நெல்லை , ஜூன் 10 : திருநெல்வேலி மாவட்ட காவல் கண்காணிப்பாளர் அலுவலகத்தில் தென்மண்டல காவல் துறை தலைவர் (ஐ.ஜி) விஜயேந்திர பிதாரி தலைமையில் முக்கிய ஆலோசனைக் கூட்டம் இன்று நடைபெற்றது. நெல்லை சரக டி.ஐ.ஜி திருநாவுக்கரசு முன்னிலையில் நடைபெற்ற இக்கூட்டத்தில் நெல்லை மாவட்ட காவல் கண்காணிப்பாளர் பிரசன்னகுமார், தென்காசி மாவட்ட காவல் கண்காணிப்பாளர் அசோக்குமார் மற்றும் இரு மாவட்டங்களைச் சேர்ந்த துணை காவல் கண்காணிப்பாளர்கள் (டி.எஸ்.பி) உள்ளிட்ட உயர் அதிகாரிகள் பலர் கலந்து கொண்டனர்.
இக்கூட்டத்தில் நெல்லை மற்றும் தென்காசி மாவட்டங்களில் நிலுவையில் உள்ள வழக்குகள், தற்போதைய புலன் விசாரணைகளின் நிலை குறித்து ஐ.ஜி விஜயேந்திர பிதாரி விரிவான ஆய்வு மேற்கொண்டார். குறிப்பாக தென் மாவட்டங்களில் சட்டம்-ஒழுங்கை நிலைநாட்டுவதிலும், பொது அமைதிக்கு பங்கம் விளைவிப்பவர்கள் மீது கடும் நடவடிக்கை எடுப்பதிலும் காவல்துறை காட்டும் சமரசமற்ற போக்கு குறித்து விவாதிக்கப்பட்டது. சமீபத்தில் நெல்லை மற்றும் தென்காசி மாவட்டங்களில் நிகழ்ந்த அரிவாள் வெட்டு சம்பவங்கள் தொடர்பாக இதுவரை 18 பேர் கைது செய்யப்பட்டுள்ளனர். இவர்கள் மீது எடுக்கப்பட்டுள்ள சட்டப்பூர்வ நடவடிக்கைகள் மற்றும் அவர்கள் மீதான பிணை மறுப்பு உள்ளிட்ட அடுத்தகட்ட நடவடிக்கைகள் குறித்து காவல் கண்காணிப்பாளர்களிடம் ஐ.ஜி கேட்டறிந்தார்.
தமிழகத்தில் ‘சிங்கப்பெண்’ சிறப்பு அதிரடிப்படை பணிகள் என்ன?: வெளிவந்த முழு விவரங்கள்
அதிதீவிரக் குற்றச்சாட்டுகளில் ஈடுபடும் ரவுடிகள், தொடர் குற்றவாளிகள் மற்றும் பொதுமக்களின் பாதுகாப்பிற்கு அச்சுறுத்தலாக விளங்குபவர்களின் பட்டியலைத் தயாரித்து அவர்கள் மீது முன்னெச்சரிக்கை நடவடிக்கைகளைத் தீவிரப்படுத்த உத்தரவிடப்பட்டுள்ளது. மேலும் நீதிமன்றங்களில் நிலுவையில் உள்ள ரவுடிகள் மீதான வழக்குகளை காவல் அதிகாரிகள் முறையாகக் கண்காணித்து அரசுத் தரப்பு வழக்குரைஞர்களுடன் இணைந்து அவர்களுக்கு உரிய தண்டனையைப் பெற்றுத் தர வேண்டும் என்று அறிவுறுத்தப்பட்டது. நெல்லை மாவட்டத்தில் குற்றச் சம்பவங்களில் ஈடுபடுவோரைத் தொடர்ந்து அதிரடியாகக் கைது செய்து வரும் காவல் கண்காணிப்பாளர்கள் மற்றும் அதிகாரிகளின் சிறப்பான பணிகளை தென்மண்டல ஐ.ஜி நேரில் பாராட்டி கௌரவித்தார்.
இதனைத் தொடர்ந்து போதைப்பொருள் நடமாட்டத்தைத் தடுப்பதற்கான சிறப்பு நடவடிக்கைகள் குறித்தும் இக்கூட்டத்தில் விவாதிக்கப்பட்டது. கஞ்சா, தடை செய்யப்பட்ட புகையிலைப் பொருட்கள் கடத்தல் மற்றும் விற்பனையில் ஈடுபடுபவர்களைக் கண்டறிந்து அவர்களின் பின்னணியில் உள்ள வலைப்பின்னலை முழுமையாக ஒழிக்க வேண்டும் என அதிகாரிகளுக்கு உத்தரவிடப்பட்டது. போதைப்பொருள் விற்பனையாளர்களின் சொத்துக்களை முடக்குவது உள்ளிட்ட கடுமையான சட்டப்பிரிவுகளின் கீழ் நடவடிக்கை எடுக்கவும் அறிவுறுத்தப்பட்டுள்ளது.
இந்த ஆய்வுக் கூட்டத்தின் மிக முக்கிய அங்கமாக பெண்களின் பாதுகாப்பைச் சட்டரீதியாகவும் கள ரீதியாகவும் பலப்படுத்தும் நோக்கில் தமிழக முதலமைச்சர் விஜய் நேற்று தொடங்கி வைத்த ‘சிங்கப்பெண் சிறப்பு அதிரடிப்படை’ திட்டம் குறித்து ஆலோசிக்கப்பட்டது. இத்திட்டத்தை நெல்லை மற்றும் தென்காசி மாவட்டங்களில் எவ்விதத் தொய்வுமின்றி உடனடியாக முழு வீச்சில் அமல்படுத்துவது குறித்து விவாதிக்கப்பட்டது. இதற்காக இரு மாவட்டங்களிலும் மண்டல வாரியாக அல்லது உட்கோட்டங்கள் வாரியாக (Sub-divisions) பெண் காவல் அதிகாரிகள் மற்றும் காவலர்களை உள்ளடக்கிய பிரத்யேகக் குழுக்கள் அமைக்கப்படவுள்ளன.
இந்தச் சிறப்பு அதிரடிப்படைக் குழுக்கள், பெண்கள் மற்றும் மாணவிகள் அதிகம் கூடும் இடங்களான கல்வி நிறுவனங்கள், பேருந்து நிலையங்கள், வணிக வளாகங்கள் மற்றும் வழிபாட்டுத் தலங்களில் தீவிர ரோந்துப் பணிகளை மேற்கொள்ளத் திட்டமிடப்பட்டுள்ளது. பெண்களுக்கான அச்சுறுத்தல்களை உடனுக்குடன் கண்டறிந்து தடுக்கும் வகையில் இந்த ரோந்துக் குழுக்களின் செயல்பாடுகள் நேரடியாகக் கண்காணிக்கப்படும் என்றும், இத்திட்டத்தின் மூலம் தென் மாவட்டங்களில் பெண்களின் பாதுகாப்பு முழுமையாக உறுதி செய்யப்படும் என்றும் கூட்டத்தில் சுட்டிக்காட்டப்பட்டது. சட்டம்-ஒழுங்கு பாதுகாப்பு மற்றும் குற்றத் தடுப்பு நடவடிக்கைகளுடன், புதிய பாதுகாப்புத் திட்டங்களையும் ஒருங்கிணைத்துச் செயல்படுத்துவது குறித்து இந்த ஆலோசனைக் கூட்டத்தில் இறுதி முடிவுகள் எடுக்கப்பட்டன.
