ரேஷன் கடைகளில் மத்திய அரசு அதிரடி மாற்றம்?  உடனே உங்கள் ரேஷன் கார்டை செக் பண்ணுங்க!

சென்னை , ஜூன் 26: தமிழகத்தில் உள்ள வறுமைக்கோட்டுக்குக் கீழ் வாழும் ஏழை எளிய மக்களின் பிரதான உணவு ஆதாரமாக விளங்கும் அந்தியோதியா அன்ன யோஜனா (AAY) ரேஷன் அட்டைகளுக்கான அரிசி விநியோக முறையில் முக்கிய மாற்றங்களைக் கொண்டு வர மத்திய அரசு தீவிரமாகப் பரிசீலித்து வருகிறது. தற்போது நடைமுறையில் உள்ள அட்டைக்கு 35 கிலோ அரிசி என்ற திட்டத்திற்குப் பதிலாக குடும்ப உறுப்பினர்களின் எண்ணிக்கையின் அடிப்படையில் தலா 7 கிலோ வீதம் அரிசியைக் குறைத்து வழங்க உணவு மற்றும் பொது விநியோகத் துறை பரிந்துரை செய்துள்ளது .

மானியச் சுமையும் தற்போதைய விநியோக முறையும்

தமிழகத்தில் பொது விநியோகத் திட்டத்தின் கீழ் ரேஷன் கடைகள் மூலமாக அரிசி, பருப்பு, சர்க்கரை உள்ளிட்ட அத்தியாவசிய உணவுப் பொருட்கள் தடையின்றி விநியோகம் செய்யப்பட்டு வருகின்றன. மாநிலம் முழுவதும் மொத்தம் 37,328 நியாயவிலைக் கடைகள் இயங்கி வரும் சூழலில் 2 கோடியே 25 லட்சத்து 93 ஆயிரத்து 654 குடும்ப அட்டைதாரர்கள் இதன் மூலம் பலன் பெற்று வருகின்றனர்.

தமிழ்நாடு நுகர்பொருள் வாணிபக் கழகத்திற்கு நடப்பு 2025-26 ஆம் நிதியாண்டிற்கான உணவு மானியமாக மட்டும் தமிழக அரசு சுமார் 14,000 கோடி ரூபாயை ஒதுக்கியுள்ளது. இதன் அடிப்படையில் பார்த்தால் ஒவ்வொரு குடும்ப அட்டைக்கும் ஒரு வருடத்திற்குச் சராசரியாக 6,000 ரூபாய் முதல் 6,500 ரூபாய் வரை அரசே மானியச் சுமையை ஏற்றுக்கொள்கிறது. ஏழை எளிய மக்கள் மட்டுமின்றி நடுத்தரக் குடும்பங்களுக்கும் இந்த ரேஷன் உணவுத் தானியங்கள் மிக முக்கியமான வாழ்வாதாரமாக விளங்குகின்றன.

ஐந்து வகை ரேஷன் அட்டைகளும் பயனாளிகளும்

தமிழகத்தில் குடும்பங்களின் பொருளாதார நிலை மற்றும் வருவாயை அடிப்படையாகக் கொண்டு ஐந்து வகையான ரேஷன் அட்டைகள் புழக்கத்தில் உள்ளன:

• PHH (முன்னுரிமை உள்ளவர்கள்): இந்தத் தகுதியின் கீழ் தமிழ்நாட்டில் 76 லட்சத்து 99 ஆயிரத்து 40 குடும்ப அட்டைகள் உள்ளன. இவர்களுக்கு மாதத்திற்குத் தலா 8 கிலோ அரிசி வழங்கப்படுகிறது.
• PHH-AAY (அந்தியோதியா அன்ன யோஜனா): வறுமைக்கோட்டுக்குக் கீழ் உள்ள மிகவும் ஏழை எளிய குடும்பங்களுக்கு வழங்கப்படும் இந்த அட்டைகளின் எண்ணிக்கை 18 லட்சத்து 64 ஆயிரத்து 600 ஆகும். இவர்களுக்குத் தற்போது மாதம் 35 கிலோ அரிசி வழங்கப்பட்டு வருகிறது.
• NPHH (முன்னுரிமை அற்றவர்கள்): அரிசி, சர்க்கரை உட்பட அனைத்துப் பொருட்களையும் பெறத் தகுதியான இந்த அட்டைகள் மொத்தம் 90 லட்சத்து 88 ஆயிரத்து 42 புழக்கத்தில் உள்ளன.
• NPHH-S (அரிசி தவிர்த்த பொருட்கள்): அரிசியைத் தவிர மற்ற பொருட்களைப் பெறும் இந்த அட்டைகளின் எண்ணிக்கை 10 லட்சத்து 605 ஆகும்.
• NPHH-NC (பொருட்கள் இல்லா அட்டை): ரேஷன் பொருட்களைப் பெறாமல், வெறும் முகவரிச் சான்றாக மட்டுமே பயன்படுத்தப்படும் அட்டைகள் இவைகளாகும்.

Also : DMK ஊழல்: தவெக அரசின் அதிரடிக்கு அண்ணாமலை வரவேற்பு! அவரின் முக்கிய ஊழல் புகார்களின் பட்டியல்!

புதிய பரிந்துரையும் உறுப்பினர்கள் கணக்கும்

தற்போதைய நடைமுறைப்படி PHH-AAY அட்டைகளில் குடும்ப உறுப்பினர்கள் எத்தனை பேர் இருந்தாலும், உறுப்பினர்களின் எண்ணிக்கையைக் கணக்கில் கொள்ளாமல் அட்டைக்கு 35 கிலோ அரிசி முழுமையாக வழங்கப்படுகிறது. ஆனால் மத்திய அரசின் புதிய ஆலோசனையின்படி இனி நபர் ஒருவருக்கு மாதம் 7 கிலோ என்ற அடிப்படையில் மட்டுமே அரிசி ஒதுக்கப்படும்.

ஒரு குடும்பத்தில் அதிகபட்சமாக ஐந்து உறுப்பினர்கள் இருந்தால் மட்டுமே முழுமையாக 35 கிலோ அரிசி கிடைக்கும். உதாரணமாக இரண்டு உறுப்பினர்கள் மட்டுமே உள்ள வறுமைக்கோட்டுக்குக் கீழ் உள்ள குடும்பத்திற்கு இனி மாதம் 14 கிலோ அரிசி மட்டுமே கிடைக்கும். அதேபோல நான்கு பேர் கொண்ட குடும்பத்திற்கு 28 கிலோ மட்டுமே கிடைக்கும் என்பதால் அவர்களுக்கு 7 கிலோ அரிசி குறையும் சூழல் உருவாகும்.

ஏற்கனவே ‘ஒரே நாடு ஒரே ரேஷன்’ திட்டம் மற்றும் குடும்ப உறுப்பினர்கள் அனைவருக்கும் பயோமெட்ரிக் மூலமாக விரல்ரேகை சரிபார்ப்பு கட்டாயம் போன்ற பல்வேறு சீர்திருத்தங்கள் மேற்கொள்ளப்பட்டுள்ள நிலையில் இந்த புதிய அறிவிப்பு பயனாளிகளுக்கு அதிர்ச்சியை ஏற்படுத்தியுள்ளது.

தேசிய உணவு பாதுகாப்பு சட்டத் திருத்தம்: பொதுமக்கள் கருத்து கேட்பு

மத்திய உணவு மற்றும் பொது விநியோகத் துறையானது 2013ஆம் ஆண்டின் தேசிய உணவு பாதுகாப்புச் சட்டத்தில் திருத்தங்களை மேற்கொள்வதற்கான முன்மொழிவுகளை வழங்கியுள்ளது. இதன்படி உருவாக்கப்பட்டுள்ள “தேசிய உணவு பாதுகாப்பு திருத்த மசோதா 2026” மீது பொதுமக்கள் மற்றும் தகுதியான அமைப்புகள் தங்களுடைய கருத்துக்களையும் பரிந்துரைகளையும் சமர்ப்பிக்கலாம் என்று அறிவிக்கப்பட்டுள்ளது. இத்திருத்த மசோதா மீதான கருத்துக்களைத் தெரிவிக்க வரும் ஜூலை 13ஆம் தேதி வரை கால அவகாசம் வழங்கப்பட்டுள்ளது.

கள நிலவரமும் பொதுமக்களின் மாறுபட்ட கருத்துகளும்

இந்த திருத்த மசோதா குறித்து வறுமைக்கோட்டுக்குக் கீழ் வாழும் அடித்தட்டு மக்களிடம் கருத்து கேட்கப்பட்டபோது அவர்கள் மாறுபட்ட மற்றும் கவலையான கருத்துகளைப் பகிர்ந்து கொண்டனர்:

“ஏற்கனவே சில கடைகளில் 14 அல்லது 15 கிலோ தான் கொடுக்கிறார்கள் 35 கிலோ முழுமையாகக் கிடைப்பதில்லை. இப்போது நபர் வாரியாகக் குறைத்தால் ஏழை நடுத்தர மக்கள் மிகவும் பாதிக்கப்படுவார்கள். பழையபடி 35 கிலோ அரிசி கொடுப்பதே நல்வாழ்விற்கு வழிவகுக்கும்” என ஒரு தரப்பினர் கவலை தெரிவிக்கின்றனர்.

அதே வேளையில் மற்றொரு பயனாளி கூறுகையில், “இந்தத் திட்டம் வரவேற்கத்தக்கதுதான். ஆனால் தகுதியான ஏழைகளுக்கு இது சரியாகச் சென்றடைய வேண்டும். வறுமைக்கோட்டுக்குக் கீழ் இல்லாத வசதியானவர்களும், வருமான வரி செலுத்துபவர்களும் கூட தவறான வழிகளில் இந்த 35 கிலோ அரிசியைப் பெற்று வருகிறார்கள். எனவே அட்டைகளை முறையான சரிபார்ப்பு (Verification) செய்து உண்மையான ஏழைகளுக்குப் பொருட்கள் கிடைப்பதை அரசு உறுதி செய்ய வேண்டும்” என்றார்.

மாநில அரசின் முடிவு என்னவாக இருக்கும்?

மத்திய நுகர்வோர் விவகாரங்கள் மற்றும் பொது விநியோக அமைச்சகம் இந்த நபர் வாரியான அரிசி குறைப்புப் பரிந்துரையை ஏற்று, எதிர்காலத்தில் சட்டமாக அமல்படுத்தினாலும் மாநில அரசுகளுக்கு இதில் கூடுதல் அதிகாரம் உள்ளது. மத்திய அரசின் இந்த அரிசி குறைப்பு முடிவினால் ஏழை எளிய மக்கள் பாதிக்கப்படாமல் இருக்க மாநில அரசே தனது சொந்த நிதி ஒதுக்கீட்டின் மூலம் கூடுதல் மானியச் சுமையை ஏற்றுக்கொண்டு தற்போது வழங்கப்பட்டு வரும் 35 கிலோ அரிசி விநியோக முறையையே தமிழகத்தில் தொடரச் செய்வதற்கும் வாய்ப்புகள் உள்ளதாக விநியோகத் துறை வட்டாரங்கள் தெரிவிக்கின்றன.