சினிமா அப்டேட் : அரசியல் நையாண்டித் திரைப்படமாக உருவகப்படுத்தப்படும் “TN 2026” என்ற படத்தின் வெளியீட்டை வரும் சட்டமன்றத் தேர்தல் முடியும் வரை தற்காலிகமாக நிறுத்தி வைக்க உத்தரவிடக் கோரி சென்னை உயர் நீதிமன்றத்தில் பொதுநல வழக்கு தாக்கல் செய்யப்பட்டுள்ளது.
தேசிய மக்கள் சக்தி கட்சியின் தலைவர் எம்.எல். ரவி தனது மனுவில் , சட்டமன்றத் தேர்தல் விதிகள் அமலில் இருக்கும் சூழலில் இந்தத் திரைப்படம் திரையரங்குகளிலோ அல்லது ஓடிடி தளங்களிலோ வெளியாவது வாக்காளர்களின் மனநிலையில் தாக்கத்தை ஏற்படுத்தக்கூடும் என்று தாக்கல் செய்துள்ளார். தமிழகத் தலைமைத் தேர்தல் அதிகாரி உடனடியாகத் தலையிட்டு இந்தப் படத்தின் வெளியீட்டைத் தற்காலிகமாகத் தடுத்து நிறுத்த வேண்டும் என்று அந்த மனுவில் கூறியுள்ளார் .
Also : தூத்துக்குடி பாலியல் வழக்கு: ஜாமீன் ரத்து – நீதிமன்றத்தின் கடும் நடவடிக்கை
இந்தப் படத்தின் பின்னணியில் இருக்கும் அரசியல் விவாதங்களுக்குக் காரணம் அண்மையில் வெளியான “TN 2026” திரைப்படத்தின் டீசர் ஆகும். இதில் நடிகர் நடராஜ் (எ) நட்டி ஏற்று நடித்துள்ள கதாப்பாத்திரத்தின் தோற்றமும் வசனங்களும் நடிகர் விஜய்யின் அரசியல் பாணியை அச்சு அசலாகப் பிரதிபலிப்பது போல் இருப்பதாக விவாதங்கள் கிளம்பின. ஒரு தரப்பினர் இதனைச் சமகால அரசியல் சூழலை விமர்சிக்கும் ஒரு சாதாரண அரசியல் நையாண்டித் திரைப்படம் என்று கடந்து சென்றாலும் மற்றொரு தரப்பினர் இது திட்டமிட்டே விஜய்யின் அரசியல் பிம்பத்தை மேலும் வலுப்படுத்துவதற்காக எடுக்கப்பட்ட முயற்சி என்று குற்றம் சாட்டுகின்றனர்.
இந்த ஒட்டுமொத்த விவாதத்தின் மையப்புள்ளியாக நடிகர் விஜய் மற்றும் அவரது தமிழக வெற்றிக் கழகம் (TVK) கட்சி தற்போது எதிர்கொண்டு வரும் அரசியல் சூழல் அமைந்துள்ளது. விஜய் நடிப்பில் உருவான ‘ஜனநாயகன்’ (Jana Nayagan) திரைப்படம் ஏற்கனவே பல்வேறு சென்சார் மற்றும் சட்டச் சிக்கல்களால் வெளியீட்டுத் தாமதத்தை எதிர்கொண்டு வருகிறது. தேர்தல் நடத்தை விதிகள் மற்றும் அரசியல் காரணங்களால் ‘ஜனநாயகன்’ படத்திற்கு சென்சார் சான்றிதழ் (CBFC) வழங்குவது தள்ளிப்போடப்பட்டு இந்த விவகாரம் நீதிமன்றம் வரை சென்றுள்ளது.
இந்நிலையில் விஜய் மற்றும் அவரது கட்சி நேரடியாகத் தேர்தல் களத்தில் இருக்கும்போது அவரது படத்திற்கு ஒரு குறிப்பிட்ட அளவுகோலைப் பயன்படுத்தும் தேர்தல் ஆணையமும் தணிக்கைத் துறையும் அதே போன்ற சமகால அரசியல் குறிப்புகள் நிறைந்த “TN 2026” திரைப்படத்திற்கு மட்டும் எப்படி தணிக்கைச் சான்றிதழ் வழங்கி வெளியிட அனுமதித்தது என்பது மனுதாரரின் கேள்வியாக உள்ளது. ‘ஜனநாயகன்’ திரைப்படத்திற்குப் பயன்படுத்தப்பட்ட அதே கண்டிப்பான விதிமுறைகளையும் அளவுகோல்களையும் “TN 2026” திரைப்படத்திற்கும் சமமாகப் பயன்படுத்த வேண்டும் என்று மனுதாரர் தன் பிரமாணப் பத்திரத்தில் சுட்டிக்காட்டியுள்ளார்.
இந்த வழக்கு வெறும் ஒரு திரைப்படத்தின் வெளியீடு தொடர்பானது மட்டுமல்லாமல் இந்திய அரசியலமைப்புச் சட்டம் வழங்கியுள்ள கலைச் சுதந்திரம் மற்றும் தேர்தல் ஆணையத்தின் வழிகாட்டுதலின்படி நடத்தப்பட வேண்டிய நியாயமான சுதந்திரமான தேர்தல் ஆகிய இரண்டுக்கும் இடைப்பட்ட ஒரு மெல்லிய கோட்டைப் பற்றிய விவாதமாக உருவெடுத்துள்ளது. ஒரு திரைப்படம் வாக்காளர்களின் சுதந்திரமான முடிவில் எந்த அளவிற்குத் தாக்கத்தை ஏற்படுத்தும் என்ற சமூகக் கேள்வியையும் இது எழுப்பியுள்ளது.
இந்தப் படம் பற்றிய விவாதங்கள் தீவிரமடைந்து வரும் நிலையில் மதராஸ் உயர் நீதிமன்றம் இந்த பொதுநல வழக்கில் எடுக்கப்போகும் முடிவு மற்றும் வழங்கப்போகும் தீர்ப்பு என்னவாக இருக்கும் என்பதை ஒட்டுமொத்த தமிழகமும் உற்று நோக்கத் தொடங்கியுள்ளது.
