Chennai , May 13 : தமிழக சட்டமன்றத்தில் விஜய் தலைமையிலான TVK அரசு மீது நடைபெறும் நம்பிக்கை வாக்கெடுப்பு எப்படி நடக்கும்? டிவிஷன் வாக்கெடுப்பு முதல் பெரும்பான்மை கணக்கீடு வரை முழு விளக்கம்.
தமிழக அரசியல் வட்டாரத்தில் தற்போது அதிகமாக பேசப்படும் விஷயங்களில் ஒன்றாக “நம்பிக்கை வாக்கெடுப்பு” மாறியுள்ளது. குறிப்பாக தமிழ்நாடு சட்டமன்றத்தில் விஜய் தலைமையிலான TVK அரசு மீது நம்பிக்கை வாக்கெடுப்பு நடைபெறலாம் என்ற அரசியல் சூழல் பேசப்படும் நிலையில், அந்த நடைமுறை எப்படி இருக்கும் என்ற கேள்வி பொதுமக்கள் மத்தியில் அதிகரித்துள்ளது. சட்டமன்றத்தில் ஒரு அரசு தனது பெரும்பான்மையை நிரூபிக்க வேண்டிய சூழ்நிலை உருவானால் எந்த விதிமுறைகள் பின்பற்றப்படும், உறுப்பினர்கள் எவ்வாறு வாக்களிப்பார்கள், “டிவிஷன் வாக்கெடுப்பு” என்றால் என்ன போன்ற கேள்விகளுக்கான விளக்கமே தற்போது முக்கியமாக தேடப்பட்டு வருகிறது.
நம்பிக்கை வாக்கெடுப்பு என்றால் என்ன?
ஒரு அரசுக்கு சட்டமன்றத்தில் பெரும்பான்மை ஆதரவு இருக்கிறதா என்பதை நிரூபிக்கும் அதிகாரப்பூர்வ நடைமுறையே நம்பிக்கை வாக்கெடுப்பு அல்லது Trust Vote எனப்படுகிறது. பொதுவாக அரசியல் மாற்றங்கள், கூட்டணி பிரச்சினைகள் அல்லது எதிர்க்கட்சிகளின் அழுத்தம் போன்ற சூழ்நிலைகளில் இந்த வாக்கெடுப்பு நடத்தப்படும்.
தமிழ்நாடு சட்டமன்றத்தில் விஜய் தலைமையிலான தாவேக்க அரசு மீது நம்பிக்கை வாக்கெடுப்பு நடைபெற உள்ளதாக அரசியல் விவாதங்கள் எழுந்துள்ள நிலையில், அதன் சட்டமன்ற நடைமுறைகள் குறித்த ஆர்வமும் அதிகரித்துள்ளது.
Also Read : நேரலையில் நம்பிக்கை வாக்கெடுப்பு.. இதுவரை எந்த அரசும் செய்யாத நடவடிக்கையால் கவனம் ஈர்த்த விஜய் அரசு
சட்டமன்றத்தில் நடைமுறை எப்படி தொடங்கும்?
சட்டமன்றம் கூடியதும் முதல்வர் விஜய் தனது அமைச்சரவை மீது நம்பிக்கை கோரும் தீர்மானத்தை அவையில் முன்மொழிவார். அதனை தொடர்ந்து அவர் உரையாற்றி, தனது அரசுக்கு உள்ள ஆதரவை விளக்குவார். இந்த உரை அரசின் நிலைப்பாடு மற்றும் பெரும்பான்மை ஆதரவை வலியுறுத்தும் வகையில் இருக்கும்.
அதன் பின்னர் எதிர்க்கட்சி தலைவர்கள் மற்றும் பிற கட்சிகளைச் சேர்ந்த உறுப்பினர்களும் விவாதத்தில் பங்கேற்று தங்களது கருத்துகளை பதிவு செய்வார்கள். இந்த விவாதங்களின் போது அரசின் செயல்பாடு, பெரும்பான்மை நிலை மற்றும் அரசியல் சூழ்நிலை உள்ளிட்ட அம்சங்கள் பேசப்படும்.
குரல் வாக்கெடுப்பு எப்படி நடைபெறும்?
விவாதங்கள் முடிந்ததும் முதலில் “குரல் வாக்கெடுப்பு” நடத்தப்படும். இதில் தீர்மானத்தை ஆதரிப்பவர்கள் மற்றும் எதிர்ப்பவர்கள் தங்களது குரல் மூலம் கருத்து தெரிவிப்பார்கள். சபாநாயகர் எந்த தரப்புக்கு அதிக ஆதரவு இருப்பதாக கருதுகிறாரோ அதனை பதிவு செய்வார்.
ஆனால் இந்த முடிவில் எதிர்க்கட்சியினர் அதிருப்தி தெரிவித்து துல்லியமான எண்ணிக்கை கோரினால், அடுத்த கட்டமாக “டிவிஷன் வாக்கெடுப்பு” நடத்தப்படும்.
டிவிஷன் வாக்கெடுப்பு என்றால் என்ன?
தமிழக சட்டமன்றத்தில் மிகவும் முக்கியமான மற்றும் கட்டுப்பாடுகளுடன் நடைபெறும் நடைமுறைகளில் ஒன்றாக டிவிஷன் வாக்கெடுப்பு பார்க்கப்படுகிறது. இந்த நடைமுறையில் ஒவ்வொரு உறுப்பினரின் வாக்கும் தனித்தனியாக கணக்கிடப்படும்.
டிவிஷன் வாக்கெடுப்பு தொடங்குவதற்கு முன்பாக, அவைக்கு வெளியே இருக்கும் சட்டமன்ற உறுப்பினர்களை உள்ளே வரவழைக்க மூன்று முறை மணியோசை எழுப்பப்படும். இது அனைத்து உறுப்பினர்களும் வாக்கெடுப்பில் பங்கேற்கும் வாய்ப்பை உறுதி செய்வதற்கான நடைமுறையாகும்.
அனைத்து உறுப்பினர்களும் உள்ளே வந்ததும் அவையின் கதவுகள் முழுமையாக மூடப்படும். அந்த நேரத்தில் வெளிநபர்கள் யாரும் உள்ளே வர அனுமதிக்கப்படமாட்டார்கள். அதேபோல் உறுப்பினர்களும் வெளியே செல்ல முடியாது. இதன் மூலம் வாக்கெடுப்பு முழுமையான கட்டுப்பாட்டுடன் நடைபெறுவதை சட்டமன்ற நிர்வாகம் உறுதி செய்யும்.
சட்டமன்ற செயலரின் பங்கு என்ன?
இந்த முழு வாக்கெடுப்பு நடைமுறையையும் சட்டமன்ற செயலர் முன்னின்று நடத்துவார். அவை பல்வேறு பிரிவுகளாக பிரிக்கப்பட்டிருக்கும். குறிப்பாக A, B, C, D, E, F என மொத்தம் ஆறு டிவிஷன்களாக உறுப்பினர்கள் பிரிக்கப்பட்டிருப்பார்கள்.
ஒவ்வொரு பிரிவிலும் உறுப்பினர்களிடம் தீர்மானத்தை ஆதரிப்பவர்கள், எதிர்ப்பவர்கள் மற்றும் நடுநிலை வகிப்பவர்கள் என தனித்தனியாக எழுந்து நிற்கச் சொல்லப்படும். பின்னர் அவர்களின் எண்ணிக்கை துல்லியமாக கணக்கிடப்படும்.
இந்த முறையின் மூலம் ஒவ்வொரு வாக்கும் நேரடியாக பதிவு செய்யப்படுவதால் எந்தவித குழப்பத்திற்கும் இடமின்றி முடிவுகள் கணக்கிடப்படுகின்றன.
பெரும்பான்மை எப்படி கணக்கிடப்படும்?
சட்டமன்றத்தில் இருக்கும் மொத்த உறுப்பினர்களில் 50 சதவீதத்திற்கும் கூடுதலாக ஒரு உறுப்பினர் ஆதரவு தெரிவித்தாலே அரசு பெரும்பான்மை பெற்றதாக கருதப்படும். அதன்படி முதல்வர் விஜய் தலைமையிலான அரசு தேவையான எண்ணிக்கையை பெற்றால், நம்பிக்கை வாக்கெடுப்பில் வெற்றி பெற்றதாக சபாநாயகர் அறிவிப்பார்.
அதேநேரத்தில், எதிர்பாராத வகையில் தீர்மானம் தோல்வி அடைந்தால் அந்த அரசு பெரும்பான்மையை இழந்துவிட்டதாக கருதப்படும். இந்த தகவல் உடனடியாக ஆளுநருக்கு தெரிவிக்கப்படும். அதன் பின்னர் அடுத்தகட்ட அரசியல் மற்றும் அரசியலமைப்பு நடவடிக்கைகள் குறித்து முடிவுகள் எடுக்கப்படும்.
-சிறப்பு செய்தி
