புதுக்கோட்டை , ஏப்ரல் 5: தமிழ்நாடு சட்டமன்றத் தேர்தலுக்கான வாக்குப் பதிவு நாள் நெருங்கி வரும் நிலையில் அரசியல் கட்சிகளின் பிரசாரம் உச்சக்கட்டத்தை எட்டியுள்ளது. புதுக்கோட்டை உள்ளிட்ட சுற்றுவட்டாரப் பகுதிகளில் நடைபெற்ற தேர்தல் பொதுக்கூட்டங்களில் பங்கேற்றுப் பேசிய துணை முதலமைச்சர் உதயநிதி ஸ்டாலின் அதிமுக பொதுச்செயலாளர் எடப்பாடி பழனிசாமியின் பிரசார சைகை குறித்துப் பேசிய கருத்துகள் தற்போது அரசியல் வட்டாரத்தில் புதிய விவாதத்தை ஏற்படுத்தியிருக்கின்றன.
Also read : 8th Pay Commison: பழைய ஓய்வூதிய திட்டம் முதல் பெண்கள் நலன் வரை கோரிக்கைகள் பட்டியல் வெளியீடு
பிரசார மேடைகளில் எடப்பாடி பழனிசாமி தொடர்ந்து காட்டி வரும் இரட்டை விரல் சைகை குறித்துத் தனது உரையில் குறிப்பிட்ட உதயநிதி ஸ்டாலின் எங்கு சென்றாலும் அவர் இரட்டை விரலைக் காட்டி வருவதை மக்கள் பார்க்கிறார்கள் என்றார். பொதுவாக பொதுமக்கள் அதனை அதிமுகவின் அதிகாரப்பூர்வ சின்னமான இரட்டை இலையைக் குறிக்கும் சைகை என்றே நினைத்துக் கொண்டிருக்கிறார்கள் என்று சுட்டிக்காட்டிய அவர் உண்மையில் அதற்குப் பின்னால் வேறு ஒரு உள் அர்த்தம் இருப்பதாகக் குறிப்பிட்டார்.
எடப்பாடி பழனிசாமி தலைமையிலான அதிமுக ஏற்கனவே தொடர்ச்சியான தேர்தல் தோல்விகளைச் சந்தித்திருப்பதாகத் தனது உரையில் விமர்சித்த உதயநிதி ஸ்டாலின் அவர் தற்போது காட்டும் இரட்டை விரல் சின்னத்திற்கான சைகை அல்ல என்றார். ஏற்கனவே தான் பத்துத் தேர்தல்களில் தோல்வி அடைந்துவிட்டேன் என்றும் இந்த முறையும் வெற்றி பெறாவிட்டால் அது தனது பதினோராவது தோல்வியாகத் தான் முடியும் என்பதை வாக்காளர்களுக்கு முன்கூட்டியே உணர்த்தும் வகையிலேயே அவர் அந்த சைகையைப் பயன்படுத்தி வருகிறார் என்று நகைச்சுவை ததும்ப விமர்சித்தார்.
மேலும் வரும் சட்டமன்றத் தேர்தலில் தங்களின் ஜனநாயகக் கடமையை ஆற்றவுள்ள வாக்காளர்கள் அனைவரும் ஒன்றிணைந்து எடப்பாடி பழனிசாமி தலைமையிலான அணியைத் தோற்கடிக்க வேண்டும் என்று கேட்டுக்கொண்டார். இந்தத் தேர்தல் முடிவுகளின் மூலம் மக்கள் அவரை முழுமையாக அரசியலில் இருந்தே விலக்க வேண்டும் என்றும் பிரசார மேடையில் அவர் வலியுறுத்தினார்.
