சென்னை , ஏப்ரல் 25 : தமிழ்நாட்டில் கடந்த ஏப்ரல் 23ஆம் தேதி நடந்து முடிந்த 2026 சட்டமன்ற தேர்தலில் வரலாறு காணாத வகையில் 85.15 சதவீத வாக்குகள் பதிவாகியுள்ளதாக தேர்தல் ஆணைய வட்டாரங்கள் தெரிவிக்கின்றன. இந்த அதிரடி உயர்வு அரசியல் வட்டாரங்களிலும் சமூக ஊடகங்களிலும் ஒரு பெரும் விவாத அலையை கிளப்பியுள்ளது. தமிழக வரலாற்றிலேயே மிக முதன்மையான மக்கள் பங்கேற்பு என்று ஒரு தரப்பினரும், இது வெறும் தேர்தல் ஆணையத்தின் தொழில்நுட்ப மற்றும் நிர்வாக மாற்றங்களால் விளைந்த மாயை என்று மற்றொரு தரப்பினரும் தங்களின் கருத்துகளை முன்வைத்து வருகின்றனர்.
தேர்தல் நாளன்று காலை முதலே வாக்குச்சாவடிகளில் மக்கள் கூட்டம் அலைமோதியதுடன் குடும்பம் குடும்பமாக வந்து மக்கள் வாக்களித்த காட்சிகள் தமிழகம் முழுவதும் பரவலாகக் காணப்பட்டன. குறிப்பாக முதல்முறை வாக்களிக்கும் இளைஞர்களின் வருகை மிக அதிகமாக இருந்தது. இந்த ஒட்டுமொத்த மக்கள் திரளையும் அரசியல் தலைவர்கள் ஒரு ‘மக்கள் எழுச்சி’ என்று வர்ணித்துள்ளனர். இதுகுறித்து தமிழக அரசியல் களத்தில் மிக முக்கியமான தாக்கத்தை ஏற்படுத்தியுள்ள நடிகர் மற்றும் தமிழக வெற்றிக் கழகத் தலைவர் விஜய் தனது சமூக வலைத்தளப் பக்கத்தில், இந்த அளவிலான வாக்குப்பதிவு என்பது தமிழ்நாட்டின் அரசியல் வரலாற்றில் ஒரு மிக முக்கியமான திருப்பத்தைக் குறிக்கிறது என்று பதிவிட்டுள்ளார்.
ALso : இந்திய ரயில்வேயில் ‘2% ஆட்குறைப்பு’ – 2026-27 மனிதவள மறுசீரமைப்பு ஆவணம் குறித்து எழும் கேள்விகள்
ஆனால், இந்த 85.15 சதவீத வாக்குப்பதிவு என்பது உண்மையில் ஒரு வரலாற்று சாதனையா அல்லது புள்ளிவிவரங்களின் கணக்கு விளையாட்டா என்பதை ஆழமாக ஆய்வு செய்ய வேண்டியுள்ளது. ஏனெனில், சதவீதத்தை விட உண்மையான கள நிலவரத்தை பிரதிபலிப்பது பதிவான ஒட்டுமொத்த வாக்குகளின் எண்ணிக்கை மட்டுமே.
கடந்த 2021ஆம் ஆண்டு நடைபெற்ற சட்டமன்ற தேர்தலில் தமிழ்நாட்டில் மொத்தம் 4 கோடியே 58 லட்சம் வாக்குகள் பதிவாகியிருந்தன. நடப்பு 2026 தேர்தலில் இந்த எண்ணிக்கை 4 கோடியே 88 லட்சமாக உயர்ந்துள்ளது. அதாவது கடந்த தேர்தலை விட இந்த முறை சுமார் 30 லட்சம் வாக்குகள் மட்டுமே கூடுதலாகப் பதிவாகியுள்ளன. சதவீத அளவில் இது மிகப்பெரிய குதிப்பைக் காட்டினாலும், மொத்த வாக்குகளின் எண்ணிக்கையில் எந்தவிதமான அசாதாரணமான அல்லது வியப்பூட்டும் பாய்ச்சலும் நிகழவில்லை என்பதை இந்த புள்ளிவிவரங்கள் மிகத் தெளிவாக நிரூபிக்கின்றன.
தமிழகத்தின் கடந்த கால் நூற்றாண்டு கால தேர்தல் வரலாற்றை உற்று நோக்கினால், வாக்காளர்களின் பங்கேற்பு என்பது ஒரு சீரான பாதையிலேயே உயர்ந்து வந்துள்ளதை அறியலாம். 1996ஆம் ஆண்டு தேர்தலில் 2.71 கோடியாக இருந்த மொத்த வாக்குகள், 2001இல் 2.80 கோடியாக உயர்ந்தது. அதைத்தொடர்ந்து 2006 தேர்தலில் சுமார் 50 லட்சம் வாக்குகளும், 2011இல் 45 லட்சம் வாக்குகளும், 2016இல் 64 லட்சம் வாக்குகளும் அதிகரித்தன. அதற்குப் பிந்தைய 2021 தேர்தலில் 29 லட்சம் வாக்குகளும், தற்போது 2026இல் 30 லட்சம் வாக்குகளும் அதிகரித்துள்ளன. இந்தத் தரவுகளின்படி பார்த்தால் ஒவ்வொரு தேர்தலிலும் வாக்காளர்களின் எண்ணிக்கை படிப்படியாக உயர்ந்து வருகிறதே தவிர, இந்த 2026 தேர்தல் மட்டும் ஏதோ ஒரு தனித்துவமான வாக்கு வெடிப்பை சந்திக்கவில்லை என்பது தெளிவாகிறது.
அப்படியென்றால், இந்த முறை வாக்குப்பதிவு சதவீதம் மட்டும் இவ்வளவு அதிகமாகக் காட்டப்படுவது ஏன் என்ற கேள்வி எழுகிறது. இதற்குக் முதன்மை காரணமாக முன்வைக்கப்படுவது தேர்தல் ஆணையம் மேற்கொண்ட வாக்காளர் பட்டியல் சீரமைப்புப் பணிகள்தான். அண்மையில் தேர்தல் ஆணையம் நடத்திய தீவிர வாக்காளர் பட்டியல் சரிபார்ப்பு (Special Intensive Revision) நடவடிக்கைகளின் மூலமாக, தமிழகம் முழுவதும் போலி வாக்காளர்கள், இறந்தவர்கள் மற்றும் முகவரி மாறியவர்கள் என சுமார் 74 லட்சம் வாக்காளர்கள் பட்டியலிலிருந்து அதிரடியாக நீக்கப்பட்டுள்ளனர்.
இதன் நேரடி விளைவாக, தமிழகத்தின் மொத்த வாக்காளர்களின் எண்ணிக்கை கணிசமாகக் குறைந்தது. ஒட்டுமொத்த வாக்காளர்களின் எண்ணிக்கை குறையும்போது, இயல்பாகவே பதிவாகும் வாக்குகளின் சதவீதம் மிக அதிகமாகக் காட்சியளிக்கும். சுருக்கமாகச் சொன்னால், இந்த 85.15 சதவீத உயர்வு என்பது ‘வாக்களித்தவர்களின் எண்ணிக்கை’ திடீரென பல மடங்கு பெருகியதால் ஏற்பட்டதல்ல, மாறாக ‘மொத்த வாக்காளர் பட்டியல்’ சுருக்கப்பட்டதால் உருவான ஒரு புள்ளியியல் மாற்றமே ஆகும்.
