத்தகைய திட்டங்கள் எக்காரணம் கொண்டும் பாதிக்கப்படக் கூடாது என்பதே திமுகவின் அடிப்படை நிலைப்பாடு என்றும் அவர் தெளிவுபடுத்தியுள்ளார்.
