பாபநாசம் தாமிரபரணியில் துணி வீசியவர்கள் மீது வழக்கு.. போலீஸ் அதிரடி

நெல்லை, May 26 : தாமிரபரணி ஆற்றைப் பாதுகாக்கும் நோக்கில், பாபநாசம் ஆற்றுப் பகுதியில் துணிகளை வீசிச் சென்றவர்கள் மீது விக்கிரமசிங்கபுரம் காவல்துறையினர் வழக்குப்பதிவு செய்துள்ளனர். மாவட்ட நிர்வாகத்தின் இந்த அதிரடி நடவடிக்கை, ஆற்றின் தூய்மைக்காகப் பல ஆண்டுகளாகப் போராடி வரும் சமூக ஆர்வலர்கள் மத்தியில் பெரும் வரவேற்பைப் பெற்றுள்ளது.

நெல்லை மாவட்டம் பாபநாசத்தில் அமைந்துள்ள பிரசித்தி பெற்ற அருள்மிகு பாபநாசநாதர் சுவாமி திருக்கோயிலுக்கு நாள்தோறும் ஆயிரக்கணக்கான பக்தர்கள் வந்து செல்கின்றனர். இங்கு வரும் பக்தர்கள், தங்களின் பாவங்கள் நீங்குவதாகக் கருதி, கோயிலின் எதிரே ஓடும் தாமிரபரணி ஆற்றில் குளித்துவிட்டு, தாங்கள் உடுத்தியிருந்த பழைய துணிகளை ஆற்றிலேயே வீசிச் செல்வதை வழக்கமாகக் கொண்டுள்ளனர்.

Also Read : “தவெக ஆட்சியை கவிழ்க்க இடமளிக்க மாட்டோம்” – கோவையில் திருமாவளவன் பேட்டி

டன் கணக்கில் குவிந்த துணிகள்

தற்போது கோடைக் காலம் என்பதால் தாமிரபரணி ஆற்றில் நீரோட்டம் கணிசமாகக் குறைந்துள்ளது. ஆற்றில் நீர்வரத்து குறைந்த இந்தச் சூழலைப் பயன்படுத்தி, ஆற்றங்கரைப் பகுதியைத் தூய்மைப்படுத்த தன்னார்வலர்களும் மாவட்ட நிர்வாகமும் கைகோர்த்தன. கடந்த சில நாட்களாக மேற்கொள்ளப்பட்ட தீவிர தூய்மைப் பணியின் விளைவாக, ஆற்றிலிருந்து டன் கணக்கில் பழைய துணிகளும் குப்பைகளும் அகற்றப்பட்டன. புனித நதியாகக் கருதப்படும் தாமிரபரணியின் தற்போதைய அவல நிலை சுற்றுச்சூழல் ஆர்வலர்களை அதிர்ச்சியில் ஆழ்த்தியது.

ஆற்றின் மாசுபாட்டைத் தடுக்க நிரந்தரத் தீர்வு காண வேண்டும் என்ற கோரிக்கை எழுந்ததைத் தொடர்ந்து, நெல்லை மாவட்ட ஆட்சியர் சுகுமார் பாபநாசம் ஆற்றுப் பகுதியில் நேரில் ஆய்வு நடத்தினார். அப்போது, ஆற்றில் துணிகள் மற்றும் பிளாஸ்டிக் கழிவுகளைக் கொட்டுபவர்கள் மீது கடுமையான அபராதம் விதிக்கவும், எச்சரிக்கையை மீறிச் செயல்படுபவர்கள் மீது சட்டப்படி வழக்குப்பதிவு செய்யவும் அவர் அதிகாரிகளுக்கு அதிரடி உத்தரவு பிறப்பித்தார்.

சமூக வலைதள வீடியோவும் போலீஸ் நடவடிக்கையும்

இந்நிலையில், பாபநாசம் தாமிரபரணி ஆற்றில் சிலர் பொறுப்பற்ற முறையில் துணிகளை வீசிச் செல்லும் வீடியோ காட்சிகள் சமூக வலைதளங்களில் வெளியாகிப் பரவின. சுற்றுச்சூழல் ஆர்வலர்கள் மற்றும் பொதுமக்களிடையே இந்த வீடியோ பெரும் விவாதத்தை ஏற்படுத்திய நிலையில், மாவட்ட நிர்வாகத்தின் அறிவுறுத்தலின்படி விக்கிரமசிங்கபுரம் காவல்துறையினர் உடனடியாகச் களத்தில் இறங்கினர்.

ஆற்றில் துணிகளை வீசி மாசடையச் செய்த நபர்கள் மீது, பெயர் குறிப்பிடாமல் (Unknown persons) விக்கிரமசிங்கபுரம் காவல் நிலைய ஆய்வாளர் பாஸ்கரன் அளித்த புகாரின் அடிப்படையில் இன்று அதிரடியாக வழக்குப்பதிவு செய்யப்பட்டுள்ளது.

பாரதிய நியாய சன்ஹிதா (BNS) சட்டப் பிரிவுகள் 271, 279 மற்றும் 292 ஆகிய மூன்று பிரிவுகளின் கீழ் இந்த வழக்கு பதியப்பட்டுள்ளது. பொதுமக்களுக்கு இடையூறு விளைவித்தல், பொது சுகாதாரத்திற்குக் கேடு விளைவித்தல் மற்றும் ஆற்றின் தூய்மையைக் கெடுத்தல் ஆகிய காரணங்களுக்காக இந்த நடவடிக்கை எடுக்கப்பட்டுள்ளதாகக் காவல்துறை தரப்பில் தெரிவிக்கப்பட்டுள்ளது.

தாமிரபரணி ஆற்றில் பல ஆண்டுகளாகவே இது போன்ற கழிவுகளும் துணிகளும் கொட்டப்பட்டு வருகின்றன. வற்றாத ஜீவநதியாக விளங்கும் இந்த ஆற்றைக் காக்க வேண்டும் என்றும், துணிகளைக் கொட்டுபவர்கள் மீது கடுமையான சட்ட நடவடிக்கை எடுக்க வேண்டும் என்றும் உள்ளூர் தன்னார்வ அமைப்புகளும் சுற்றுச்சூழல் ஆர்வலர்களும் தொடர்ச்சியாகப் போராடி வந்தனர்.

மாவட்ட நிர்வாகத்தின் தற்போதைய இந்த அதிரடி நடவடிக்கை மற்றும் காவல்துறையின் வழக்குப்பதிவு, தங்களின் நீண்ட நாள் போராட்டத்திற்குச் சிற்றளவாவது பலன் கிடைக்கத் தொடங்கியிருப்பதாகத் தன்னார்வலர்களுக்கு நம்பிக்கையை ஏற்படுத்தியுள்ளது.

“இயற்கை நமக்குக் கொடுத்த கொடையான தாமிரபரணியை ஆன்மீகம் என்ற பெயரில் நாமே பாழாக்குவது வேதனையான விஷயம். இந்த சட்டப்பூர்வ நடவடிக்கை தற்காலிகமானதாக இல்லாமல், இனிவரும் காலங்களிலும் தொடர வேண்டும். அப்போதுதான் ஆற்றில் கழிவுகளைக் கொட்ட மக்கள் பயப்படுவார்கள்,” என்று உள்ளூரைச் சேர்ந்த சமூக ஆர்வலர் ஒருவர் தெரிவித்தார்.

பாபநாசத்தில் விழிப்புணர்வுப் பலகைகள் வைக்கப்பட்ட பின்பும், விதிகளை மீறுவோர் மீது இனி வரும் நாட்களிலும் இத்தகைய கடுமையான நடவடிக்கைகள் தொடரும் என மாவட்ட நிர்வாகம் எச்சரித்துள்ளது