சென்னை ,ஏப்ரல் 23 : தமிழ்நாடு சட்டமன்றத் தேர்தல் வரலாற்றில் இதுவரை இல்லாத அளவாக நடப்பு 2026 தேர்தலில் சுமார் 84.29 சதவீத வாக்குகள் பதிவாகியுள்ளதாக தேர்தல் ஆணையத்தின் அதிகாரப்பூர்வத் தகவல்கள் தெரிவிக்கின்றன .மாநிலம் முழுவதும் விறுவிறுப்பாக நடைபெற்று முடிந்த இந்த வாக்குப்பதிவு சதவீதம் தமிழக அரசியல் வரலாற்றில் மக்களின் மிக உயர்ந்த அரசியல் ஈடுபாட்டையும் தேர்தல் விழிப்புணர்வையும் அப்பட்டமாக வெளிப்படுத்தியுள்ளது .இந்த அதிரடி உயர்வு தற்போதைய அரசியல் சூழலில் பெரும் விவாதங்களை ஏற்படுத்தியுள்ள நிலையில் 1952 ஆம் ஆண்டு தொடங்கிய தமிழகத்தின் தேர்தல் வரலாற்றுப் பாதையையும் அதன் வாக்குப்பதிவு வளர்ச்சியையும் உற்று நோக்குவது அவசியமாகிறது.
இந்திய தேர்தல் ஆணையம் வெளியிட்டுள்ள கடந்த காலத் தரவுகளின்படி தமிழ்நாட்டின் வாக்குப்பதிவு சதவீதம் என்பது ஒவ்வொரு காலகட்டத்திலும் பல்வேறு அரசியல் மாற்றங்களுக்கு ஏற்ப மாறுபட்டு வந்துள்ளது .நாடு சுதந்திரம் அடைந்த பிறகு 1952 ஆம் ஆண்டில் நடத்தப்பட்ட முதலாவது சட்டமன்றத் தேர்தலில் தமிழ்நாட்டின் வாக்குப்பதிவு வெறும் 55 சதவீத அளவிலேயே சுருங்கியிருந்தது .தொடக்கக் காலத்தில் மக்களிடையே இருந்த குறைந்த அளவிலான தேர்தல் விழிப்புணர்வே இதற்கு முக்கியக் காரணமாக இருந்தது .அதன் பின்னர் அடுத்தடுத்த ஆண்டுகளில் தேர்தல் குறித்த விழிப்புணர்வு பரவலாக்கப்பட்டதை அடுத்து வாக்காளர்களின் பங்களிப்பும் படிப்படியாக உயரத் தொடங்கியது.
தமிழக அரசியல் வரலாற்றில் 1967 ஆம் ஆண்டு நடைபெற்ற சட்டமன்றத் தேர்தல் ஒரு மிக முக்கியத் திருப்புமுனையாக அமைந்தது .மாநிலத்தில் மிகப்பெரிய அரசியல் ஆட்சி மாற்றத்திற்கு வித்திட்ட அந்தத் தேர்தலில் மக்களின் எழுச்சி காரணமாக வாக்குப்பதிவு வரலாறு காணாத வகையில் சுமார் 76 சதவீதம் வரை உயர்ந்து புதிய உச்சத்தைத் தொட்டது .அதனைத் தொடர்ந்து வந்த 1980கள் மற்றும் 1990களின் காலகட்டங்களில் தமிழகத்தின் வாக்குப்பதிவு நிலைத்தன்மை இல்லாமல் அரசியல் சூழ்நிலைகளுக்கு ஏற்ப 65 சதவீதம் முதல் 75 சதவீதம் வரை ஏற்ற இறக்கங்களுடன் மாறுபட்ட நிலையில் நீடித்தது.
இருபத்தோராம் நூற்றாண்டின் தொடக்கத்திற்குப் பிறகு அதாவது 2000ஆம் ஆண்டுகளுக்குப் பின் நவீனத் தொழில்நுட்ப வளர்ச்சியால் தமிழகத்தில் வாக்குப்பதிவு சதவீதம் தொடர்ந்து ஏறுமுகத்தைக் காட்டத் தொடங்கியது .கடந்த 2011 ஆம் ஆண்டு நடைபெற்ற சட்டமன்றத் தேர்தலில் சுமார் 78 சதவீத வாக்குகள் பதிவாகின .அதனைத் தொடர்ந்து 2016 ஆம் ஆண்டு தேர்தலில் இந்த அளவு சற்று குறைந்து சுமார் 74 சதவீதமாகவும் கடந்த 2021 ஆம் ஆண்டு பொதுத்தேர்தலில் சுமார் 72.8 சதவீதமாகவும் பதிவாகியிருந்தது .இந்த வரிசையில் முந்தைய ஆண்டுகளின் புள்ளிவிவரங்களுடன் ஒப்பிட்டுப் பார்க்கும்போது நடப்பு 2026 தேர்தலில் பதிவாகியுள்ள 84.29 சதவீத வாக்குப்பதிவு என்பது தமிழக தேர்தல் வரலாற்றிலேயே மிக உயர்ந்த ஒரு வரலாற்று சாதனையாகக் கருதப்படுகிறது.
நடப்புத் தேர்தலில் வாக்குப்பதிவு இந்த அளவிற்கு அசுர வளர்ச்சி அடைந்ததற்குப் பின்னால் பல்வேறு முக்கியக் காரணங்கள் இருப்பதாக அரசியல் அரங்கில் உற்றுநோக்கப்படுகிறது .இதில் முதன்மைக் காரணியாகப் பார்க்கப்படுவது இந்தத் தேர்தலில் நிலவிய கடுமையான அரசியல் போட்டிதான் .ஆளுங்கட்சியான திமுக மற்றும் பிரதான எதிர்க்கட்சியான அதிமுக உள்ளிட்ட கூட்டணிகளுக்கு இடையேயான நேரடிப் போட்டிக்கு மத்தியில் தமிழக அரசியல் களம் புதிய திருப்பங்களைக் கண்டது .குறிப்பாகத் தமிழக அரசியல் தளத்தில் வளர்ந்து வரும் கட்சிகளான தமிழக வெற்றிக் கழகம் (TVK) மற்றும் நாம் தமிழர் கட்சி (NTK) போன்ற மாற்று சக்திகளின் தீவிரக் களப்பணியும் பிரச்சாரமும் முன்னெப்போதும் இல்லாத வகையில் வாக்காளர்களை வாக்குச்சாவடிகளை நோக்கி பெருமளவில் ஈர்த்துள்ளன.
இதனுடன் முதல்முறை வாக்களிக்கும் இளம் வாக்காளர்களின் எண்ணிக்கையில் ஏற்பட்டுள்ள அபரிமிதமான அதிகரிப்பு இந்த வாக்குச் சதவீத உயர்வுக்குப் பலம் சேர்த்துள்ளது .இன்றைய இளைஞர்கள் மத்தியில் ஏற்பட்டுள்ள டிஜிட்டல் மற்றும் சமூக ஊடக விழிப்புணர்வுப் பிரச்சாரங்கள் அரசியல் குறித்த புரிதலை மேம்படுத்தி வாக்களிப்பதன் அவசியத்தை அவர்களிடம் கொண்டு சேர்த்துள்ளன .எல்லாவற்றிற்கும் மேலாகத் தமிழ்நாட்டில் பெண் வாக்காளர்களின் எண்ணிக்கை மற்றும் அவர்களின் தீவிரப் பங்களிப்பு இந்த முறையும் வாக்குப்பதிவில் மிக முக்கியப் பங்காற்றி முன்னிலை வகிக்கச் செய்துள்ளது.
இந்த வாக்குப்பதிவு உயர்வு என்பது குறிப்பிட்ட சில பகுதிகளோடு நின்றுவிடாமல் மாவட்ட வாரியாக ஒட்டுமொத்தத் தாக்கத்தை ஏற்படுத்தியுள்ளது .சென்னை,கோயம்புத்தூர்,மதுரை,திருச்சி போன்ற முக்கியப் பெருநகரப் பகுதிகளிலும் அதன் புறநகர்ப் பகுதிகளிலும் வாக்குப்பதிவு சீரான வளர்ச்சியைப் பதிவு செய்துள்ளது .நகர்ப்புறங்களைக் காட்டிலும் மாநிலத்தின் கிராமப்புறப் பகுதிகளில் வழக்கம்போல மிக அதிக அளவிலான வாக்குகள் பதிவாகியுள்ளதாக அதிகாரப்பூர்வத் தகவல்கள் வழி தெரியவந்துள்ளது .கிராமப்புற மக்களிடையே சமூக மற்றும் அரசியல் விழிப்புணர்வு பரவலாக உயர்ந்துள்ளதையே இந்தத் தரவுகள் உறுதிப்படுத்துகின்றன.
தேர்தல் களத்தில் பதிவாகியுள்ள இந்த 84 சதவீதத்திற்கும் அதிகமான வாக்குப்பதிவு வரும் தேர்தல் முடிவுகளில் மிகப்பெரிய உத்தேச மாற்றங்களை அல்லது எதிர்பாராத திருப்பங்களை ஏற்படுத்தக்கூடிய வல்லமை கொண்டது என அரசியல் ஆய்வாளர்கள் கருதுகின்றனர் .பொதுவாக இத்தகைய மிக அதிக வாக்குப்பதிவு என்பது தற்போதைய ஆட்சிக்கு எதிரான அதிருப்தியையும் மாற்றத்திற்கான மக்களின் மனநிலையையும் குறிக்கும் என்பது ஒரு பொதுவான விதியாகப் பார்க்கப்படுகிறது .ஆனால் அதே வேளையில் தமிழ்நாட்டைப் பொறுத்தவரை இது வாக்காளர்கள் தங்களுடைய கட்சி அடிப்படையிலான உறுதியான ஆதரவையும் நிலைப்பாட்டையும் வெளிப்படுத்தியதற்கான சான்றாகவும் இருக்கக்கூடும் என்றும் ஆய்வாளர்கள் சுட்டிக்காட்டுகின்றனர்.
எனவே இந்த வாக்குப்பதிவு உயர்வு மாநிலத்தில் தற்போதைய ஆளுங்கட்சியின் ஆட்சி தொடருமா அல்லது புதியதொரு ஆட்சி மாற்றம் ஏற்படுமா என்பதைத் தீர்மானிக்கும் முதன்மைக் காரணியாக மாறியுள்ளது .மேலும் தற்போதைய பன்முனைப் போட்டியில் கூட்டணிகளின் பலம் மற்றும் பலவீனம் எந்த அளவிற்கு மக்கள் மத்தியில் தாக்கம் செலுத்தியுள்ளது என்பதைக் கண்டறிவதற்கான முக்கியக் குறியீடாகவும் இது பார்க்கப்படுகிறது.
