நெல்லை , மே 10 : திருநெல்வேலி மாவட்டம் பணகுடி இளம்பெண் ஒருவர் ஆன்லைன் Crypto Investment மோசடியில் சிக்கி ரூ.10.57 லட்சம் இழந்த சம்பவம் அதிர்ச்சியை ஏற்படுத்தியுள்ளது.
நெல்லை மாவட்டத்தில் ஆன்லைன் கிரிப்டோ முதலீட்டு மோசடி சம்பவம் ஒன்று பெரும் அதிர்ச்சியை ஏற்படுத்தியுள்ளது. பணகுடியை சேர்ந்த 27 வயது இளம்பெண் ஒருவர், “45 நிமிடங்களில் ரூ.1 லட்சம் லாபம்” என்ற ஆசை வார்த்தையை நம்பி, தனது மற்றும் குழந்தையின் நகைகளை அடகு வைத்து சுமார் ரூ.10.57 லட்சம் வரை இழந்த சம்பவம் தற்போது சைபர் கிரைம் போலீசாரின் தீவிர விசாரணைக்குள் சென்றுள்ளது.
நெல்லை மாவட்டம் ராதாபுரம் வட்டம் பணகுடி பாத்திமா தெருவை சேர்ந்த அந்த இளம்பெண்ணின் கணவர் வெளிநாட்டில் வேலை செய்து வருகிறார். இந்நிலையில், அவர் WhatsApp-ல் இயங்கி வந்த ஒரு ஆன்மீக குழுவில் உறுப்பினராக இருந்துள்ளார்.
கடந்த ஏப்ரல் 2ஆம் தேதி அந்த குழுவில் “Crypto Investment” தொடர்பான ஒரு புதிய இணைப்பு பகிரப்பட்டுள்ளது. அதில், “ரூ.10,000 முதலீடு செய்தால் 45 நிமிடங்களில் ரூ.1 லட்சம் வரை லாபம் கிடைக்கும்” என்று கூறப்பட்டிருந்தது. விரைவில் அதிக லாபம் கிடைக்கும் என்ற நம்பிக்கையில் அந்த இணைப்பை அவர் திறந்துள்ளார்.
அதன் பின்னர், அந்த இணைப்பு நைஜீரியா நாட்டைச் சேர்ந்த ஒரு WhatsApp எண்ணுக்கு சென்றதாக கூறப்படுகிறது. வெளிநாட்டு முகவரியுடன் தொடர்பு கொண்ட அந்த நபர், முதலில் குறைந்த தொகையில் முதலீடு செய்யும்படி கூறியுள்ளார்.
ரூ.1500 முதலீட்டில் தொடங்கி பல லட்சம் இழப்பு
முதலில் ரூ.1500 முதலீடு செய்த அந்த பெண்ணுக்கு, பின்னர் ஒரு போலி இணையதளத்தில் ரூ.2.5 கோடி லாபம் வந்திருப்பது போல காட்டப்பட்டுள்ளது. இதன்மூலம் அவர் முழுமையாக மோசடி வலையில் சிக்கியதாக போலீசார் சந்தேகிக்கின்றனர்.
அதிக லாபம் கிடைக்கும் என்ற ஆசையில், தனது நகைகள் மட்டுமல்லாமல் குழந்தையின் தங்க நகைகளையும் பணகுடியில் உள்ள தனியார் நிதி நிறுவனத்தில் அடகு வைத்துள்ளார். அதில் கிடைத்த தொகையை யூபிஐ (UPI) மூலம் பல தவணைகளாக மோசடி கும்பலுக்கு அனுப்பியுள்ளார்.
ஏப்ரல் 2ஆம் தேதி முதல் மே மாதம் வரை மொத்தம் ரூ.10 லட்சத்து 57 ஆயிரத்து 500 வரை அவர் அனுப்பியிருப்பதாக விசாரணையில் தெரியவந்துள்ளது.
ஒரு கட்டத்தில் மேலும் பணம் செலுத்த முடியாத நிலைக்கு அந்த இளம்பெண் சென்றுள்ளார். அப்போது மோசடி நபர்கள் தொடர்ந்து அழுத்தம் கொடுத்து, மிரட்டும் வகையில் பணம் கேட்டு வற்புறுத்தியதாக கூறப்படுகிறது.
இதற்கிடையில், உறவினர் வீட்டிற்கு சென்றபோது அங்கிருந்தவர்கள் இது ஒரு ஆன்லைன் மோசடி என எச்சரித்துள்ளனர். அதன் பின்னரே தான் பெரிய அளவில் ஏமாற்றப்பட்டிருப்பதை அந்த இளம்பெண் உணர்ந்துள்ளார்.
நெல்லை Cyber Crime போலீசார் தீவிர விசாரணை
தான் மோசடிக்கு உள்ளானதை உணர்ந்த உடனே, நெல்லை மாவட்ட Cyber Crime போலீசாரிடம் அவர் புகார் அளித்துள்ளார். அந்த புகாரின் அடிப்படையில் போலீசார் வழக்குப்பதிவு செய்து விசாரணையை தொடங்கியுள்ளனர்.
இந்த வழக்கில் இன்ஸ்பெக்டர் மகாலட்சுமி தலைமையிலான சைபர் கிரைம் போலீசார், பண பரிமாற்றங்கள், WhatsApp எண்கள் மற்றும் பயன்படுத்தப்பட்ட போலி இணையதள விவரங்களை ஆய்வு செய்து வருகின்றனர்.
தமிழகத்தில் சமீப காலமாக “Online Investment Scam”, “Crypto Fraud”, “UPI Scam” போன்ற சைபர் மோசடிகள் அதிகரித்து வருகின்றன. குறிப்பாக WhatsApp குழுக்கள், Telegram சேனல்கள் மற்றும் போலி முதலீட்டு தளங்கள் மூலம் சாதாரண மக்களை குறிவைத்து மோசடி நடைபெறுவது கவலைக்குரியதாக மாறியுள்ளது. மிக குறுகிய நேரத்தில் அதிக லாபம் கிடைக்கும் என்ற வாக்குறுதிகள் பெரும்பாலும் மோசடி வலையாக இருக்கக்கூடும் என சைபர் பாதுகாப்பு நிபுணர்கள் தொடர்ந்து எச்சரித்து வருகின்றனர்.
