சென்னை , ஏப்ரல் 4: சிபிஎஸ்இ பாடத்திட்டத்தில் மும்மொழி கொள்கையை கட்டாயமாக்கும் மத்திய அரசின் அதிரடி திட்டத்திற்கு எதிராக தமிழக முதலமைச்சர் மு.க.ஸ்டாலின் மத்திய அரசுக்கு எதிராக முன்வைத்துள்ள கடுமையான விமர்சனங்கள் இந்த விவகாரத்தை ஒட்டுமொத்த இந்திய அளவில் உற்றுநோக்க வேண்டிய தேசிய பிரச்சினையாக மாற்றியிருக்கிறது.
திருச்சியில் நடைபெற்ற செய்தியாளர்கள் சந்திப்பில் பேசிய தமிழக பள்ளிக்கல்வித்துறை அமைச்சர் அன்பில் மகேஷ் பொய்யாமொழி, மாநிலத்தின் பாரம்பரியமான இருமொழிக் கொள்கையை எந்தச் சூழ்நிலையிலும் மாற்றிக்கொள்ளப் போவதில்லை என்று திட்டவட்டமாக அறிவித்துள்ளார் .தமிழகம் தனது மொழி மற்றும் கலாச்சார அடையாளத்தை பாதுகாப்பதில் ஒருபோதும் சமரசத்திற்கு இடம் தராது என்று குறிப்பிட்ட அவர் பேரறிஞர் அண்ணா மற்றும் தந்தை பெரியார் காலந்தொட்டே தமிழகம் தமிழ் மற்றும் ஆங்கிலம் ஆகிய இரு மொழிகளை மட்டுமே கற்பிக்கும் கொள்கையில் உறுதியாக இருப்பதை சுட்டிக்காட்டினார்.
மத்திய கல்வி வாரியமான சிபிஎஸ்இ வரும் 2026-27 கல்வியாண்டில் இருந்து இந்த மும்மொழி கொள்கையை நாடு முழுவதும் கட்டம் கட்டமாக அறிமுகப்படுத்த விரிவான திட்டங்களை வகுத்து வருகிறது .இந்த புதிய கல்வி வழிமுறையின்படி பள்ளிகளில் பயிலும் மாணவர்கள் குறைந்தபட்சம் இரண்டு இந்திய மொழிகள் உட்பட மொத்தம் மூன்று மொழிகளை கட்டாயமாகக் கற்க வேண்டும் என்று முன்மொழியப்பட்டுள்ளது.
ஆனால், இந்த அறிவிப்பை மறைமுகமாக ஹிந்தியை திணிக்கும் ஒரு தந்திரமாகவே தமிழக அரசு பார்க்கிறது .இதுகுறித்து கருத்து தெரிவித்துள்ள முதலமைச்சர் மு.க.ஸ்டாலின் இத்தகைய முடிவுகள் இந்தியாவின் பன்முகத்தன்மையை முற்றிலும் சிதைத்துவிடும் என்றும் மாநிலங்களின் கல்வி உரிமைகளைப் பறிக்கும் கூட்டாட்சி தத்துவத்திற்கு எதிரான முயற்சி என்றும் பகிரங்கமாகக் குற்றம் சாட்டியுள்ளார்.
இந்த விவகாரத்தில் தமிழக அரசின் கொள்கை உறுதிக்கு சான்றாக மற்றொரு முக்கிய தகவலும் வெளியாகியுள்ளது .மத்திய அரசின் புதிய கல்வித் திட்டங்களை ஏற்றுக்கொண்டால் மாநிலங்களுக்கு வழங்கப்படும் என்று அறிவிக்கப்பட்ட சுமார் 3,000 கோடி ரூபாய்க்கும் அதிகமான சிறப்பு நிதி ஊக்கத்தொகையை தமிழக அரசு அதிரடியாக நிராகரித்துள்ளது .பணத்திற்காக மாநிலத்தின் மொழி அடையாளத்தையும் கொள்கையையும் விட்டுக்கொடுக்க முடியாது என்ற அரசின் இந்த முடிவு கல்வித்துறையில் பெரும் பரபரப்பை ஏற்படுத்தியுள்ளது.
அரசியல் களத்திற்கு அப்பாற்பட்டு இந்த மும்மொழி கொள்கை குறித்து மாணவர்களும் பெற்றோர்களும் பெரும் கவலையில் ஆழ்ந்துள்ளனர் .ஏற்கனவே சிபிஎஸ்இ பாடத்திட்டங்கள் கடினமாக இருக்கும் சூழலில் கூடுதலாக மற்றொரு மொழியைக் திணிப்பது மாணவர்களின் மன அழுத்தத்தை அதிகரித்து ஒட்டுமொத்த கல்வித் தரத்தையும் பாதிக்கும் என்றும் மொழி மாற்றம் என்பது வெறும் கல்வி சார்ந்தது மட்டுமல்லாமல், எதிர்கால வேலைவாய்ப்பு, சமூக சமநிலை மற்றும் மாணவர்களின் அறிவுத்திறன் வளர்ச்சி ஆகியவற்றிலும் நீண்டகால தாக்கத்தை ஏற்படுத்தும் என்று அவர்கள் எச்சரிக்கின்றனர்.
