“தாய்மார்களுக்கான பாலூட்டும் அறையா அல்லது குடிகாரர்களின் தங்கும் இடமா?” தேனி பேருந்து நிலையத்தில் பரபரப்பு

தேனி மாவட்டம் : தேனி புதிய பேருந்து நிலையத்தில், வெளியூர்களுக்குப் பயணம் மேற்கொள்ளும் தாய்மார்களின் வசதிக்காக அமைக்கப்பட்ட ‘பாலூட்டும் அறை’ முறையான பராமரிப்பின்றி வீணாகி வருவதோடு, சமூக விரோதிகளின் கூடாரமாக மாறி இருப்பதாகப் பொதுமக்கள் குற்றம் சாட்டியுள்ளனர். இதனால், கைக் குழந்தைகளுடன் வரும் பெண்கள் கடும் அவதிக்குள்ளாகி வரும் சூழலில், மாவட்ட நிர்வாகம் உடனடியாக தலையிட்டு நடவடிக்கை எடுக்க கோரி தாய்மார்கள் கோரிக்கை…

கடந்த 2015-16 ஆம் நிதியாண்டில், அப்போதைய அதிமுக ஆட்சிக் காலத்தில், மறைந்த முன்னாள் முதலமைச்சர் ஜெயலலிதாவின் உத்தரவின்படி, தமிழகத்தில் உள்ள அனைத்து முக்கிய பேருந்து நிலையங்களிலும் ‘தாய்மார்களுக்கான பாலூட்டும் அறைகள்’ பிரத்யேகமாகத் திறந்து வைக்கப்பட்டன. வேலைக்குச் செல்லும் பெண்கள் மற்றும் வெளியூர்களுக்குப் பயணம் மேற்கொள்ளும் தாய்மார்கள், பேருந்து நிலையங்களில் நீண்ட நேரம் காத்திருக்க நேரிடும் போது, தங்களது குழந்தைகளுக்கு எவ்விதத் தயக்கமும் இன்றி, பாதுகாப்பான சூழலில் பாலூட்டுவதற்காக இத்திட்டம் கொண்டு வரப்பட்டது. பொதுவெளியில் தர்மசங்கடத்தை எதிர்கொள்ளும் தாய்மார்களுக்கு இத்திட்டம் ஒரு பெரும் வரப்பிரசாதமாகப் பார்க்கப்பட்டது.

ஆனால், தொடக்கக் காலத்தில் சிறப்பாகச் செயல்பட்டு வந்த இத்திட்டம், காலப்போக்கில் அதிகாரிகளின் அலட்சியத்தால் தேனி புதிய பேருந்து நிலையத்தில் முற்றிலும் முடங்கிப் போயுள்ளது. கடந்த சில ஆண்டுகளாக இந்த அறை முறையாகப் பராமரிக்கப்படாமல் கைவிடப்பட்டுள்ளது. இதனால், சுவர்களில் பெரிய அளவில் விரிசல்கள் ஏற்பட்டு, கட்டடமே சிதிலமடையும் நிலைக்குத் தள்ளப்பட்டுள்ளது.

அறையின் கதவுகள் உடைந்து, தூசிகள் மண்டிப் போய்க் காட்சியளிப்பதால், குழந்தைகளுடன் உள்ளே நுழையவே அச்சப்படும் சூழல் நிலவுகிறது. தூய்மையற்ற சூழல் காரணமாகக் குழந்தைகளுக்குப் தொற்றுநோய் பரவும் அபாயமும் ஏற்பட்டுள்ளது.

“பெயரளவில் மட்டுமே அறை இருக்கிறது. உள்ளே செல்லவே பயமாக இருக்கிறது. குழந்தைக்குப் பசி என்று அழும்போது எங்குச் செல்வது என்று தெரியாமல் பேருந்து நிலையத்தின் மூலையிலோ அல்லது மறைவிடங்களையோ தேட வேண்டிய அவலநிலை உள்ளது” என்று வேதனையோடு குறிப்பிடுகிறார் திண்டுக்கல்லுக்குப் பயணம் செய்யக் காத்திருந்த தாய்.

பகலில் பூட்டிக் கிடக்கும் இந்த அறை, இரவு நேரங்களில் சமூக விரோதிகளின் புகலிடமாக மாறி வருவதாகப் பேருந்து நிலையப் பயணிகள் மற்றும் வியாபாரிகள் தரப்பில் அதிர்ச்சிகரமான புகார்கள் எழுந்துள்ளன. போதிய பாதுகாப்புக் காவலர்கள் இல்லாத சூழலைப் பயன்படுத்திக் கொள்ளும் சில மதுப்பிரியர்கள், நள்ளிரவில் இந்த அறைக்குள்ளும், இதன் அருகாமையிலும் அமர்ந்து மது அருந்துவதை வழக்கமாகக் கொண்டுள்ளனர்.

மதுக் குப்பைகளும், பிளாஸ்டிக் கழிவுகளும் இந்த அறையின் அருகே சிதறிக் கிடக்கின்றன. இதனால் பேருந்து நிலையத்திற்கு இரவில் வரும் பெண் பயணிகளுக்குப் பாதுகாப்பற்ற ஒரு சூழல் உருவாகியுள்ளது.

தாய்மார்களின் கோரிக்கை

தேனி மாவட்டம் வழியாக நாள்தோறும் மதுரை, திண்டுக்கல், கம்பம், போடி மற்றும் கேரள எல்லைப் பகுதிகளுக்கு ஆயிரக்கணக்கான பயணிகள் தங்களின் குழந்தைகளுடன் வந்து செல்கின்றனர். பேருந்துகள் தாமதமாகும் போதோ அல்லது இணைப்புப் பேருந்துகளுக்காகக் காத்திருக்கும் போதோ, தாய்மார்கள் தங்களின் பச்சிளம் குழந்தைகளை வைத்துக் கொண்டு உட்காரக் கூட இடமில்லாமல் தவித்து வருகின்றனர்.

இது குறித்துப் பேசிய உள்ளூர் சமூக ஆர்வலர்கள், “பெண்களின் நலனுக்காகக் கொண்டு வரப்பட்ட மிக உன்னதமான ஒரு திட்டம், அதிகாரிகளின் அலட்சியத்தால் தேனி பேருந்து நிலையத்தில் சீரழிந்து கிடப்பது வருத்தமளிக்கிறது. இது வெறும் கட்டடப் பராமரிப்புச் சார்ந்த பிரச்சனை மட்டுமல்ல, பெண்களின் கண்ணியம் மற்றும் பாதுகாப்புச் சார்ந்தது” என்று சுட்டிக்காட்டுகின்றனர்.

எனவே, தேனி புதிய பேருந்து நிலையத்தில் சிதிலமடைந்துள்ள தாய்மார்கள் பாலூட்டும் அறையை உடனடியாகச் சீரமைத்து, அதற்குப் போதிய மின்வசதி மற்றும் குடிநீர் வசதிகளை ஏற்படுத்தித் தர வேண்டும் எனப் பொதுமக்கள் வலியுறுத்தியுள்ளனர். மேலும், தேனி மாவட்டத்தில் உள்ள மற்ற சிறிய மற்றும் நடுத்தர பேருந்து நிலையங்களிலும் இத்தகைய பாலூட்டும் அறைகளைத் திறந்து, அவற்றை முறையாகப் பராமரிக்க மாவட்ட நிர்வாகமும், உள்ளாட்சி அமைப்புகளும் போர்க்கால அடிப்படையில் நடவடிக்கை எடுக்க வேண்டும் என்பதே ஒட்டுமொத்த தாய்மார்களின் கோரிக்கையாக உள்ளது