திருப்பத்தூர் தேர்தல் முடிவு , May 10 : திருப்பத்தூர் தொகுதியில் ஒரு ஓட்டு வித்தியாசத்தில் தாவேக்கா வெற்றி பெற்ற விவகாரத்தில் ECI-க்கு சென்னை உயர்நீதிமன்றம் அறிக்கை தாக்கல் செய்ய உத்தரவிட்டது.
தமிழக அரசியலில் பெரும் பரபரப்பை ஏற்படுத்திய திருப்பத்தூர் சட்டப்பேரவை தொகுதி தேர்தல் முடிவு தற்போது நீதிமன்றம் வரை சென்றுள்ளது. ஒரு ஓட்டு வித்தியாசத்தில் தவெக வேட்பாளர் வெற்றி பெற்றதாக அறிவிக்கப்பட்ட நிலையில், திமுக வேட்பாளர் தரப்பில் தொடரப்பட்ட வழக்கில் சென்னை உயர்நீதிமன்றம் தேர்தல் ஆணையத்துக்கு முக்கிய உத்தரவை பிறப்பித்துள்ளது.
நடந்து முடிந்த சட்டப்பேரவை தேர்தலில் சிவகங்கை மாவட்டம் திருப்பத்தூர் தொகுதியில் தவெக வேட்பாளர் சீனிவாச சேதுபதி 83,365 வாக்குகள் பெற்றிருந்தார். அதே நேரத்தில் திமுக வேட்பாளர் பெரிய கருப்பன் 83,364 வாக்குகள் பெற்றிருந்தார். இதன் மூலம் ஒரே ஒரு ஓட்டு வித்தியாசத்தில் தவெக வேட்பாளர் வெற்றி பெற்றதாக அறிவிக்கப்பட்டது.
Also Read : நெல்லையில் செங்கல் சூளைக்கு கடத்திய 1200 கிலோ ரேஷன் அரிசி பறிமுதல்.. மினி லாரியுடன் வாலிபர் கைது
தமிழக தேர்தல் வரலாற்றில் அரிதாக நடைபெறும் இந்த ஒரு ஓட்டு வித்தியாச வெற்றி, அரசியல் வட்டாரங்களில் மட்டுமல்லாமல் பொதுமக்கள் மற்றும் இளைஞர்களிடையிலும் பெரிய விவாதத்தை ஏற்படுத்தியது.
திருப்பத்தூர் தொகுதியில் வெற்றி பெற்ற தவெக வேட்பாளர் எம்எல்ஏவாக பதவி ஏற்க தடை விதிக்க வேண்டும் என திமுக வேட்பாளர் பெரிய கருப்பன் தரப்பில் சென்னை உயர்நீதிமன்றத்தில் அவசர மனு தாக்கல் செய்யப்பட்டது.
இந்த மனு, நீதிபதி எல். விக்டோரியா கௌரி மற்றும் நீதிபதி என். செந்தில்குமார் ஆகியோர் அடங்கிய கோடை விடுமுறை கால சிறப்பு அமர்வு முன்பு விசாரணைக்கு வந்தது. காலை 10.30 மணியளவில் அவசர வழக்காக எடுத்துக்கொள்ளப்பட்ட இந்த வழக்கில் தேர்தல் தொடர்பான முக்கிய கேள்விகள் எழுப்பப்பட்டன.
தபால் வாக்குகள் குறித்து எழுந்த சர்ச்சை
சிவகங்கை மாவட்டம் திருப்பத்தூர் தொகுதிக்கு உட்பட்ட தபால் வாக்குகள், வேலூர் அருகே உள்ள திருப்பத்தூர் மாவட்டத்திற்கு மாறியதாக புகார் எழுந்ததாக நீதிமன்றத்தில் தெரிவிக்கப்பட்டது. இந்த புகாருக்கு தேர்தல் அதிகாரிகள் இதுவரை பதிலளிக்காதது ஏன் என சென்னை உயர்நீதிமன்றம் கேள்வி எழுப்பியது.
இதனை தொடர்ந்து தலைமை தேர்தல் அதிகாரி அறிக்கை தாக்கல் செய்யுமாறு சென்னை உயர்நீதிமன்றம் உத்தரவிட்டுள்ளது. மேலும் வழக்கின் விசாரணை நாளைக்கு ஒத்திவைக்கப்பட்டுள்ளது.
இந்த உத்தரவு, தேர்தல் முறைகளின் வெளிப்படைத்தன்மை மற்றும் வாக்கு எண்ணிக்கையின் நம்பகத்தன்மை குறித்து மீண்டும் கவனத்தை திருப்பியுள்ளது.
தமிழக அரசியலில் புதிய சக்தியாக தவெக
தமிழக அரசியலில் பல ஆண்டுகளாக திமுக மற்றும் அதிமுக ஆகிய இரு திராவிட கட்சிகள் மாறி மாறி ஆட்சி செய்த சூழலில், நடிகர் விஜய் தொடங்கிய தவெக புதிய அரசியல் சக்தியாக உருவெடுத்துள்ளது.
கட்சி தொடங்கி இரண்டு ஆண்டுகள் மட்டுமே ஆன நிலையில், இந்த தேர்தலில் தமிழக வெற்றிக் கழகம் பல இடங்களில் கவனம் பெற்றது. குறிப்பாக திருப்பத்தூர் தொகுதியில் ஒரு ஓட்டு வித்தியாசத்தில் கிடைத்த வெற்றி தேசிய மற்றும் உலக அளவிலும் பேசப்பட்ட சம்பவமாக மாறியுள்ளது. ஒரே ஒரு ஓட்டு கூட தேர்தல் முடிவை மாற்றக்கூடும் என்பதற்கான மிகப்பெரிய உதாரணமாக இந்த தேர்தல் பார்க்கப்படுகிறது.
