சென்னை , ஏப்ரல் 28 : தமிழ்நாடு சட்டமன்றத் தேர்தல் 2026-ன் வாக்குப்பதிவு நிறைவடைந்துள்ள நிலையில், அரசியல் களத்தின் ஒட்டுமொத்த பார்வையும் வரும் மே 4ஆம் தேதி நடைபெறவுள்ள வாக்கு எண்ணிக்கையை நோக்கியே திரும்பியிருக்கிறது. இந்தச் சூழலில், தமிழக வெற்றிக் கழகத்தின் (டிவிகே) தலைவர் விஜய், தனது கட்சி வேட்பாளர்களுக்கு வழங்கியுள்ள அதிரடியான மற்றும் நுணுக்கமான வழிகாட்டுதல்கள் தற்போதைய அரசியல் வட்டாரங்களில் பெரும் விவாதப் பொருளாக மாறியுள்ளன. முதன்முறையாக தேர்தல் களத்தைச் சந்திக்கும் புதிய அரசியல் முகங்கள் தங்கள் கட்சியில் அதிகமாக இருப்பதால், வாக்கு எண்ணிக்கை மையங்களில் ஒரு வாக்கைக்கூட கவனக்குறைவாக இழந்துவிடக் கூடாது என்பதில் விஜய் மிகத் தீவிரமாக இருப்பதாகத் தெரிகிறது.
வாக்கு எண்ணிக்கை நடைபெறும் நாளில், ஒவ்வொரு சுற்றின் இறுதியிலும் தேர்தல் ஆணையம் வெளியிடும் அதிகாரப்பூர்வ எண்ணிக்கையையும், வேட்பாளர்களின் முகவர்கள் வசம் இருக்கும் கணக்குகளையும் துல்லியமாகச் சரிபார்க்க வேண்டும் என்பதுதான் விஜயின் முதல் உத்தரவாக இருக்கிறது. இதில் ஒரு வாக்கு வித்தியாசப்பட்டாலும், வேட்பாளர்கள் அந்த இடத்திலேயே உடனடியாகக் கேள்வி எழுப்ப வேண்டும் என்றும், தங்களுக்குச் சாதகமாக முன்னிலை கிடைக்கும் சுற்றுகளில் எந்தவித அலட்சியமும் காட்டாமல் இறுதி முடிவு அறிவிக்கப்படும் வரை அதே தீவிரத்தோடு கண்காணிப்பைத் தொடர வேண்டும் என்றும் அவர் அறிவுறுத்தியுள்ளார். கடுமையான போட்டி நிலவும் தொகுதிகளில் மிகக் குறைந்த வாக்கு வித்தியாசத்தில் முன்னிலை மாறும்போது, அரசியல் அழுத்தங்கள் காரணமாக முடிவுகள் திசைதிருப்பப்பட வாய்ப்புள்ளதாகக் கூறப்படும் நிலையில், எக்காரணம் கொண்டும் தங்களுக்கான ஜனநாயக உரிமையை விட்டுக் கொடுத்துவிடக் கூடாது என்பதில் டிவிகே தலைமை உறுதியாக நிற்கிறது.
அண்ணா பல்கலை ஸ்ட்ராங் ரூம் சர்ச்சை: ஊழியர் அதிரடி கைது!
இதற்காகவே ஒவ்வொரு வேட்பாளருக்கும் பின்னால் 24 மணி நேரமும் செயல்படக்கூடிய, அனுபவமிக்க வழக்கறிஞர்களைக் கொண்ட சட்டப் பாதுகாப்புக் குழுவை கட்சித் தலைமை தயார் செய்துள்ளது. வாக்கு எண்ணிக்கை மையங்களில் ஏதேனும் சந்தேகத்திற்குரிய நடவடிக்கைகள் அரங்கேறினால், இந்தச் சட்டக் குழுவின் உதவியோடு உடனடியாகத் தேர்தல் அதிகாரியிடம் எழுத்துப்பூர்வமாகப் புகாரைப் பதிவு செய்ய வேண்டும் என உத்தரவிடப்பட்டுள்ளது. அங்குள்ள தேர்தல் அதிகாரி புகாரை நிராகரிக்கும் பட்சத்தில், அடுத்த சில நிமிடங்களிலேயே மேல்முறையீடு உள்ளிட்ட அடுத்தகட்ட சட்ட நடவடிக்கைகளை மேற்கொள்வதற்கான வரைபடமும் வேட்பாளர்களுக்குக் கற்பிக்கப்பட்டுள்ளது.
குறிப்பாக, வாக்குப்பதிவு நாளன்று வாக்குச் சாவடிகளில் பெறப்பட்ட ‘படிவம் 17C’ (Form 17C) ஆவணத்தை முதன்மை ஆதாரமாகப் பயன்படுத்த விஜய் அறிவுறுத்தியுள்ளார். இந்தத் தேர்தல் ஆவணத்தில் பதிவாகியுள்ள வாக்குகளின் எண்ணிக்கையும், வாக்கு எண்ணிக்கை மையத்தில் மின்னணு இயந்திரங்களில் காட்டப்படும் வாக்குகளின் எண்ணிக்கையும் நூறு சதவீதம் பொருந்துகிறதா என்பதை வேட்பாளர்கள் நேரடியாக ஒப்பிட்டுப் பார்க்க வேண்டும். வாக்கு எண்ணிக்கை மையங்களில் எழும் எத்தகைய மன அழுத்தங்களையும், மிரட்டல்களையும் எதிர்கொள்ள வேட்பாளர்கள் தங்களை உளவியல் ரீதியாகத் தயார்படுத்திக் கொள்ள வேண்டும் என்று கூறியுள்ள கட்சித் தலைமை, நியாயமான முறையில் கிடைக்கும் வெற்றியை யாரோ ஒருவரின் அழுத்தத்திற்காகப் பறி கொடுக்கக் கூடாது என்ற கடுமையான நிலைப்பாட்டைக் கொண்டுள்ளது.
