சென்னை , ஏப்ரல் 11 : தமிழக அரசியல் களம் அடுத்தகட்டத் தேர்தல்களை நோக்கி நகர்ந்து வரும் சூழலில், திமுக தலைவர் மற்றும் முதலமைச்சர் மு.க.ஸ்டாலின் வெளியிட்டுள்ள கருத்து அரசியல் வட்டாரங்களில் புதிய விவாதத்தைக் கிளப்பியுள்ளது. “எத்தனை பேர் பிரிந்து வந்தாலும், புதிய கூட்டணிகள் அமைத்தாலும் திமுக கூட்டணியின் வெற்றியை யாராலும் தடுக்க முடியாது” என்று அவர் தனது சமீபத்திய பேட்டியில் மிக உறுதியாகத் தெரிவித்துள்ளார். எதிர்க்கட்சிகள் தங்களுக்கு எதிராகப் புதிய வியூகங்களை வகுத்து வரும் நிலையில், அதற்குப் பதிலடி கொடுக்கும் வகையில் முதலமைச்சரின் இந்த அதிரடி நம்பிக்கை வெளிப்பட்டுள்ளது.
கடந்த சில மாதங்களாகவே தமிழக அரசியலில் எதிர்க்கட்சிகள் ஓரணியில் திரள்வதற்கான முயற்சிகளும், புதிய அரசியல் சேர்க்கைகளுக்கான பேச்சுவார்த்தைகளும் தீவிரமடைந்து வருகின்றன. இந்தச் சூழலில் வெளியாகியுள்ள முதலமைச்சரின் நேர்காணல், திமுக தலைமையின் அரசியல் தந்திரத்தையும் அவர்களின் எதிர்காலத் தேர்தல் திட்டங்களையும் மிகத் தெளிவாகப் பிரதிபலிக்கிறது. சவால்கள் எதையும் எதிர்கொள்ளத் தயாராகவே இருக்கிறோம் என்பதை ஆளும் தரப்பு இதன் மூலம் வெளிபடுத்தியுள்ளனர்.
கன்னியாகுமரியில் தவெக தலைவர் விஜய் தேர்தல் பரப்புரை: 6 மணி நேரம் மட்டுமே அனுமதி
‘ஜனநாயகன்’ படக் கசிவு: சினிமாத்துறையின் ஒட்டுமொத்த தோல்வி என விஜய் தேவரகொண்டா சாடல்
தங்கள் கூட்டணியின் அசைக்க முடியாத பலத்திற்குத் தற்போதைய அரசு செயல்படுத்தி வரும் மக்கள் நலத்திட்டங்களே முதன்மைக் காரணம் என்று மு.க.ஸ்டாலின் சுட்டிக்காட்டியுள்ளார். சமூக நீதி, கல்விப் புரட்சி, மருத்துவக் கட்டமைப்பு மேம்பாடு மற்றும் பெண்களின் பொருளாதார முன்னேற்றத்திற்காகத் தங்களின் திராவிட மாடல் அரசு எடுத்துள்ள தொடர் நடவடிக்கைகள் அடிமட்ட மக்கள் வரை நல்ல வரவேற்பைப் பெற்றுள்ளதாக அவர் பெருமிதத்துடன் குறிப்பிட்டுள்ளார். மக்கள் மையப்படுத்திய இந்த ஆட்சியே தங்களின் ஆகச்சிறந்த தேர்தல் பிரச்சாரமாக மாறும் என்பதும் அவரது பேச்சில் வெளிப்பட்டது.
தேர்தல் நேரங்களில் எதிர்க்கட்சிகள் தங்களுக்குள் கூட்டணி அமைத்துக் கொள்வது என்பது அரசியல் ரீதியாக மிகவும் சாதாரணமான ஒரு நிகழ்வுதான் என்று குறிப்பிட்ட முதலமைச்சர், இறுதியில் மக்களின் உண்மையான நம்பிக்கை மட்டுமே தேர்தல் வெற்றியைத் தீர்மானிக்கும் முக்கிய காரணியாக மாறும் என்று விவரித்தார். தமிழக மக்களின் முழுமையான ஆதரவும் நன்மதிப்பும் தற்போதைய அரசுக்கு உறுதியாக இருப்பதால், தங்களுக்கு எதிராக யார் எந்தக் கூட்டணியை உருவாக்கினாலும் அதன் மூலம் தங்களின் வாக்கு வங்கியைச் சிதைக்க முடியாது என்ற அரசியல் கணக்கையும் அவர் முன்வைத்துள்ளார்.
