நெல்லை , ஜூலை 1: நெல்லை மாவட்டத்தின் பணகுடி, காவல்கிணறு உள்ளிட்ட தென் மாவட்டப் பகுதிகளில் தென்மேற்கு பருவக்காற்று தீவிரமடைந்துள்ளதை அடுத்து, காற்றாலை மின் உற்பத்தியில் தமிழகம் புதிய வரலாற்றுச் சாதனையை நிகழ்த்தியுள்ளது. அண்டை மாநிலங்களான ஆந்திர பிரதேசம் மற்றும் கர்நாடகாவை மிக அதிக வித்தியாசத்தில் பின்னுக்குத் தள்ளி, ஒட்டுமொத்த தென்னிந்தியாவிலேயே காற்றாலை மின் உற்பத்தியில் தமிழகம் முதலிடத்தைப் பிடித்து அசத்தியுள்ளது.
தமிழகத்தின் ஒட்டுமொத்த மின் தேவையைப் பூர்த்தி செய்வதில் அனல் மின் நிலையங்கள் மற்றும் கூடங்குளம் உள்ளிட்ட அணு மின் நிலையங்களுடன் இணைந்து காற்றாலைகளும் மிக முக்கியப் பங்காற்றி வருகின்றன. மாநிலம் முழுவதும் தற்போது சுமார் 13 ஆயிரம் காற்றாலைகள் செயல்பாட்டில் உள்ளன. ஆண்டுதோறும் ஜூன், ஜூலை மாதங்களில் வீசும் தென்மேற்கு பருவக்காற்றை நம்பியே இந்த காற்றாலைகளின் முதன்மை உற்பத்தி அமைகிறது. அந்த வகையில் இந்த ஆண்டு பருவக்காற்று வழக்கத்தை விட அதிவேகமாக வீசத் தொடங்கியுள்ளது மின் உற்பத்தியை பன்மடங்கு உயர்த்தியுள்ளது.
நெல்லை மாவட்டத்தின் கூடங்குளம், ராதாபுரம், காவல்கிணறு, பழவூர், இருக்கன்துறை மற்றும் பணகுடி ஆகிய பகுதிகள் காற்றாலை பண்ணைகளின் முக்கிய மையங்களாகத் திகழ்கின்றன. கடந்த சில நாட்களாக இப்பகுதிகளில் பலத்த காற்று வீசி வருவதால், இங்குள்ள ஆயிரக்கணக்கான காற்றாலைகள் முழுத்திறனுடன் சுழலத் தொடங்கியுள்ளன. இதன் காரணமாக மின் உற்பத்தியும் முன்னெப்போதும் இல்லாத வகையில் புதிய உச்சத்தைத் தொட்டுள்ளது.
தேசிய அளவில் மின் விநியோகத்தை முறைப்படுத்தும் ‘கிரிட் இந்தியா’ (Grid India) நிறுவனம் வெளியிட்டுள்ள அதிகாரப்பூர்வ அறிக்கையின்படி, தமிழகத்தில் ஒரே நாளில் மட்டும் 109.32 மில்லியன் யூனிட் காற்றாலை மின்சாரம் உற்பத்தி செய்யப்பட்டு, மாநிலத்தின் மின் கட்டமைப்பில் பயன்படுத்தப்பட்டுள்ளது. இந்த அளவு அண்டை மாநிலங்களின் ஒட்டுமொத்த உற்பத்தியைக் காட்டிலும் இருமடங்கு அதிகம் என்பது குறிப்பிடத்தக்கது.
இதே காலகட்டத்தில் தென்னிந்தியாவின் பிற முக்கிய மாநிலங்களான ஆந்திர பிரதேசம் ஒரே நாளில் 50.09 மில்லியன் யூனிட் மின்சாரத்தையும், கர்நாடகா 47.93 மில்லியன் யூனிட் மின்சாரத்தையும் மட்டுமே உற்பத்தி செய்துள்ளன. இவற்றுடன் ஒப்பிடுகையில் தமிழகத்தின் உற்பத்தி 100 மில்லியன் யூனிட்டைக் கடந்து சாதனை படைத்துள்ளதால், புதுப்பிக்கத்தக்க எரிசக்தி பயன்பாட்டில் தமிழகம் தென் மாநிலங்களின் முதன்மைப் புள்ளியாக உருவெடுத்துள்ளது.
தற்போதைய நிலவரப்படி தமிழகத்தின் ஒட்டுமொத்த காற்றாலை மின் உற்பத்தித் திறன் 9 ஆயிரத்து 495 மெகாவாட்டாக உள்ளது. இதில் நேற்று காலை நிலவரப்படி மட்டும் 5 ஆயிரத்து 834 மெகாவாட் மின்சாரம் காற்றாலைகள் மூலம் நேரடியாக உற்பத்தி செய்யப்பட்டுள்ளது. இதுதவிர, காற்றின் வேகம் மாறக்கூடிய மாலை மற்றும் இரவு நேரங்களிலும் கூட தொடர்ந்து 3 ஆயிரத்து 700 மெகாவாட்டிற்கும் அதிகமான மின்சாரம் தடையின்றி கிடைத்துள்ளது. இந்த தொடர் உற்பத்தியானது கோடைக்காலத்தை அடுத்த மின் தேவையை மாநில அரசு எவ்வித தடையுமின்றி சீராகக் கையாளப் பெரிதும் உதவியுள்ளது.
அதேவேளையில் இந்த சாதனைக்குக் காரணமான தென்மேற்கு பருவக்காற்றின் வேகம் நெல்லை மாவட்டத்தின் இயல்பு வாழ்க்கையையும் சற்றே பாதித்துள்ளது. கடந்த இரண்டு நாட்களாக காவல்கிணறு, பணகுடி ஆகிய பகுதிகளில் காற்று மிக உக்கிரமாக வீசி வருவதால், அப்பகுதியில் உள்ள நான்கு வழிச்சாலை மற்றும் மேம்பாலங்களில் செல்லும் கனரக வாகனங்கள் மற்றும் இதர வாகனங்கள் நிலைதடுமாறி கவிழும் அபாயம் ஏற்பட்டுள்ளது. இதனால் நெடுஞ்சாலையில் செல்லும் அனைத்து ரக வாகனங்களும் ஆபத்தைத் தவிர்க்கும் பொருட்டு, மிகக் குறைந்த வேகத்தில் எச்சரிக்கையுடன் ஊர்ந்து சென்று கொண்டிருக்கின்றன. பருவக்காற்று இன்னும் சில வாரங்களுக்கு நீடிக்கும் என்பதால் மின் உற்பத்தி மேலும் அதிகரிக்கும் என அதிகாரிகள் எதிர்பார்க்கின்றனர்.
