நெல்லை , ஜூன் 8 :திருநெல்வேலி மாநகராட்சி மேயர் அலுவலகத்தில் தமிழக முதலமைச்சர் ஜோசப் விஜய் அவர்களின் புகைப்படத்தின் கீழ் அமர்ந்து பணியாற்ற விருப்பமில்லாமல், மேயர் கி. ராமகிருஷ்ணன் தனது இருக்கையை திடீரென முன்னாள் முதலமைச்சர் மு.க.ஸ்டாலினின் புகைப்படத்திற்கு கீழே மாற்றியிருப்பதாக எழுந்துள்ள புகார் நெல்லை அரசியல் வட்டாரத்தில் பெரும் பரபரப்பை ஏற்படுத்தியுள்ளது.
திருநெல்வேலி மாநகராட்சி அலுவலகத்தில் உள்ள மேயர் அறையில், இத்தனை வருடங்களாக மேயருக்கென பிரத்யேகமாக ஒதுக்கப்பட்டிருந்த முதன்மை இருக்கையில் அமர்ந்துதான் கோப்புகளை ஆய்வு செய்வதும், மக்கள் பணிகளை கவனிப்பதும் வழக்கமாக இருந்து வந்தது. அந்த பாரம்பரியமிக்க முதன்மை இருக்கைக்கு பின்புற சுவரில், தற்போதைய தமிழக முதலமைச்சர் ஜோசப் விஜய் அவர்களின் அதிகாரப்பூர்வ அரசுப் புகைப்படம் முறைப்படி இடம் பெற்றுள்ளது.
இந்நிலையில், மேயர் ராமகிருஷ்ணன் திடீரென தனது பாரம்பரிய முதன்மை இருக்கையில் இருந்து மாறி, அறையின் மற்றொரு பகுதிக்குச் சென்றுள்ளார். அங்கு திமுக முன்னாள் முதலமைச்சர் மு.க.ஸ்டாலினின் புகைப்படத்திற்கு கீழே புதிய இருக்கை மற்றும் மேஜை அமைத்து, கடந்த சில தினங்களாக அங்கேயே அமர்ந்து பணிகளை கவனிக்கத் தொடங்கியுள்ளார்.
Also read : நெல்லையில் நிதி நெருக்கடியால் 35 ஆண்டு பழமையான பள்ளி மூடல்: கிராம மக்கள் உண்ணாவிரதம்
தமிழகத்தில் ஏற்பட்ட ஆட்சி மாற்றத்திற்குப் பிறகு, அனைத்து அரசு அலுவலகங்களிலும் தற்போதைய முதலமைச்சர் ஜோசப் விஜய் அவர்களின் புகைப்படங்கள் அரசாணையின்படி முறைப்படி வைக்கப்பட்டுள்ளன. ஆனால், திமுகவைச் சேர்ந்த நெல்லை மேயர் ராமகிருஷ்ணன், தற்போதைய முதல்வரின் படத்தின் கீழ் அமர்வதைத் தவிர்ப்பதற்காகவே திட்டமிட்டு, தனது கட்சித் தலைவரான மு.க.ஸ்டாலினின் படத்தின் கீழ் இருக்கையை மாற்றியுள்ளார் என எதிர்க்கட்சியினரும், சமூக ஆர்வலர்களும் தற்போது பகிரங்கமாக விமர்சிக்கத் தொடங்கியுள்ளனர்.
மாநகராட்சி அலுவலகத்தில் இந்த விவகாரம் பெரும் சர்ச்சையாக உருவெடுத்துள்ள நிலையில், இது குறித்து திருநெல்வேலி மாநகராட்சி மேயர் கி. ராமகிருஷ்ணனிடம் செய்தியாளர்கள் தரப்பில் கேள்வி எழுப்பப்பட்டது. அதற்குப் பதிலளித்த மேயர் ராமகிருஷ்ணன், எனக்கு முன்னாள் முதல்வர் ஸ்டாலின் படத்தின் கீழ் அமர்ந்து பணிபுரிவதுதான் பிடித்திருக்கிறது, இதைத் தவிர வேறொன்றும் சொல்வதற்கு இல்லை என்று கூறி, இந்த விவகாரத்தில் தனது அரசியல் நிலைப்பாட்டை வெளிப்படையாகவே சுட்டிக்காட்டியுள்ளார்.
நெல்லை மாநகராட்சி வரலாற்றிலேயே இல்லாத வகையில், மேயர் ஒருவர் தனது அதிகாரப்பூர்வ முதன்மை இருக்கையைத் தவிர்த்து, அறையின் மற்றொரு பகுதியில் அமர்ந்து நிர்வாகத்தை கவனிப்பது மாநகராட்சி ஊழியர்கள் மற்றும் பொதுமக்களிடையே பெரும் வியப்பை ஏற்படுத்தியுள்ளது. இந்த விவகாரம் தமிழக அளவில் திமுக மற்றும் தற்போதைய ஆளுங்கட்சி வட்டாரங்களுக்கு இடையே புதிய விவாதங்களை உசுப்பி விட்டுள்ளதால், நெல்லை மாவட்ட அரசியல் களம் தற்போது சூடுபிடித்துள்ளது.
