சென்னை: அதிமுக பொதுச்செயலாளர் எடப்பாடி பழனிசாமியைச் சந்திக்க தங்கள் கட்சியின் தலைவர் தரப்பில் நேரம் கேட்கப்பட்டதாகவும் ஆனால் அரசியல் சூழ்நிலைகளைக் காரணம் காட்டி அவரே அதனைத் தவிர்த்ததாகவும் தமிழக வெற்றிக் கழகத்தின் (தவெக) அமைச்சர் CTR Nirmal Kumar செய்தியாளர்கள் சந்திப்பில் அதிரடி விளக்கமளித்துள்ளார்.
முன்னதாக சிபிஎம் கட்சியின் தோழர் சண்முகம் எழுப்பியிருந்த விமர்சனத்திற்குப் பதிலடி கொடுக்கும் வகையில் இந்த உண்மைகள் பொதுவெளியில் உடைக்கப்பட்டுள்ளன.
பழனிசாமியைச் சந்திக்காதது ஏன்? பின்னணி இதோ!
சென்னையில் செய்தியாளர்களைச் சந்தித்த தவெக அமைச்சர் CTR Nirmal Kumar கூட்டணி ஆட்சியில் இருக்கும் தோழர் சண்முகம் எழுப்பிய கேள்விக்கு விளக்கமளிக்க வேண்டிய கட்டாயம் தங்களுக்கு ஏற்பட்டுள்ளதாகக் குறிப்பிட்டார்.
“எங்கள் தலைவர் தமிழகத்தின் அனைத்து முக்கியத் தலைவர்களையும் நேரில் சந்தித்து வாழ்த்துப் பெற விரும்பினார். அதன் அடிப்படையில் தமிழக முதல்வர் மு.க.ஸ்டாலின், முன்னாள் முதல்வர் ஓ.பன்னீர்செல்வம், மதிமுக பொதுச்செயலாளர் வைகோ உள்ளிட்ட பல தலைவர்களைச் சந்தித்துப் பேசினார். இதேபோல் திரு. எடப்பாடி பழனிசாமி அவர்களையும் சந்திப்பதற்காக எங்களுடைய தலைவர் தரப்பில் இருந்து முறைப்படி Appointment (நேரம்) கேட்கப்பட்டது உண்மைதான்” என்று அவர் கூறினார்.
Also read : பாஜகவில் இருந்து அண்ணாமலை திடீர் விலகல் ஏன் : வெளியான புதிய தகவல்
மேலும் “ஆனால், அப்போது தேர்தல் தோல்விகளைச் சந்தித்திருந்த அதிமுகவின் ஒருசில தலைவர்கள் தங்களுடைய தனிப்பட்ட மற்றும் அரசியல் சூழ்நிலைகளைக் காரணம் காட்டி ‘இப்போதைக்குச் சந்திப்பு வேண்டாம்; நாங்களே தோல்வியுற்று இருக்கிறோம் இந்த நேரத்தில் சந்திப்பது சரியாக இருக்காது’ என்று கூறி அந்த சந்திப்பை உறுதிப்படுத்தவில்லை. அன்று இதனை நாங்கள் நாகரிகம் கருதி வெளியில் சொல்லவில்லை. ஆனால் இன்று சிபிஎம் தோழர் சண்முகம் இதுகுறித்துப் பேசியதால் உண்மையை விளக்க வேண்டியுள்ளது” என்றார்.
“அதிமுகவை காலி செய்ததே எடப்பாடிதான்!”
செய்தியாளர்களின் தொடர் கேள்விகளுக்குப் பதிலளித்த அவர் அதிமுகவின் தற்போதைய வீழ்ச்சிக்கு தவெக காரணமல்ல எடப்பாடி பழனிசாமியின் தவறான முடிவுகளே காரணம் என்று மிகக் கடுமையான விமர்சனங்களை முன்வைத்தார்.
“அதிமுகவை யாராவது காலி செய்ய வேண்டுமா? அதைச் செய்ததே திரு. எடப்பாடி பழனிசாமிதான். புரட்சித் தலைவர் எம்ஜிஆர் தனது சொந்தப் பணத்தில் வாங்கிய கட்டிடம், அம்மா (ஜெயலலிதா) கட்டிப் பாதுகாத்த தலைமை அலுவலகம். அந்த கட்டிடத்தில் அமர்ந்துகொண்டு திமுகவுடன் சேர்ந்து ஆட்சி அமைக்க அவர் எப்படி பேச்சுவார்த்தை நடத்தினார் என்று தெரியவில்லை. எடப்பாடி பழனிசாமி எப்போது திமுகவுடன் கைகோர்க்க முயன்றாரோ அன்றே அதிமுகவின் கதை முடிந்துவிட்டது” என்று சாடினார்.
தொடர்ந்து பேசிய அவர், எடப்பாடி பழனிசாமி தனது குடும்பத்தையும் தன்னையும் காப்பாற்றிக் கொள்ளவே Worst Decision (மோசமான முடிவுகளை) எடுத்து திமுகவுடன் ரகசியக் கை கோர்க்கத் துணிந்தார் என்றும் தொடர்ந்து 11 முறை தேர்தல் தோல்விகளைச் சந்தித்த ஒரு தலைவருடன் எந்த அதிமுக தொண்டரும் பயணிக்க விரும்பவில்லை என்றும் தெரிவித்தார். இதனால் திமுகவிற்குச் செல்ல விரும்பாத 40 மற்றும் 50 ஆண்டுகள் கட்சிக்காக உழைத்த உண்மையான அதிமுக நிர்வாகிகள் தற்போது மாவட்ட, ஒன்றிய, நகர அளவில் தவெக-வில் இணைந்து வருவதாகக் குறிப்பிட்டார். “எடப்பாடி பழனிசாமி ஒட்டுமொத்த அதிமுகவையும் மூட்டையாகக் கட்டி சேலத்திற்குக் கொண்டு போய் பரண் மேல் வைக்கப் போகிறார்” என்றும் விமர்சித்தார்.
சட்டம் ஒழுங்கு விவகாரம் மற்றும் காவல்துறை நடவடிக்கை
தமிழகத்தின் சட்டம் ஒழுங்கு குறித்த எதிர்க்கட்சிகளின் குற்றச்சாட்டுகளுக்குப் பதிலளித்த அவர் தனிப்பட்ட விரோதங்களால் நடக்கும் குற்றங்களையும், ஒட்டுமொத்த சட்டம் ஒழுங்கையும் ஒன்றாகக் கருதக் கூடாது என்றார்.
“மதுரையில் அண்ணன்-தம்பி சண்டை அல்லது பக்கத்து வீட்டுப் பிரச்சினையால் நடக்கும் கொலைகளை வைத்து ஒட்டுமொத்த சட்டம் ஒழுங்கும் சீர்கெட்டுவிட்டது என்று கூற முடியாது. முந்தைய அதிமுக ஆட்சிக் காலத்தில் பாலியல் வன்கொடுமை வழக்குகள் மீது ஒரு வாரம் வரை முறையான விசாரணை கூட நடக்காமல் இறுதியில் High Court (உயர் நீதிமன்றம்) தலையிட்டு சிபிஐ விசாரணைக்கு உத்தரவிட்ட சம்பவங்கள் எல்லாம் நடந்தன. ஆனால் இந்த ஆட்சியில் காவல்துறை மிகவும் சென்சிடிவாகவும் துரிதமாகவும் ரியாக்ட் செய்கிறது. குற்றங்கள் நடந்த உடனே Special Party (தனிப்படை) அமைக்கப்பட்டு குற்றவாளிகள் உடனடியாகக் கைது செய்யப்படுகிறார்கள்” என்று காவல்துறையின் செயல்பாடுகளைப் பாராட்டினார்.
மேலும் சட்டவிரோத மது விற்பனை, Illegal Bar (சட்டவிரோத பார்கள்), குட்கா, கஞ்சா மற்றும் Illegal Quarries (சட்டவிரோத குவாரிகள்) போன்ற சமூக விரோதச் செயல்கள் அனைத்தும் தற்போது முழுமையாகக் கட்டுப்படுத்தப்பட்டுள்ளதாகக் கூறினார். பொதுமக்கள் ஒரு போன் செய்த அடுத்த ஐந்து நிமிடங்களில் காவல்துறை நடவடிக்கை எடுப்பதாகவும், காவல் நிலையங்கள் பொதுமக்கள் எளிதில் அணுகக்கூடிய வகையில் (Reachable) மாறி இருப்பதாகவும் அவர் தெரிவித்தார்.
உச்ச நீதிமன்ற பெண் நீதிபதிக்கு வாழ்த்து
தமிழகத்தைச் சேர்ந்த பெண் வழக்கறிஞர் ஒருவர் நேரடியாக உச்ச நீதிமன்ற நீதிபதியாகப் பொறுப்பேற்றுள்ளதற்குத் தவெக சார்பில் மனமார்ந்த வாழ்த்துகள் தெரிவிக்கப்பட்டது.
“தமிழகத்தைச் சேர்ந்த ஒரு பெண் வழக்கறிஞர் நேரடியாக உச்ச நீதிமன்ற நீதிபதியாக உயர்ந்திருப்பது ஒட்டுமொத்த தமிழகத்திற்கும் பெருமையான விஷயம். இது டெல்லியிலும் தமிழகத்திலும் பணியாற்றும் எண்ணற்ற பெண் வழக்கறிஞர்களுக்குப் மிகப்பெரிய ஊக்கத்தையும், வழிகாட்டுதலையும் தரும். தமிழக மக்கள் மற்றும் பெண்கள் சார்பாக எங்கள் வாழ்த்துகளைத் தெரிவித்துக் கொள்கிறோம்” என்றார்.
முதலமைச்சர் மீதான விமர்சனமும், டாஸ்மாக் மூடல் விளக்கமும்
முதலமைச்சர் தனது உதவியாளர் வீட்டு விசேஷத்திற்குச் சென்றதை எடப்பாடி பழனிசாமி விமர்சித்தது குறித்த கேள்விக்கு “முதலமைச்சர் காலை 8:30 மணிக்குத் தனது உதவியாளர் அல்லது நண்பரின் வீட்டு விசேஷத்தில் 5 நிமிடம் கலந்துகொண்டதை அரசுத் திட்டங்களுடன் ஒப்பிட்டு எடப்பாடி பழனிசாமி பேசுவது தேவையற்றது. அவர் தனது அரசியல் இருப்பைக் காட்டிக்கொள்ளவே இப்படிப் பேசுகிறார்” என்று பதிலளித்தார்.
டாஸ்மாக் கடைகள் மூடப்படுவது குறித்த கேள்விக்கு “டாஸ்மாக் என்பது அரசுக்கு வருமானம் ஈட்டும் ஒரு நிறுவனமாகப் பார்க்கப்படவில்லை. வழிபாட்டுத் தலங்கள் மற்றும் கல்வி நிறுவனங்களுக்கு அருகில் இருக்கும் கடைகளை மூட வேண்டும் என்பதுதான் முதலமைச்சரின் உத்தரவு. திருப்பரங்குன்றம் கிரிவலப் பாதையில் இருந்த 6 கடைகள் உள்பட வலையப்பட்டி வலைகுளம் போன்ற பகுதிகளில் பொதுமக்களுக்குத் தொந்தரவாக இருந்த பல கடைகள் மூடப்பட்டுள்ளன. மூடப்பட்ட கடைகள் மீண்டும் திறக்கப்படுவதாகக் கூறப்படும் புகார்கள் குறித்து ஆய்வு செய்து உரிய நடவடிக்கை எடுக்கப்படும்” என்று கூறி செய்தியாளர்கள் சந்திப்பை நிறைவு செய்தார்.
