ஈரான் , ஜூன் 20 : உலகமே எதற்கு அஞ்சியதோ, அது தற்போது நடந்துவிட்டது. சர்வதேச நாடுகளின் வேண்டுகோள்களைப் புறந்தள்ளிவிட்டு, உலக வர்த்தகத்தின் மிக முக்கியப் பாதையான ஹார்முஸ் ஜலசந்தியை (Strait of Hormuz) முழுமையாக மூடுவதாக ஈரான் அதிகாரப்பூர்வமாக அறிவித்துள்ளது. லெபனானில் இஸ்ரேல் நடத்திய அடுத்தடுத்த ராணுவத் தாக்குதல்களுக்குப் பதிலடி கொடுக்கும் வகையில் இந்த அதிரடி முடிவை எடுத்துள்ளதாக ஈரானின் கூட்டு ராணுவக் கட்டளை அமைப்பு தெரிவித்திருக்கிறது. ஈரானின் இந்தத் திடீர் நடவடிக்கை காரணமாக மத்திய கிழக்கு பிராந்தியத்தில் மீண்டும் போர் மேகங்கள் சூழ்ந்துள்ளதோடு சர்வதேசச் சந்தையில் கச்சா எண்ணெய் விநியோகம் முற்றிலுமாக முடங்கும் அபாயம் ஏற்பட்டுள்ளது.
கடந்த சில வாரங்களாகவே மத்திய கிழக்கு பகுதியில் நிலவி வந்த பதற்றத்தைத் தணிக்கப் பல்வேறு சர்வதேச அமைப்புகள் முயன்று வந்தன. இதன் பலனாக ஹார்முஸ் ஜலசந்தி வழியாகக் பயணிக்கும் கப்பல்களுக்கு 60 நாட்கள் தற்காலிக அமைதி ஒப்பந்தம் ஒன்று எட்டப்பட்டது. இந்த ஒப்பந்தத்தின்படி கச்சா எண்ணெய் ஏற்றிச் செல்லும் பிரம்மாண்டக் கப்பல்கள் எந்தவிதக் கூடுதல் கட்டணமும் இன்றி தங்கு தடையின்றிப் பயணிக்கலாம் என்று அறிவிக்கப்பட்டிருந்தது. உலக நாடுகள் அனைத்தும் இந்த அமைதி ஒப்பந்தத்தை பெரிதும் நம்பியிருந்தன.
also : நெல்லையில் 20 நாட்களில் 19 போக்சோ வழக்குகள்: அடுத்தடுத்து இருவர் கைது
குறிப்பாக இந்தியா போன்ற வளரும் நாடுகளுக்கு இந்த அமைதி ஒப்பந்தம் ஒரு மிகப்பெரிய நிம்மதியைத் தந்தது. இந்தியாவிற்கு வர வேண்டிய கச்சா எண்ணெய் அனைத்தும் எவ்விதத் தடங்கலும் இல்லாமல் சரியான நேரத்தில் வந்து சேர்ந்தால் உள்நாட்டில் பெட்ரோல், டீசல் மற்றும் எல்பிஜி (LPG) சிலிண்டர்களின் தட்டுப்பாடு நீங்கும் என்று எதிர்பார்க்கப்பட்டது. அதுமட்டுமன்றி சர்வதேசச் சந்தையில் கச்சா எண்ணெய் விலை கட்டுக்குள் இருக்கும் பட்சத்தில் இந்தியாவில் எரிபொருட்களின் விலை கணிசமாகக் குறைக்கப்படும் அல்லது தற்போதைய விலை ஏற்றம் தணிக்கப்படும் என்ற மிகப்பெரிய எதிர்பார்ப்பு நிலவியது. இந்தச் சூழலில்தான் அனைத்து கணக்குகளையும் தலைகீழாக மாற்றும் வகையில் ஈரானின் இந்த அறிவிப்பு வெளியாகி உள்ளது.
லெபனானில் இஸ்ரேல் தொடர்ந்து நடத்தி வரும் ராணுவ நடவடிக்கைகளே தங்களின் இந்த முடிவுக்குக் காரணம் என்று ஈரான் தரப்பில் சுட்டிக்காட்டப்பட்டுள்ளது. இதனால் ஆத்திரமடைந்த ஈரானின் கூட்டு ராணுவக் கட்டளை அமைப்பு ஹார்முஸ் ஜலசந்தியை மீண்டும் மூடுவதாக அதிரடி உத்தரவைப் பிறப்பித்துள்ளது. உலக அளவில் புவிசார் அரசியலிலும் சர்வதேசப் பொருளாதாரத்திலும் மிக முக்கியப் பங்கு வகிக்கும் இந்த ஜலசந்தி மூடப்பட்டிருப்பது உலக நாடுகளிடையே பெரும் அதிர்ச்சியை ஏற்படுத்தி இருக்கிறது.
ஹார்முஸ் ஜலசந்தி என்பது உலகின் ஒட்டுமொத்த கச்சா எண்ணெய் போக்குவரத்தில் மூன்றில் ஒரு பங்கைத் தீர்மானிக்கும் மிக முக்கியமான கடல் வழிப் பாதையாகும். தற்போது இந்தப் பாதை மூடப்பட்டுள்ளதால் பல மில்லியன் பீப்பாக்கள் கச்சா எண்ணெயைச் சுமந்துகொண்டு ஏராளமான சரக்குக் கப்பல்கள் நடுவழியிலேயே தேங்கி நிற்கின்றன. இந்தக் கப்பல்கள் மேற்கொண்டு நகர முடியாமல் அங்கேயே முடங்கியிருப்பதால், சர்வதேச அளவில் கச்சா எண்ணெய்க்கான தட்டுப்பாடு உடனடியாக அதிகரிக்கும் சூழல் உருவாகி உள்ளது.
இந்தத் திடீர் அறிவிப்பின் நேரடி எதிரொலியாக உலகச் சந்தையில் கச்சா எண்ணெய் விலை வரலாறு காணாத அளவிற்கு மிகக் கடுமையாக உயரக்கூடும் என்ற அச்சம் பொருளாதார வல்லுநர்களிடையே எழுந்துள்ளது. எண்ணெய் விலை உயர்ந்தால் அது இந்தியா உள்ளிட்ட இறக்குமதியை மட்டுமே நம்பியிருக்கும் நாடுகளின் பொருளாதாரத்தை நேரடியாகப் பாதிக்கும். எரிபொருள் விலை உயர்வு, அத்தியாவசியப் பொருட்களின் விலை ஏற்றத்திற்கு வழிவகுக்கும் என்பதால் உலக நாடுகள் கவலையடைந்துள்ளன.
ஈரானின் இந்த நடவடிக்கை வெறும் பொருளாதாரப் பாதிப்பை மட்டும் ஏற்படுத்தவில்லை. மாறாக அமெரிக்கா மற்றும் இஸ்ரேலுக்கு எதிரான ஈரானின் இந்த நேரடிப் போக்கினால் மத்திய கிழக்கு பிராந்தியத்தில் போர்ச் சூழல் மேலும் தீவிரம் அடைந்திருப்பதை மிகத் தெளிவாகக் காட்டுகிறது. தற்காலிக அமைதி ஒப்பந்தங்கள் அனைத்தும் காற்றில் பறக்கவிடப்பட்டு மீண்டும் ஒரு முழு அளவிலான போரை நோக்கி இந்தப் பிராந்தியம் தள்ளப்பட்டிருப்பதாகவே அரசியல் நோக்கர்கள் கருதுகின்றனர். அமெரிக்கா மற்றும் அதன் நட்பு நாடுகள் இதற்கு எவ்வாறு எதிர்வினையாற்றப் போகின்றன என்பதைப் பொறுத்தே அடுத்தகட்ட நகர்வுகள் அமையும் என்பதால் உலக அரங்கில் ஹார்முஸ் ஜலசந்திப் பகுதி மீண்டும் ஒரு பதற்றமான போர்க்களமாக மாறியிருக்கிறது.
