தேனி , ஏப்ரல் 24 : தேனி நாடாளுமன்றத் தொகுதிக்குட்பட்ட வெள்ளிமலை மலைப்பகுதியில் அமைந்துள்ள மிகச்சிறிய வாக்குச்சாவடி ஒன்று நூறு சதவீத வாக்குப்பதிவை எட்டி ஒட்டுமொத்த தமிழ்நாட்டின் கவனத்தையும் ஈர்த்துள்ளது. இந்த வாக்குச்சாவடியில் மொத்தம் ஐந்து வாக்காளர்கள் மட்டுமே உள்ள நிலையில் அவர்கள் அனைவரும் தங்களது ஜனநாயகக் கடமையை தவறாமல் ஆற்றியுள்ளனர். தமிழகத்தின் நகர்ப்புறப் பகுதிகளில் வாக்குப்பதிவு சதவீதத்தை அதிகரிக்க தேர்தல் ஆணையம் பல்வேறு விழிப்புணர்வுப் பணிகளை மேற்கொண்டு வரும் வேளையில் இந்த மலைக்கிராம மக்களின் செயல்பாடு ஒரு சிறந்த முன்னுதாரணமாக மாறியுள்ளது.
விஜய் மகள் பகிர்ந்ததாக கூறப்படும் Instagram Story குடும்ப சர்ச்சைக்கு முற்றுப்புள்ளியா?
வியாழக்கிழமை காலை ஏழு மணிக்கு வாக்குப்பதிவு தொடங்கிய சில நிமிடங்களிலேயே இந்த மையத்தில் விறுவிறுப்பு தொற்றிக்கொண்டது. காலை 7.15 மணிக்குள் ந்.பால், பி.சுதா, எஸ்.செந்தில் மற்றும் எஸ்.ஜெயராணி ஆகிய நான்கு வாக்காளர்கள் தங்களது வாக்குகளைப் பதிவு செய்துவிட்டனர். இதனைத் தொடர்ந்து ஐந்தாவது வாக்காளரான ஜே.ரோஹித் என்பவர் மாலை 6 மணியளவில் வாக்குச்சாவடிக்கு வந்து தனது வாக்கினைப் பதிவு செய்தார். அவர் தனது வாக்கைச் செலுத்தியதைத் தொடர்ந்து இந்த மையத்தில் நூறு சதவீத வாக்குப்பதிவு அதிகாரப்பூர்வமாக உறுதி செய்யப்பட்டது.
குறைந்த எண்ணிக்கையிலான வாக்காளர்கள் இருந்தாலும் தேர்தல் நடத்தை விதிகளின்படி வாக்குப்பதிவு முடியும் நேரம் வரை அதிகாரிகள் அங்கு பணியில் இருந்தனர். ஒவ்வொரு வாக்கும் நாட்டின் எதிர்காலத்தைத் தீர்மானிக்கும் சக்தி கொண்டது என்பதை இந்த வெள்ளிமலை கிராம மக்கள் சொல்லாமல் சொல்லியிருக்கிறார்கள் என்று தேர்தல் அதிகாரிகள் நெகிழ்ச்சியுடன் குறிப்பிட்டனர்.
