திருநெல்வேலி: “தேர்தலுக்குப் பிந்தைய கருத்துக்கணிப்புகள் என்பவை மக்களின் உண்மையான கணிப்புகள் அல்ல, அவை திட்டமிட்டு திணிக்கப்படுபவை; பீகார் மாநில சட்டமன்றத் தேர்தலில் ‘இந்தியா’ கூட்டணி அமோக வெற்றி பெற்று ஆட்சியமைக்கும்” என்று தமிழ்நாடு காங்கிரஸ் கமிட்டித் தலைவர் செல்வப்பெருந்தகை தற்துணிவுடன் தெரிவித்துள்ளார்.
நெல்லை மாவட்டம் நாங்குநேரி சட்டமன்றத் தொகுதியில், காங்கிரஸ் கட்சியின் மாநிலப் பொருளாளரும், தொகுதி சட்டமன்ற உறுப்பினருமான ரூபி ஆர். மனோகரன் ஏற்பாட்டில், வாக்காளர் அடையாள அட்டை சீர்திருத்தப் பணிகளுக்கான (SIR) பிரத்யேக ‘வார் ரூம்’ (War Room) திறப்பு விழா நடைபெற்றது. இதனைத் திறந்து வைத்துப் பேசிய செல்வப்பெருந்தகை, தேர்தல் ஆணையத்தின் செயல்பாடுகள் குறித்தும், தற்போதைய அரசியல் சூழல் குறித்தும் விரிவாகப் பகிர்ந்து கொண்டார்.
புதிதாகத் தொடங்கப்பட்டுள்ள இந்தத் தகவல் மையத்தின் நோக்கம் குறித்துப் பேசிய செல்வப்பெருந்தகை, “வாக்குச் சீர்திருத்தப் படிவங்களை எவ்வாறு பிழையின்றிப் பூர்த்தி செய்ய வேண்டும் என்பதில் சாமானிய மக்களுக்குப் பல்வேறு நடைமுறைச் சிக்கல்கள் உள்ளன. தகுதியான வாக்காளர்களின் பெயர்கள் நீக்கப்படுவதும், தகுதியற்றவர்கள் அல்லது இறந்தவர்களின் பெயர்கள் வாக்காளர் பட்டியலில் நீடிப்பதுமான குளறுபடிகள் நாடு முழுவதும் அரங்கேறி வருகின்றன. மக்களின் வாக்குரிமை திருடப்படுவதைத் தடுத்து, அவர்களுக்கு உரிய விழிப்புணர்வை ஏற்படுத்தவே இந்த ‘வார் ரூம்’ நாங்குநேரியில் அமைக்கப்பட்டுள்ளது. இதே போன்ற மையங்கள் தமிழகத்தின் அனைத்துச் சட்டமன்றத் தொகுதிகளிலும் படிப்படியாகத் திறக்கப்பட்டு, மாவட்டத் தலைவர்கள் மற்றும் பொறுப்பாளர்கள் மூலம் காங்கிரஸ் கட்சியின் வாக்குகள் முறையாகப் பாதுகாக்கப்படும்,” என்றார்.
வந்தவாசி அருகே கண்டெய்னர் லாரியில் 5 கிலோ கஞ்சா பறிமுதல்
தேர்தல் ஆணையம் மற்றும் பாரதிய ஜனதா கட்சியின் கூட்டணிக் செயல்பாடுகள் குறித்து அகில இந்திய காங்கிரஸ் தலைவர் ராகுல் காந்தி தொடர்ந்து பொதுவெளியில் எச்சரித்து வருவதைச் சுட்டிக்காட்டிய அவர், தற்போது தேர்தல் ஆணையத்தின் ஒருதலைப்பட்சமான நடவடிக்கைகளுக்கு எதிராகக் காங்கிரஸ் பேரியக்கத்தின் சார்பில் மூத்த வழக்கறிஞர் சல்மான் குர்ஷித் உச்ச நீதிமன்றத்தில் வழக்காடி வருவதாகவும், இது தொடர்பாகத் தேர்தல் ஆணையத்திற்கு உச்ச நீதிமன்றம் நோட்டீஸ் அனுப்பி விளக்கமளிக்க உத்தரவிட்டுள்ளதையும் நினைவு கூர்ந்தார்.
தற்போது தமிழகத்தில் பருவமழைக் காலம் தொடங்கியுள்ள நிலையிலும், இன்னும் இரண்டு மாதங்களில் சட்டமன்றத் தேர்தல் அறிவிப்பு வரவுள்ள சூழலிலும், இத்தகைய அவசரக் காலக் கெடுவுடன் கூடிய வாக்குச் சீர்திருத்தப் பணிகளைத் திணிப்பது மக்களைத் துன்புறுத்தும் செயல் என்று செல்வப்பெருந்தகை சாடினார்.
“காங்கிரஸ் ஆட்சிக் காலத்திலும் இத்தகைய சீர்திருத்தங்கள் கொண்டு வரப்பட்டன. ஆனால், அப்போதெல்லாம் மக்கள் அச்சப்படவோ, அலைக்கழிக்கப்படவோ இல்லை. தற்போது இரண்டு பக்கங்கள் கொண்ட இந்தச் சீர்திருத்தப் படிவத்தை மிகக் குறுகிய காலத்திற்குள் பூர்த்தி செய்வது சாத்தியமற்ற ஒன்று. சட்ட நுணுக்கங்கள் தெரிந்த என்னாலேயே இதை உடனடியாகச் செய்ய முடியாது எனும் போது, சாமானிய மக்களின் நிலை என்ன? இப்போதைய சூழலில் ஆசிரியர்களும், அங்கன்வாடி மற்றும் அரசு ஊழியர்களும் மதிய உணவுக்குப் பின் தங்களின் வழக்கமான பணிகளைத் தள்ளிவைத்துவிட்டு, இப்பணிகளுக்காகக் களமிறக்கப்படுகிறார்கள். மிகக் குறுகிய காலத்தில் இப்பணியை முடிக்க முடியாது என்ற சூழல் தெரிந்தே, அரசு ஊழியர்களைத் தவறு செய்யத் தூண்டும் நிலைக்குத் தேர்தல் ஆணையம் தள்ளுகிறது,” என்று அவர் குற்றம் சாட்டினார்.
மழைக்கால நெருக்கடியால் தேர்தல் தள்ளிப்போக வாய்ப்புள்ளதா என்ற செய்தியாளர்களின் கேள்விக்கு, “பாஜக ஆட்சியில் எந்த நேரத்திலும் எந்த அதிசயமும் நடக்கலாம். அனைத்தும் அவர்களின் அரசியல் விருப்பப்படியே நடக்கிறது,” என்று சுருக்கமாகப் பதிலளித்தார்.
காங்கிரஸ் கட்சியின் உட்கட்சி விவகாரங்கள் குறித்துப் பேசுகையில், தமிழகத்தில் மாவட்டத் தலைவர்களை முறைப்படி நியமிப்பதற்கென அகில இந்திய தலைமையால் ஒரு புதிய குழு உருவாக்கப்பட்டுள்ளது என்றும், அக்குழுவினர் விரைவில் தமிழகம் வந்து கள ஆய்வு செய்த பின்னர் புதிய நியமனங்கள் அறிவிக்கப்படும் என்றும் கூறினார். சில மாவட்டங்களில் தற்போதைய தலைவர்களே தொடர்வதற்கும் வாய்ப்புகள் உள்ளதாக அவர் குறிப்பிட்டார்.
நெல்லை கிழக்கு மாவட்ட காங்கிரஸ் தலைவர் ஜெயக்குமார் மரணம் குறித்த வழக்கின் விசாரணைத் தொய்வு குறித்த கேள்விக்கு பதிலளித்த செல்வப்பெருந்தகை, “முன்னாள் அமைச்சர் கே.என்.நேருவின் தம்பி ராமஜெயம் கொலை வழக்கில் இத்தனை ஆண்டுகளாகியும் ஒரு இறுதி முடிவுக்கு வர முடியாமல் காவல்துறை எவ்வாறு திணறி வருகிறதோ, அதே போன்றதொரு சூழல்தான் ஜெயக்குமார் வழக்கிலும் நீடிக்கிறது. எனினும், காவல்துறை விசாரணை தொடர்ந்து நடைபெற்று வருகிறது,” என்று தெரிவித்தார்.
இந்நிகழ்வில் சட்டமன்ற உறுப்பினர் ரூபி மனோகரன் மற்றும் மாவட்ட, வட்டார காங்கிரஸ் நிர்வாகிகள், பொதுமக்கள் பெருந்திரளாகக் கலந்து கொண்டனர்.
