Chennai , வானிலை ஆய்வு மையம் : தமிழகத்தில் 14ஆம் தேதி வரை கனமழைக்கு வாய்ப்பு என வானிலை ஆய்வு மையம் எச்சரிக்கை விடுத்துள்ளது. 19 மாவட்டங்களுக்கு முக்கிய அலர்ட் வெளியீடு.
தமிழகத்தில் கோடை வெப்பம் உச்சத்தை எட்டியுள்ள நிலையில், திடீரென வானிலை மாற்றம் ஏற்பட்டுள்ளது. இன்று தொடங்கி வரும் 14ஆம் தேதி வரை மாநிலம் முழுவதும் பரவலாக கனமழை பெய்யும் வாய்ப்பு இருப்பதாக இந்திய வானிலை ஆய்வு மையம் தெரிவித்துள்ளது. குறிப்பாக தென் தமிழக மற்றும் டெல்டா மாவட்டங்களுக்கு அதிக எச்சரிக்கை விடுக்கப்பட்டுள்ளதால் பொதுமக்கள் கவனமாக இருக்க அறிவுறுத்தப்பட்டுள்ளனர்.
Also Read : தமிழகம் முழுவதும் போராட்டம் தீவிரம் – பரபரப்பின் உச்சம்
சென்னை உள்ளிட்ட பல்வேறு பகுதிகளில் ஏற்கனவே மழை பதிவாகி வரும் நிலையில், அடுத்த சில நாட்களில் இடி மின்னலுடன் கூடிய பலத்த மழை பெய்யக்கூடும் என அதிகாரப்பூர்வ தகவல்கள் வெளியாகியுள்ளன. குமரிக்கடல் முதல் தென்மேற்கு மத்திய பிரதேசம் வரை விதர்பா, மரத்வாடா, உள் கர்நாடகம், ராயலசீமா மற்றும் தமிழகம் வழியாக வளிமண்டல காற்றழுத்த தாழ்வு பாதை நிலவி வருகிறது. இதனுடன் குமரிக்கடல் பகுதிகளில் சுமார் 1.5 கிலோமீட்டர் உயரத்தில் வளிமண்டல சுழற்சியும் உருவாகியுள்ளது.
இந்த இரு வானிலை அமைப்புகளின் தாக்கத்தால் தமிழகம் மற்றும் புதுச்சேரியின் பல பகுதிகளில் பரவலாக மழை பெய்யும் சூழல் உருவாகியுள்ளதாக வானிலை ஆய்வு மையம் விளக்கியுள்ளது. இன்றைய தினம் முதல் நீலகிரி, கோயம்புத்தூர், ஈரோடு, திருப்பூர், திண்டுக்கல், மதுரை, தேனி, தென்காசி, விருதுநகர், திருநெல்வேலி, கன்னியாகுமரி, சிவகங்கை, ராமநாதபுரம், தூத்துக்குடி, தஞ்சாவூர், திருவாரூர், நாகப்பட்டினம், மயிலாடுதுறை மற்றும் புதுக்கோட்டை உள்ளிட்ட மாவட்டங்களில் கனமழைக்கு வாய்ப்பு இருப்பதாக தெரிவிக்கப்பட்டுள்ளது.
மேலும், மணிக்கு 40 முதல் 50 கிலோமீட்டர் வேகத்தில் பலத்த காற்றுடன் மழை பெய்யக்கூடும் என எச்சரிக்கை விடுக்கப்பட்டுள்ளது.
12, 13, 14ஆம் தேதிகளில் அதிக பாதிப்பு எங்கு?
12 மற்றும் 13ஆம் தேதிகளில் கன்னியாகுமரி, திருநெல்வேலி, தூத்துக்குடி, ராமநாதபுரம், சிவகங்கை, கடலூர், தஞ்சாவூர், திருவாரூர், நாகப்பட்டினம், மயிலாடுதுறை மற்றும் புதுக்கோட்டை மாவட்டங்களில் கனமழை தீவிரமாக இருக்கும் என தெரிவிக்கப்பட்டுள்ளது. அதேபோல் 14ஆம் தேதி திருநெல்வேலி, தூத்துக்குடி, கன்னியாகுமரி, கடலூர், தஞ்சாவூர், மயிலாடுதுறை, திருவாரூர், ராமநாதபுரம், காஞ்சிபுரம், விழுப்புரம், திருவண்ணாமலை, திருச்சிராப்பள்ளி, புதுக்கோட்டை மற்றும் செங்கல்பட்டு உள்ளிட்ட பகுதிகளிலும் கனமழை பெய்யும் வாய்ப்பு இருப்பதாக கூறப்பட்டுள்ளது.
சென்னையிலும் தொடரும் மழை
சென்னையில் கடந்த சில மணி நேரங்களாக வானம் மேகமூட்டத்துடன் காணப்பட்ட நிலையில் பல பகுதிகளில் மழை பதிவாகியுள்ளது. வெப்பச்சலன மழை காரணமாக அடுத்த சில நாட்களும் சென்னை மற்றும் புறநகர் பகுதிகளில் இடியுடன் கூடிய மழை நீடிக்கலாம் என வானிலை மையம் குறிப்பிட்டுள்ளது.
இதனால் அலுவலகம் செல்லும் மக்கள், பள்ளி மாணவர்கள் மற்றும் வாகன ஓட்டிகள் கூடுதல் கவனத்துடன் இருக்க வேண்டிய நிலை ஏற்பட்டுள்ளது.
