ஓசூர் , ஜூன் 5: மண்ணின் வளத்தை மீட்டெடுக்கவும் நதிகளுக்குப் புத்துயிர் ஊட்டவும் மரம் சார்ந்த விவசாயத்தை வலியுறுத்தி ஈஷா யோகா அமைப்பின் காவேரி கூக்குரல் இயக்கம் சார்பில் உலக சுற்றுச்சூழல் தினத்தை முன்னிட்டு ஓசூரில் மரக்கன்றுகள் நடவு செய்யும் பெருந்திட்டத் தொடக்க விழா நடைபெற்றது.நடப்பு நிதியாண்டில் மட்டும் தமிழ்நாடு மற்றும் கர்நாடகாவில் ஒட்டுமொத்தமாக 1.2 கோடி மரக்கன்றுகளை நடவு செய்ய இலக்கு நிர்ணயிக்கப்பட்டு, அதன் தொடக்கப் புள்ளியாக கிருஷ்ணகிரி மாவட்டம் ஓசூரில் உள்ள ஓக்ரிச் இன்டர்நேஷனல் பள்ளியில் இந்நிகழ்ச்சி ஒருங்கிணைக்கப்பட்டது.
ஆண்டுதோறும் ஜூன் மாதம் 5 ஆம் தேதி உலக சுற்றுச்சூழல் தினம் கடைபிடிக்கப்பட்டு வரும் சூழலில் உலகளாவிய காலநிலை மாற்ற எதிர்கொள்ளல் மற்றும் உள்ளூர் சுற்றுச்சூழல் பாதுகாப்பு ஆகியவற்றை மையமாகக் கொண்டு பல்வேறு விழிப்புணர்வு நடவடிக்கைகள் முன்னெடுக்கப்படுகின்றன.அந்த வகையில் கடந்த பல ஆண்டுகளாக மண்ணின் தரத்தையும் நதிப் படுகைகளின் நிலத்தடி நீர்மட்டத்தையும் உயர்த்துவதற்காகக் காவேரி கூக்குரல் இயக்கம் களப்பணியாற்றி வருகிறது.இதுவரை இவ்வியக்கத்தின் மூலமாகப் பொதுமக்கள் மற்றும் விவசாயிகளின் பங்களிப்புடன் 13.4 கோடி மரங்கள் வெற்றிகரமாக நடவு செய்யப்பட்டுள்ள நிலையில், தற்போது இந்த ஆண்டிற்கான புதிய இலக்காக 1.2 கோடி மரங்கள் என்ற இலக்கு நிர்ணயிக்கப்பட்டு பணிகள் முறைப்படி தொடங்கப்பட்டுள்ளன.
ஓசூர் ஓக்ரிச் இன்டர்நேஷனல் பள்ளியில் நடைபெற்ற இதன் தொடக்க விழாவின் முதலாவது அமர்வாக அறிமுக நிகழ்வு நடைபெற்றது.இதில் காவேரி கூக்குரல் இயக்கத்தின் களத் தன்னார்வலர்களான ராமலிங்கம், கஜேந்திரன் மற்றும் ரவி ஆகியோர் கலந்துகொண்டனர்.அவர்கள் இயற்கை வேளாண்மை மற்றும் மரம் சார்ந்த விவசாயத்தின் அவசியம் குறித்தும் நதிநீர் மேலாண்மையில் மரங்களின் பங்களிப்பு குறித்தும் மாணவர்களுக்குப் புள்ளிவிவரங்களுடன் கூடிய காணொளி காட்சி மூலம் விரிவாக விளக்கமளித்தனர்.
தேரழுந்தூர் ஆமருவியப்பன் கோயில் வைகாசி திருத்தேரோட்டம் விமரிசை!
தொடர்ந்து நடைபெற்ற முதன்மை அமர்வில் பள்ளியின் தாளாளர் டாக்டர் லட்சுமிபதி பங்கேற்றுப் பேசுகையில், தற்போதைய காலகட்டத்தில் தூய்மையான குடிநீரைக் காசு கொடுத்து பாட்டில்களில் வாங்கும் நிலைக்கு மனித சமூகம் தள்ளப்பட்டிருப்பதைச் சுட்டிக்காட்டினார்.மேலும் இயற்கை வளங்களைத் தொடர்ந்து அழித்து போதிய அளவில் மரங்களை வளர்க்கத் தவறினால் வருங்காலத்தில் மனிதர்கள் சுவாசிப்பதற்கான ஆக்சிஜன் காற்றைக் கூட சிலிண்டர்களிலும் பாட்டில்களிலும் அடைத்துத் தோளில் சுமந்து செல்லும் அவலம் நேரிடலாம் என்றும் அவர் எச்சரித்தார்.எனவே மாணவப் பருவத்திலிருந்தே இயற்கை வளத்தைப் பாதுகாக்க விழிப்புணர்வுடன் செயல்பட வேண்டும் என்று கேட்டுக்கொண்ட அவர் வீணாகக் கீழே ஊற்றப்படும் தண்ணீரைச் சேகரித்து மரம், செடி, கொடிகளுக்குப் பாய்ச்சி இயற்கையை அரணாகக் காக்க வேண்டும் என வலியுறுத்தினார்.
Also : நெல்லை களக்காடு அருகே போலி ஆவணம் மூலம் நில மோசடி: இருவர் மீது வழக்கு
நெல்லையில் ரூ.30 லட்சம் வீட்டு மனை மோசடி: 4 பேர் மீது குற்றப்பிரிவு போலீசார் வழக்கு
இதனைத் தொடர்ந்து பேசிய பள்ளியின் முதல்வர் திருமதி சுமா யாதவ், காவேரி கூக்குரல் என்பது வெறும் ஒரு சுற்றுச்சூழல் இயக்கத்தின் பெயரல்ல என்றும், அது காவேரி ஆறு தன்னைத் தன் அழிவிலிருந்து காப்பாற்றும்படி மனிதர்களிடம் எழுப்பும் அபயக் குரல் என்றும் குறிப்பிட்டார்.மனித குலத்தின் முதன்மை வாழ்வாதாரமான நதியைப் பாதுகாக்க நாம் ஒவ்வொருவரும் உறுதியேற்க வேண்டும் எனக் கேட்டுக்கொண்ட அவர் அதற்கு ஒரே தீர்வு நதிக்கரைகளிலும் அதைச் சுற்றியுள்ள நிலப்பகுதிகளிலும் தடையின்றி ஏராளமான மரங்களை நட்டு இயற்கையை அரவணைப்பதுதான் என்றும் தெரிவித்தார்.
சுற்றுச்சூழல் தினத்தில் அடையாள பூர்வமாக வெறும் மரங்களை நடுவதோடு நின்றுவிடாமல் விவசாயிகளின் வாழ்வாதாரத்தை நிலையான பொருளாதார ரீதியாக உயர்த்தும் ‘மரம் சார்ந்த விவசாயம்’ (Agroforestry) என்ற உன்னத நோக்கத்தை இவ்வியக்கம் முதன்மையாக முன்னெடுத்துள்ளது.இதன் மூலம் நிலத்தில் கரிமச் சத்து கூடி மண் வளம் காக்கப்படும், நிலத்தடி நீர் மட்டம் கணிசமாக உயர்ந்து நதிகள் புத்துயிர் பெறும், அதே வேளையில் நீண்ட காலப் பயிர்கள் மூலம் விவசாயிகளுக்கும் கூடுதல் பொருளாதார லாபம் நேரடியாகக் கிடைக்கும் என இயக்கத்தின் தன்னார்வலர்கள் தரப்பில் விரிவாக எடுத்துரைக்கப்பட்டது.
இயற்கையை இன்று நாம் பாதுகாத்தால் மட்டுமே வருங்காலத் தலைமுறைக்கு வளம் குன்றாததொரு பூமியைப் பரிசாக அளிக்க முடியும் என்பதை உணர்த்தும் வகையில் ஓசூர் பள்ளி மாணவர்கள் தங்களின் கைகளால் பள்ளி வளாகத்தில் மரக்கன்றுகளை நட்டு உலக சுற்றுச்சூழல் தின உறுதிமொழியை ஏற்றுக்கொண்டனர்.
