Nellai , May 10 : நெல்லையில் செங்கல் சூளைக்கு கடத்த முயன்ற 1200 கிலோ ரேஷன் அரிசி பறிமுதல் செய்யப்பட்டது. மினி லாரியுடன் வாலிபர் கைது செய்யப்பட்டார்.
நெல்லையில் ரேஷன் அரிசி கடத்தல் சம்பவம் மீண்டும் பரபரப்பை ஏற்படுத்தியுள்ளது. தாழையூத்தை சுற்றியுள்ள செங்கல் சூளைகளுக்கு விற்பனை செய்ய கடத்தப்பட்டதாக கூறப்படும் 1200 கிலோ ரேஷன் அரிசியை போலீசார் மினி லாரியுடன் பறிமுதல் செய்துள்ளனர். இந்த சம்பவத்தில் தொடர்புடையதாக வாலிபர் ஒருவரை கைது செய்து குடிமைப் பொருள் வழங்கல் குற்றப் புலனாய்வு துறை போலீசார் விசாரணை நடத்தி வருகின்றனர்.
Also Read : எம்ஜிஆர் முதல் விஜய் வரை.. செங்கோட்டையன் அரசியல் பயணம் எப்படி தமிழக வெற்றி கழக ஆட்சிக்கு அடித்தளம் அமைத்தது?
நெல்லை மாவட்டத்தில் ரேஷன் அரிசி கடத்தல், பதுக்கல், மற்றும் சட்டவிரோத விற்பனை தொடர்பான கண்காணிப்பை போலீசார் அண்மைக்காலமாக தீவிரப்படுத்தியுள்ளனர். அதன் ஒரு பகுதியாக நேற்று நெல்லை குடிமைப் பொருள் வழங்கல் குற்றப் புலனாய்வு துறை எஸ்.ஐ. துரை தலைமையிலான போலீசார் தீவிர ரோந்து பணியில் ஈடுபட்டிருந்தனர்.
நெல்லை ஜங்ஷனில் போலீசாரின் அதிரடி சோதனை
நெல்லை ஜங்ஷன் விளாகம் சுடுகாடு அருகே வாகன தணிக்கை மேற்கொண்டிருந்த போது, அந்த வழியாக வந்த மினி லாரி ஒன்றை போலீசார் சந்தேகத்தின் பேரில் தடுத்து நிறுத்தினர். பின்னர் வாகனத்தில் மேற்கொள்ளப்பட்ட சோதனையில், பிளாஸ்டிக் சாக்கு மூட்டைகளில் அடைக்கப்பட்டிருந்த ரேஷன் அரிசி இருப்பது கண்டுபிடிக்கப்பட்டது.
இதையடுத்து லாரியை ஓட்டி வந்த நபரிடம் போலீசார் விசாரணை மேற்கொண்டனர். அதில் அவர் பேட்டை ரஹ்மான்பேட்டை நரிக்குறவர் காலனியை சேர்ந்த சண்முகவேல் மகன் சுடலைமுத்து என்பது தெரியவந்தது.
செங்கல் சூளைகளுக்கு விற்க கடத்தப்பட்ட ரேஷன் அரிசி
தொடர்ந்து நடத்தப்பட்ட விசாரணையில், கோக்கிரகுளம் மற்றும் சிஎன் வில்லேஜ் பகுதிகளில் உள்ள மக்களிடமிருந்து குறைந்த விலைக்கு ரேஷன் அரிசியை வாங்கியதாக சுடலைமுத்து தெரிவித்ததாக போலீசார் கூறினர். பின்னர் அந்த அரிசி 24 பிளாஸ்டிக் சாக்கு மூட்டைகளில் அடைக்கப்பட்டு, தாழையூத்தை சுற்றியுள்ள செங்கல் சூளைகளுக்கு விற்பனை செய்ய கொண்டு செல்லப்பட்டதாகவும் கண்டறியப்பட்டது.
இந்த சம்பவத்தில் போலீசார் 1200 கிலோ ரேஷன் அரிசியையும், கடத்தலுக்கு பயன்படுத்தப்பட்ட மினி லாரியையும் பறிமுதல் செய்தனர். பறிமுதல் செய்யப்பட்ட ரேஷன் அரிசியின் மதிப்பு ரூ.6,780 என அதிகாரிகள் தெரிவித்துள்ளனர்.
அத்தியாவசிய பொருட்கள் சட்டத்தின் கீழ் வழக்கு
ரேஷன் அரிசி கடத்தல் சம்பவம் தொடர்பாக போலீசார் அத்தியாவசிய பொருட்கள் சட்டத்தின் கீழ் வழக்குப்பதிவு செய்துள்ளனர். தொடர்ந்து சுடலைமுத்துவை கைது செய்து மேலதிக விசாரணை நடத்தி வருகின்றனர்.
நெல்லை மற்றும் சுற்றுவட்டார பகுதிகளில் பொதுமக்களுக்கு வழங்கப்படும் ரேஷன் பொருட்கள் சட்டவிரோதமாக விற்பனை செய்யப்படுவது குறித்து அதிகாரிகள் தொடர்ந்து கண்காணிப்பு மேற்கொண்டு வருவதாகவும், இதுபோன்ற கடத்தல் சம்பவங்களில் தொடர்புடையவர்களுக்கு எதிராக கடுமையான நடவடிக்கை எடுக்கப்படும் என்றும் போலீசார் எச்சரித்துள்ளனர்.
