சிறப்பு கட்டுரை : சட்டப்பேரவை சபாநாயகர் அதிகாரங்கள், பொறுப்புகள், உறுப்பினர்கள் மீதான நடவடிக்கைகள் மற்றும் அரசமைப்பு விதிகள் குறித்து முழு விளக்கம்.
இந்திய ஜனநாயக அமைப்பில் சட்டப்பேரவை என்பது மாநில அரசின் மிக முக்கியமான நிர்வாக தூண்களில் ஒன்றாக பார்க்கப்படுகிறது. அந்த சட்டப்பேரவையின் ஒழுங்கையும் நடைமுறைகளையும் கட்டுப்படுத்தும் முக்கிய பதவி தான் “சபாநாயகர்” அல்லது “பேரவை தலைவர்” பதவி. பொதுவாக மக்கள் கவனத்தில் அதிகமாக வராத இந்த பதவி, அரசியல் மற்றும் சட்ட ரீதியாக மிகப்பெரிய அதிகாரங்களை கொண்ட ஒன்றாகும்.
Also Read : ஈரோட்டில் 4 கோடி சொத்து மோசடி?.. கண்ணீரில் மூதாட்டி சாமியாத்தா !தங்கை குடும்பம் மீது பரபரப்பு புகார்
ஒவ்வொரு மாநில சட்டமன்றத் தேர்தலும் முடிவடைந்த பிறகு தேர்வு செய்யப்பட்ட உறுப்பினர்களில் இருந்து ஒருவரை சட்டப்பேரவை தலைவராக தேர்வு செய்கிறார்கள். அவர் ஒரு அரசியல் கட்சியின் சார்பில் வெற்றி பெற்றவராக இருந்தாலும், சபாநாயகர் பதவியை ஏற்ற பிறகு கட்சி சார்பற்றவராக செயல்பட வேண்டியது அரசியல் மரபாகவும் ஜனநாயக அடிப்படையாகவும் கருதப்படுகிறது.
சட்டப்பேரவை சபாநாயகர் எப்படி தேர்வு செய்யப்படுகிறார்?
மாநில சட்டப்பேரவை தேர்தல் முடிந்ததும் புதிய அவை கூடும். அப்போது உறுப்பினர்களின் ஆதரவுடன் ஒருவரை சபாநாயகராக தேர்வு செய்கின்றனர். சபாநாயகர் பதவி என்பது சாதாரண நிர்வாக பொறுப்பு அல்ல; அது சட்டப்பேரவையின் ஒழுங்கு மற்றும் கண்ணியத்தை பாதுகாக்கும் அரசமைப்பு பொறுப்பாக பார்க்கப்படுகிறது.
சட்டப்பேரவையின் அனைத்து அலுவல் நடவடிக்கைகளும் சபாநாயகரின் கட்டுப்பாட்டிலேயே நடைபெறும். அவை கூட்டத்துக்கு தலைமை வகிப்பது முதல் உறுப்பினர்கள் பேசும் நேரத்தை ஒழுங்குபடுத்துவது வரை அனைத்து அதிகாரங்களும் அவரிடமே இருக்கும்.
உறுப்பினர்களை கட்டுப்படுத்தும் அதிகாரம்
சட்டப்பேரவையில் விவாதங்கள் நடைபெறும் போது ஒழுங்கை பராமரிப்பது சபாநாயகரின் மிக முக்கிய கடமைகளில் ஒன்று. உறுப்பினர்கள் விதிமுறைகளை மீறி நடந்துகொண்டால் அல்லது அவை நடவடிக்கையை பாதிக்கும் வகையில் செயல்பட்டால், அவர்களுக்கு எதிராக நடவடிக்கை எடுக்க சபாநாயகருக்கு அதிகாரம் உண்டு. ஒரு உறுப்பினரை: தற்காலிகமாக அவையிலிருந்து நீக்குவது , முழு கூட்டத்தொடருக்கும் தடை விதிப்பது , அவையில் பேச அனுமதிக்காமல் நிறுத்துவது
போன்ற நடவடிக்கைகள் சபாநாயகர் மூலம் மேற்கொள்ளப்படலாம். இது அமைச்சர்கள், எதிர்க்கட்சியினர், முதலமைச்சர் உள்ளிட்ட அனைவருக்கும் சமமாக பொருந்தும் என்பது குறிப்பிடத்தக்கது.
அவை குறிப்புகளில் இருந்து பேச்சுகளை நீக்கும் அதிகாரம்
சட்டப்பேரவையில் பேசப்படும் ஒவ்வொரு கருத்தும் அதிகாரப்பூர்வ பதிவாக சேமிக்கப்படுகிறது. ஆனால் அவதூறு, தேவையற்ற அல்லது அவையின் மாண்பை பாதிக்கும் வகையிலான வார்த்தைகள் பயன்படுத்தப்பட்டால், அந்த குறிப்புகளை பதிவேடுகளில் இருந்து நீக்குவதற்கான முழு அதிகாரமும் சபாநாயகருக்கு வழங்கப்பட்டுள்ளது. ஒரு உறுப்பினர் உரையாற்றிக் கொண்டிருக்கும் நேரத்திலும் அவர் பேச்சை நிறுத்தச் சொல்லும் அதிகாரம் சபாநாயகரிடம் உள்ளது. இதன் மூலம் அவையின் ஒழுங்கும் தரமும் பாதுகாக்கப்படுகிறது.
சபாநாயகருக்கு வழங்கப்படும் மரியாதைகள்
சட்டப்பேரவையில் சபாநாயகர் பதவிக்கு தனிப்பட்ட மரியாதை வழங்கப்படுகிறது. அவை நடைமுறைகளின் படி: சபாநாயகர் எழுந்து நின்றால் யாரும் பேசக்கூடாது ,
உரையாற்றுபவர் உடனடியாக அமர வேண்டும் , சபாநாயகர் பேசும் போது யாரும் வெளியே செல்லக்கூடாது . இவை அனைத்தும் அந்த பதவியின் முக்கியத்துவத்தையும் அவையின் கட்டுப்பாட்டு அமைப்பையும் வெளிப்படுத்துகின்றன.
வாக்கெடுப்பில் சபாநாயகரின் முடிவு ஏன் முக்கியம்?
சட்டப்பேரவையில் முக்கிய மசோதாக்கள் மற்றும் தீர்மானங்கள் வாக்கெடுப்பிற்கு வரும். அப்போது வாக்குகள் எண்ணப்பட்டு முடிவுகள் அறிவிக்கப்படும் போது, சபாநாயகரின் முடிவே இறுதியானதாக கருதப்படும்.
அதேபோல் ஒழுங்கு பிரச்சினைகள் தொடர்பாகவும் சபாநாயகர் வழங்கும் தீர்ப்புகள் முக்கியமானவை. பொதுவாக அவை நடைமுறைகளில் அவர் எடுக்கும் முடிவுகளில் நீதிமன்றங்கள் நேரடியாக தலையிடாமல் இருப்பது இந்திய ஜனநாயக அமைப்பின் முக்கிய அம்சமாக பார்க்கப்படுகிறது.
பேரவை கூட்டத்தை ஒத்திவைக்கும் அதிகாரம்
சட்டப்பேரவையில் பரபரப்பு அல்லது ஒழுங்கின்மை ஏற்பட்டால் கூட்டத்தை தற்காலிகமாக ஒத்திவைப்பதற்கும் சபாநாயகருக்கு அதிகாரம் உண்டு. அவசியமான சூழ்நிலைகளில் உறுப்பினர்களை வெளியேற்றவும் முடியும்.
இந்த அதிகாரம் பல முக்கிய அரசியல் தருணங்களில் பயன்படுத்தப்பட்டிருக்கிறது. குறிப்பாக கடும் எதிர்ப்பு, கோஷங்கள் அல்லது அவை நடவடிக்கைகள் முடங்கும் சூழலில் சபாநாயகரின் தலையீடு அவசியமாகிறது.
உறுப்பினர்கள் கைது செய்யப்பட்டால் என்ன நடக்கும்?
சட்டப்பேரவை உறுப்பினர் ஒருவர் இந்தியாவின் எந்த பகுதியில் கைது செய்யப்பட்டாலும், அதன் முழு விவரங்களும் சட்டப்பேரவை தலைவருக்கு தெரிவிக்கப்பட வேண்டும்.
அதேபோல் குற்ற வழக்கில் தண்டிக்கப்பட்ட உறுப்பினர் மேல்முறையீட்டில் விடுவிக்கப்பட்டாலும், அந்த தகவலும் சபாநாயகருக்கு அதிகாரப்பூர்வமாக தெரிவிக்கப்படும்.
மேலும் சட்டப்பேரவை வளாகத்திற்குள் சபாநாயகரின் அனுமதி இல்லாமல் காவல்துறையினர் யாரையும் கைது செய்ய முடியாது என்பது அவையின் சிறப்பு அதிகாரங்களில் ஒன்றாகும்.
– சிறப்பு செய்தியாளர்
