சென்னை ,ஜூன் 16: தமிழக அரசின் நிதி நிலைமை மற்றும் கடன் சுமை குறித்த அதிகாரப்பூர்வ வெள்ளை அறிக்கையை முதலமைச்சர் விஜய் மற்றும் நிதி அமைச்சர் மரியவில்சன் ஆகியோர் இன்று செய்தியாளர் சந்திப்பில் கூட்டாக வெளியிட்டனர். மாநிலத்தின் உண்மையான பொருளாதார சூழலை மக்கள் அறிந்துகொள்ளும் பொருட்டு இருபத்தியோரு பக்கங்கள் கொண்ட விளக்கக் காட்சியின் வாயிலாக இந்த அறிக்கை பொதுவெளியில் வைக்கப்பட்டுள்ளது. ரிசர்வ் வங்கி மற்றும் மத்திய தலைமைத் தணிக்கை அதிகாரி ஆகியோரின் சான்றளிக்கப்பட்ட தரவுகளின் அடிப்படையில் இந்த ஆவணம் தயார் செய்யப்பட்டுள்ளதாகத் தெரிவிக்கப்பட்டுள்ளது.
மாநிலத்தின் கணக்கு புத்தகத்தை முழுமையான வெளிப்படைத்தன்மையுடன் மக்களின் முன் திறந்து வைப்பதாகக் குறிப்பிட்ட முதலமைச்சர் ,இதில் இடம்பெற்றுள்ள புள்ளிவிவரங்கள் அனைத்தும் அதிகாரப்பூர்வ தணிக்கை செய்யப்பட்ட பதிவுகள் என்பதால் இதனை யாரும் அரசியல் ரீதியாக மறுக்க முடியாது என்றார். கடந்த 2021-22 நிதி ஆண்டு முதல் 2025-26 நிதி ஆண்டு வரையிலான ஐந்து ஆண்டு காலப்பகுதி இந்த ஆய்விற்காக எடுத்துக்கொள்ளப்பட்டுள்ளது. கொரோனா பெருந்தொற்றுக்குப் பிந்தைய பொருளாதார மீட்சிக் காலத்தில் ,கர்நாடகா ,மகாராஷ்டிரா ,குஜராத் போன்ற ஒத்த தொழில்துறை அமைப்பைக் கொண்ட பிற மாநிலங்கள் தங்களின் நிதிப் பற்றாக்குறையைக் கட்டுக்குள் கொண்டு வந்துள்ளன. ஆனால் ,தமிழகம் அதற்கு நேர்மாறாக ஒவ்வொரு அடிப்படைப் பொருளாதாரக் குறியீட்டிலும் கடுமையான பின்னடைவைச் சந்தித்துள்ளது இந்த ஆய்வில் கண்டறியப்பட்டுள்ளது.
official pdf : https://financedept.tn.gov.in/en/my-documents/2020/07/TN_White_Paper_English-2026.pdf
also : சிவகங்கை அரசு மருத்துவமனையில் 145 குழந்தைகளுக்கு காக்ளியர் இம்ப்ளாண்ட் சிகிச்சை
தமிழக நிதிநிலை: 60 ஆண்டு கடனை மிஞ்சிய 5 ஆண்டு சுமை; வெள்ளை அறிக்கையில் அதிரவைக்கும் தரவுகள்
வெள்ளிக்கிழமை வெளியிடப்பட்ட இந்த ஐந்து ஆண்டுகால நிதிநிலை சுருக்க அறிக்கையின்படி ,தமிழகத்தின் வருவாய் பற்றாக்குறை இதுவரை இல்லாத அதிகபட்ச அளவாக 78,324 கோடி ரூபாயாக உயர்ந்துள்ளது. அதே நேரத்தில் ,மாநிலத்தின் சொந்த வரி வசூல் முயற்சி அதன் வரலாற்றிலேயே மிகக் குறைந்த அளவாக 5.45 சதவீதமாகக் குறைந்துள்ளது. உள்கட்டமைப்பு மேம்பாட்டிற்கான மூலதனச் செலவு 1.44 சதவீதமாகக் சரிந்துள்ள நிலையில் ,பிற மாநிலங்களுடன் ஒப்பிடுகையில் இது மிகவும் குறைவான அளவாகும். மாறாக ,தவிர்க்க முடியாத அரசாங்கத்தின் கட்டாயச் செலவுகள் 64.4 சதவீதமாக உயர்ந்து மாநிலங்களில் மிக அதிகபட்ச எல்லையைத் தொட்டுள்ளது.
மாநிலத்தின் கடன் சுமை 28.3 சதவீத அளவில் எவ்வித நிதி ஒழுங்குமுறையும் இன்றி நீடித்து வருவதோடு ,எப்ஆர்பிஎம் சட்டத்தின் கீழ் வரையறுக்கப்பட்டுள்ள 3 சதவீத பற்றாக்குறை வரம்பானது கடந்த ஐந்து ஆண்டுகளில் ஒவ்வொரு ஆண்டும் தொடர்ந்து மீறப்பட்டு வந்துள்ளது. நிதி மேலாண்மையில் ஏற்பட்டுள்ள இந்த ஒட்டுமொத்த சரிவானது கவலைக்குரிய நிலையைத் தாண்டி ,மாநிலப் பொருளாதாரத்தில் உள்ள கட்டமைப்பு ரீதியான பாதிப்பைக் காட்டுவதாக அறிக்கை சுட்டிக்காட்டுகிறது.
இந்த வெள்ளை அறிக்கையின் முக்கியப் புள்ளிவிவரங்களின்படி ,தமிழக அரசின் நேரடி கடன் சுமை தற்போது 10 லட்சம் கோடி ரூபாயை எட்டியுள்ளது. மாநில அரசு ஈட்டும் ஒவ்வொரு ஒரு ரூபாய் வருவாயிலும் 22.8 பைசா முந்தைய கடன்களுக்கான வட்டி செலுத்துவதற்கே செலவிடப்படுகிறது. அரசாங்கத்தின் மொத்த வருவாயில் 64.4 சதவீதம் ஏற்கனவே கட்டாயச் செலவுகளுக்காக ஒதுக்கப்பட்டுவிடுவதால் ,புதிய மக்கள் நலத் திட்டங்களையோ அல்லது கொள்கை முடிவுகளையோ எடுப்பதற்கான நிதி ஆதாரங்கள் முடக்கப்பட்டுள்ளன. மேலும் ,பொதுத்துறை நிறுவனங்களின் கடன்களையும் இதனுடன் சேர்த்துக் கணக்கிடும்போது ,தமிழகத்தின் உண்மையான மொத்த நிதிசார் பொறுப்பு 13.18 லட்சம் கோடி ரூபாயாக உயர்ந்துள்ளதாக வெள்ளை அறிக்கையில் அதிகாரப்பூர்வமாகத் தெரிவிக்கப்பட்டுள்ளது.
