சிறப்பு செய்தி , மே 10 : தமிழக சட்டப்பேரவை கூட்டம், தற்காலிக சபாநாயகர் கருப்பையா பதவியேற்பு, Speaker தேர்தல், செங்கோட்டையன் மற்றும் ஜேசிடி பிரபாகர் குறித்து முக்கிய தகவல்கள் வெளியாகியுள்ளன.
தமிழகத்தின் 17வது சட்டப்பேரவைக்கான முக்கிய அரசியல் நடவடிக்கைகள் வேகமெடுத்து வரும் நிலையில், தற்காலிக சபாநாயகராக தமிழக வெற்றிக்கழகத்தை சேர்ந்த எம்எல்ஏ கருப்பையாவிற்கு தமிழக கவர்னர் அருளியேக்கர் பதவி பிரமாணம் செய்து வைத்திருப்பது அரசியல் வட்டாரத்தில் பெரும் கவனத்தை ஈர்த்துள்ளது. இந்த பதவியேற்புடன், சட்டப்பேரவை நடவடிக்கைகளை முன்னெடுக்க வேண்டிய அதிகாரங்கள் தற்காலிக சபாநாயகருக்கு கிடைத்துவிட்டதாக கூறப்படுகிறது.
இந்த நிலையில், நாளை காலை தமிழக சட்டப்பேரவை கூடும் என அதிகாரப்பூர்வ நடைமுறைகள் தொடங்கப்பட்டுள்ளன. சட்டப்பேரவை செயலாளர் சீனிவாசன் தலைமையில், 234 எம்எல்ஏக்களுக்கும் அவசர அறிவிப்புகள் அனுப்பப்பட்டு வருவதாக தகவல்கள் தெரிவிக்கின்றன.
Also Read : சட்டம் ஒழுங்கு குறித்து முதல்வர் விஜய் தலைமையில் அதிரடி ஆலோசனை கூட்டம்:
தேர்தலில் வெற்றி பெற்ற அனைத்து உறுப்பினர்களுக்கும் இன்று இரவிற்குள் அதிகாரப்பூர்வ கடிதங்கள் அனுப்பப்படும் என கூறப்படுகிறது. அந்த அறிவிப்பில், “நீங்கள் எம்எல்ஏவாக தேர்ந்தெடுக்கப்பட்டுள்ளீர்கள். நாளை நடைபெறும் சட்டப்பேரவை பதவியேற்பு நிகழ்ச்சியில் பங்கேற்க வேண்டும்” என்ற உத்தரவு இடம்பெறும்.
ஒவ்வொரு உறுப்பினரும் தங்களது வெற்றி சான்றிதழை தேர்தல் அதிகாரியிடமிருந்து பெற்றிருப்பார்கள். அந்த சான்றிதழை சட்டப்பேரவை செயலகத்தில் சமர்ப்பித்த பிறகே, அவர்களின் உறுப்பினர் பதிவு நிறைவு செய்யப்படும். இதுவே சட்டப்பேரவை நடைமுறையில் முக்கிய கட்டமாக பார்க்கப்படுகிறது.
முதல்வருக்கு முதலில் பதவி பிரமாணம்
நாளைய சட்டப்பேரவை கூட்டத்தில், தற்காலிக சபாநாயகர் கருப்பையா முதலில் முதலமைச்சருக்கு எம்எல்ஏவாக பதவி பிரமாணம் செய்து வைப்பார். அதனை தொடர்ந்து மூத்த அமைச்சர்கள், எதிர்க்கட்சி உறுப்பினர்கள் மற்றும் பிற எம்எல்ஏக்கள் வரிசையாக பதவியேற்பார்கள்.
இந்த நடைமுறை முடிந்த பிறகு, 234 உறுப்பினர்களும் அதிகாரப்பூர்வமாக சட்டமன்ற உறுப்பினர்களாக அங்கீகரிக்கப்படுவார்கள். பின்னர் அவர்களுக்கு எம்எல்ஏ அடையாள அட்டைகள் வழங்கப்படுவதோடு, சென்னை சட்டமன்ற விடுதிகளில் தங்கும் வசதிகளும் ஒதுக்கப்படும்.
நிரந்தர சபாநாயகர் : தற்காலிக சபாநாயகர் பதவி குறுகிய காலத்திற்கு மட்டுமே என்பதால், அடுத்த கட்டமாக நிரந்தர சபாநாயகர் தேர்தல் நடைபெற உள்ளது. இதற்கான அறிவிப்பை சட்டப்பேரவை செயலகம் வெளியிடும் என எதிர்பார்க்கப்படுகிறது.
வழக்கமாக ஆளுங்கட்சியே சபாநாயகர் வேட்பாளரை நிறுத்தும் நடைமுறை தமிழக அரசியலில் இருந்து வருகிறது. எதிர்க்கட்சிகள் பெரும்பாலும் போட்டி வேட்பாளரை நிறுத்தாத சூழலும் கடந்த காலங்களில் இருந்துள்ளது.
இந்த முறை ஆளுங்கட்சிக்கு 107 உறுப்பினர்கள் இருப்பதுடன், காங்கிரஸ் கட்சியின் 5 உறுப்பினர்கள் ஆதரவு அளிக்கும் நிலை இருப்பதாக கூறப்படுகிறது. அதே நேரத்தில் கம்யூனிஸ்ட் கட்சிகள் வெளியில் இருந்து ஆதரவு அளித்தாலும், எதிர்க்கட்சி வரிசையிலேயே அமர வாய்ப்பு இருப்பதாக அரசியல் வட்டாரங்கள் தெரிவிக்கின்றன.
ஜேசிடி பிரபாகர் பெயர் ஏன் ? சபாநாயகர் பதவிக்கான முக்கிய பெயர்களில் ஜேசிடி பிரபாகர் பெயர் தீவிரமாக பேசப்படுகிறது. அவர் ஏற்கனவே சட்டப்பேரவை அனுபவம் கொண்டவர் என்பதால், நடைமுறைகள் மற்றும் அவை செயல்பாடுகளில் தேர்ச்சி பெற்றவர் என கருதப்படுகிறார்.
மற்றொரு புறம், மூத்த தலைவர் செங்கோட்டையனுக்கு “அவை முன்னவர்” பதவி வழங்கப்பட வாய்ப்பு இருப்பதாக தகவல்கள் வெளியாகியுள்ளன. 1977ஆம் ஆண்டிலேயே முதல் முறையாக எம்எல்ஏ ஆன அவர், கிட்டத்தட்ட 50 ஆண்டுகள் சட்டப்பேரவை அனுபவம் கொண்டவர் என்பதால், இந்த முக்கிய பொறுப்புக்கு அவருடைய பெயர் பரிசீலனையில் இருப்பதாக கூறப்படுகிறது.
மேலும், தலைமை செயலகத்தில் முன்னாள் அமைச்சர் துரைமுருகன் பயன்படுத்திய அறை தற்போது செங்கோட்டையனுக்கு ஒதுக்கப்பட்டிருப்பதும் அரசியல் வட்டாரங்களில் கவனிக்கப்படுகிறது.
நிரந்தர சபாநாயகர் தேர்வு செய்யப்பட்ட பிறகு, அடுத்த முக்கிய கட்டமாக நம்பிக்கை வாக்கெடுப்பு நடைபெறும் என எதிர்பார்க்கப்படுகிறது. அந்த வாக்கெடுப்பை நடத்தும் முழு அதிகாரமும் சபாநாயகரிடம் இருக்கும்.
சட்டப்பேரவை விதிகளின்படி, Speaker எடுத்த முடிவுகள் மீது நீதிமன்றங்கள்கூட பல்வேறு சந்தர்ப்பங்களில் தலையிடாத நிலை காணப்பட்டுள்ளதால், இந்த பதவி தமிழக அரசியலில் மிகுந்த அதிகாரம் கொண்ட ஒன்றாக பார்க்கப்படுகிறது.
