சென்னை , ஏப்ரல் 4: சென்னை அணி தொடர்ந்து இரண்டு போட்டிகளில் தோல்வியைத் தழுவி அதிர்ச்சி அளித்துள்ளது. குறிப்பாக தங்களின் கோட்டையாக கருதப்படும் சென்னை சேப்பாக்கம் எம்.ஏ.சிதம்பரம் மைதானத்தில் நடந்த விறுவிறுப்பான ஆட்டத்தில் பஞ்சாப் கிங்ஸ் அணியிடம் 5 விக்கெட் வித்தியாசத்தில் சென்னை அணி வீழ்ந்தது ரசிகர்களிடையே பெரும் கவலையையும் விவாதத்தையும் ஏற்படுத்தியுள்ளது. இந்தத் தொடர் தோல்விகள் நடப்புத் தொடரில் சிஎஸ்கே அணியின் ஒட்டுமொத்த பலம் குறித்தே பல்வேறு கேள்விகளை எழுப்பியுள்ளது.
அன்றைய போட்டியில் டாஸ் இழந்து முதலில் பேட்டிங் செய்த சென்னை சூப்பர் கிங்ஸ் அணி அதிரடியாக விளையாடி 200 ரன்களுக்கும் மேல் குவித்து இமாலய இலக்கை நிர்ணயித்தது. பேட்டிங்கிற்கு சாதகமான சேப்பாக்கம் ஆடுகளத்தில் இந்த ஸ்கோர் பாதுகாப்பான ஒன்றாகவே கருதப்பட்டது. ஆனால் சென்னை அணியின் பந்துவீச்சை துவம்சம் செய்த பஞ்சாப் கிங்ஸ் அணியின் பேட்ஸ்மேன்கள் ஆரம்பம் முதலே அதிரடி ஆட்டத்தை வெளிப்படுத்தி இலக்கை மிக எளிதாக எட்டிப்பிடித்தனர். இவ்வளவு பெரிய இலக்கை நிர்ணயித்த பிறகும் அதனை பாதுகாக்க முடியாமல் போனது சென்னை அணி நிர்வாகத்திற்கு விடுக்கப்பட்ட தகுந்த எச்சரிக்கையாகவே பார்க்கப்படுகிறது.
ALso : சென்னை எண்ணூரில் புதிய மாற்றம்: திருநங்கைகளுக்கான “Pastoral Desk” தொடங்கிய தேவாலயம்
சென்னை அணியின் இந்தத் தொடர் சரிவு குறித்து இந்திய அணியின் முன்னாள் கேப்டனும் புகழ்பெற்ற வர்ணனையாளருமான சுனில் கவாஸ்கர் தனது கவலையை வெளிப்படையாகப் பகிர்ந்துள்ளார். சென்னை அணியின் தற்போதைய மிகப்பெரிய பலவீனமே அதன் பந்துவீச்சுப் பிரிவுதான் என்று அவர் சுட்டிக்காட்டியுள்ளார். சிஎஸ்கே அணியின் பந்துவீச்சாளர்கள் ரன்களை வாரிக் கொடுக்கும் பட்சத்தில் போட்டிகளில் வெற்றி பெற வேண்டுமானால் ஒவ்வொரு ஆட்டத்திலும் சென்னை பேட்ஸ்மேன்கள் 225 முதல் 230 ரன்கள் வரை அடிக்க வேண்டிய கட்டாயத்திற்கு தள்ளப்படுவார்கள் என்று கவாஸ்கர் எச்சரித்துள்ளார்.
கடந்த ஐபிஎல் சீசனிலேயே சென்னை சூப்பர் கிங்ஸ் அணியின் செயல்பாடு எதிர்பார்த்த அளவிற்கு சிறப்பாக அமையவில்லை. அணியின் சமநிலையை (Balance) மீட்டெடுக்கும் நோக்கில் கார்த்திக் சர்மா போன்ற இளம் மற்றும் புதிய வீரர்கள் பெரும் எதிர்பார்ப்புடன் இந்த சீசனில் அணியில் சேர்க்கப்பட்டனர். எனினும் தொடக்க ஆட்டங்களில் இவர்களால் ஆட்டத்தில் எந்தவொரு தாக்கத்தையும் ஏற்படுத்த முடியவில்லை. எல்லாவற்றிற்கும் மேலாக அணியின் முதுகெலும்பாக விளங்கும் எம்.எஸ்.தோனி காயம் காரணமாக ஆரம்பப் போட்டிகளில் விளையாடாதது மைதானத்தில் சென்னை அணியின் வியூக வகுப்பிலும் திட்டங்களை செயல்படுத்துவதிலும் மிகப்பெரிய பின்னடைவை ஏற்படுத்தியிருக்கிறது.
தோல்வி குறித்துப் பேசிய சென்னை அணியின் கேப்டன் ருதுராஜ் கெய்க்வாட் அன்றைய தினம் சுழற்பந்து வீச்சாளர்களுக்கு (Spinners) சாதகமாக அமையாததே தோல்விக்கு முக்கியக் காரணம் என்று குறிப்பிட்டுள்ளார்.
