.நெல்லை,மே 29 : தமிழகத்தையே உலுக்கிய மென்பொருள் பொறியாளர் கவின் செல்வ கணேஷ் ஆணவக்கொலை வழக்கில் திடீர் திருப்பமாக, பெண் சப்-இன்ஸ்பெக்டர் கிருஷ்ணகுமாரியை சிபிசிஐடி போலீசார் அதிரடியாகக் கைது செய்துள்ளனர். இந்த கொடூரக் கொலையில் சதித்திட்டம் தீட்டியதாக அவர் மீது சுமத்தப்பட்டுள்ள குற்றச்சாட்டின் அடிப்படையில் இந்நடவடிக்கை எடுக்கப்பட்டுள்ளது. இதன் மூலம், இந்த வழக்கில் இதுவரை கைதானவர்களின் எண்ணிக்கை 4 ஆக உயர்ந்துள்ளது.
தூத்துக்குடி மாவட்டம், ஏரல் அருகே உள்ள ஆறுமுகமங்கலம் பகுதியைச் சேர்ந்தவர் கவின் செல்வ கணேஷ் (27). இவர் சென்னையில் உள்ள ஒரு முன்னணி தகவல் தொழில்நுட்ப (ஐடி) நிறுவனத்தில் மென்பொருள் பொறியாளராகப் பணியாற்றி வந்தார். கடந்த ஆண்டு ஜூலை 27-ஆம் தேதி, நெல்லை கேடிசி நகர் பகுதியில் தனது இருசக்கர வாகனத்தில் சென்றுகொண்டிருந்தபோது, மர்ம கும்பல் ஒன்றால் கவின் செல்வ கணேஷ் வழிமறிக்கப்பட்டு கொடூரமாக வெட்டிப் படுகொலை செய்யப்பட்டார். மக்கள் நடமாட்டம் மிகுந்த பகுதியில் அரங்கேறிய இந்த பயங்கரக் கொலைச் சம்பவம் தமிழகம் முழுவதும் பெரும் அதிர்வலைகளை ஏற்படுத்தியது.
Also read: திருச்செந்தூர் கோவில் அர்ச்சகரின் ‘ஜிபே’ விவகாரம்: ரகசிய ஆய்வில் அமைச்சரையே அதிரவைத்த சம்பவம்
இது தொடர்பாக நெல்லை மாநகர போலீசார் வழக்குப்பதிவு செய்து முதல்கட்ட விசாரணையைத் தொடங்கினர். கொலையுண்ட கவின் செல்வ கணேஷும், சித்த மருத்துவரான சுபாஷினி என்பவரும் காதலித்து வந்ததும், இவர்களது காதலுக்கு சுபாஷினியின் குடும்பத்தினர் கடுமையான எதிர்ப்பு தெரிவித்து வந்ததும் விசாரணையில் தெரியவந்தது. காதலைக் கைவிட மறுத்ததால், திட்டமிட்டு இந்த ஆணவக்கொலை அரங்கேற்றப்பட்டது அம்பலமானது. இதனையடுத்து, முதல்கட்டமாக சுபாஷினியின் சகோதரர் சுர்ஜித் மற்றும் அவரது தந்தையான சப்-இன்ஸ்பெக்டர் சரவணன் ஆகிய இருவரையும் மாநகர போலீசார் கைது செய்து சிறையில் அடைத்தனர்.
இவ்வழக்கின் முக்கியத்துவத்தைக் கருதியும், காவல்துறையைச் சேர்ந்தவர்களுக்கே இதில் தொடர்பு இருந்ததாலும், வழக்கை நியாயமான முறையில் விசாரிக்கக் கோரி சென்னை உயர் நீதிமன்ற மதுரை கிளையில் மனுத்தாக்கல் செய்யப்பட்டது. நீதிமன்ற உத்தரவைத் தொடர்ந்து, இந்த ஆணவக்கொலை வழக்கு நெல்லை மாநகர போலீசாரிடமிருந்து சிபிசிஐடி பிரிவுக்கு மாற்றப்பட்டது.
விசாரணையைத் கையில் எடுத்த சிபிசிஐடி போலீசார், சிறையில் இருந்த தந்தை சரவணன் மற்றும் மகன் சுர்ஜித் ஆகிய இருவரையும் காவலில் எடுத்து தீவிர விசாரணைக்கு உட்படுத்தினர். அவர்களது செல்போன் உரையாடல்கள் மற்றும் கொலை நடந்த அன்று பதிவான தடயங்களை ஆய்வு செய்ததில் வழக்கில் அடுத்தடுத்து புதிய திருப்பங்கள் ஏற்பட்டன. அந்த வகையில், சுர்ஜித்தின் பெரியம்மா மகனான ஜெயபால் (29) என்பவரை சிபிசிஐடி போலீசார் கடந்த சில நாட்களுக்கு முன்பு கைது செய்தனர். கொலைச் சம்பவத்திற்குப் பிறகு, குற்றவாளிகள் தப்பிச் செல்லவும், அவர்களுக்குப் பாதுகாப்பான அடைக்கலம் கொடுக்கவும் ஜெயபால் உதவியதாகப் போலீசார் தரப்பில் தெரிவிக்கப்பட்டது. அத்துடன் கொலையின் முக்கியத் தடயங்களை மறைப்பதிலும் இவருக்குப் பங்கு இருப்பது உறுதிசெய்யப்பட்டது. இதையடுத்து ஜெயபாலும் பாளையங்கோட்டை மத்திய சிறையில் அடைக்கப்பட்டார்.
ஆணவக்கொலையின் பின்னணியில் உள்ள முழுமையான சதித்திட்டத்தை வெளிக்கொண்டு வரும் நோக்கில் சிபிசிஐடி போலீசார் விசாரணையை மேலும் தீவிரப்படுத்தினர். கொலை குறித்து முன்கூட்டியே திட்டமிட்டது யார், இதில் குடும்பத்தில் உள்ள மற்ற உறுப்பினர்களின் பின்னணி என்ன என்பது குறித்து சுபாஷினி மற்றும் அவரது தாயாரான பெண் சப்-இன்ஸ்பெக்டர் கிருஷ்ணகுமாரி ஆகியோரிடம் சிபிசிஐடி அதிகாரிகள் தனித்தனியாகவும், கூட்டாகவும் வைத்துப் பல மணி நேரம் தீவிர விசாரணை நடத்தினர்.
ஏற்கனவே கைதான சரவணன், சுர்ஜித் ஆகியோரிடம் பெறப்பட்ட வாக்குமூலங்கள், செல்போன் அழைப்பு விவரங்கள் மற்றும் தற்போதைய விசாரணையில் கிடைத்த முக்கிய ஆவணங்களின் அடிப்படையில், கவின் செல்வ கணேஷை படுகொலை செய்ய தீட்டப்பட்ட சதித்திட்டத்தில் கிருஷ்ணகுமாரிக்கும் நேரடித் தொடர்பு இருப்பது சிபிசிஐடி போலீசாரால் கண்டுபிடிக்கப்பட்டது. கொலையை மறைப்பதற்கும், அதற்குத் தூண்டுதலாக இருந்ததற்கும் போதிய ஆதாரங்கள் திரட்டப்பட்டதைத் தொடர்ந்து, இந்த வழக்கில் 4-வது நபராக பெண் சப்-இன்ஸ்பெக்டர் கிருஷ்ணகுமாரியை சிபிசிஐடி போலீசார் அதிரடியாகக் கைது செய்தனர்.
சிபிசிஐடி போலீஸ் டிஎஸ்பி ராஜ்குமார் நவ்ரோஜ், இன்ஸ்பெக்டர் உலகராணி மற்றும் சப்-இன்ஸ்பெக்டர்கள் அடங்கிய தனிப்படையினர் இந்த வழக்கை மிகத் தீவிரமாகத் தொடர்ந்து விசாரித்து வருகின்றனர். கொலை வழக்கில் சட்டம்-ஒழுங்கைப் பாதுகாக்க வேண்டிய பொறுப்பில் உள்ள காவல் துறையைச் சேர்ந்த தந்தை மற்றும் பெரியம்மா ஆகிய இரு சப்-இன்ஸ்பெக்டர்கள் அடுத்தடுத்துக் கைது செய்யப்பட்டுள்ள சம்பவம் நெல்லை மற்றும் தென் மாவட்ட வட்டாரத்தில் பெரும் பரபரப்பையும், அதிர்ச்சியையும் ஏற்படுத்தியுள்ளது. இந்த வழக்கில் மேலும் சிலருக்குத் தொடர்பு இருக்கலாம் என்ற கோணத்தில் சிபிசிஐடி போலீசார் தொடர்ந்து அடுத்தகட்ட நடவடிக்கைகளை மேற்கொண்டு வருகின்றனர்.
