நெல்லை , ஜூன் 25:நெல்லை மாவட்டம் பாளையங்கோட்டையின் மிக முக்கிய வரலாற்று அடையாளங்களில் ஒன்றாகத் திகழும் தூய திரித்துவ Holy Trinity பேராலயத்தின் 200-வது ஆண்டு விழாவை முன்னிட்டு, இந்திய அஞ்சல் துறை சார்பில் தயாரிக்கப்பட்ட சிறப்பு அஞ்சல் உறை இன்று அதிகாரப்பூர்வமாக வெளியிடப்பட்டது.
இப்பகுதியில் கிறிஸ்தவ மதப் பரப்புதலின் மையப்புள்ளியாகவும், கட்டிடக்கலை பாரம்பரியத்தின் சான்றாகவும் விளங்கும் இந்த பேராலயம் 1826 ஆம் ஆண்டு அப்போதைய ஜெர்மனிய மிஷனரி சார்லஸ் தியோபிலஸ் ஈவால்ட் ரேனியஸ் (சி.டி.இ. ரேனியஸ்) அவர்களால் கட்டப்பட்டது. இந்த ஆலயம் தோற்றுவிக்கப்பட்டு நடப்பு 2026 ஆம் ஆண்டோடு இருநூறு ஆண்டுகள் நிறைவடைகிற சூழலில் இந்த வரலாற்று மைல்கல்லைக் கொண்டாடும் விதமாக பேராலய நிர்வாகம் சார்பில் ஆண்டு முழுவதும் பல்வேறு தொடர் சிறப்பு நிகழ்ச்சிகள் ஒருங்கிணைக்கப்பட்டு வருகின்றன.
11,000 வோல்ட் மின் கம்பியில் ஏறி தூங்கிய வாலிபர்! கடைசி நொடியில் நடந்த அதிரடி மீட்பு
இந்த இருநூறாண்டு கொண்டாட்டங்களின் மிக முக்கிய நிகழ்வாக இந்திய அஞ்சல் துறையின் சார்பில் பேராலயத்தின் படம் பொறித்த சிறப்பு அஞ்சல் உறை மற்றும் சிறப்பு அஞ்சல் முத்திரை வெளியீட்டு விழா இன்று பேராலய வளாகத்தில் நடைபெற்றது. மதுரை தெற்கு மண்டல அஞ்சல் துறை அதிகாரிகளின் முன்னிலையில் நடைபெற்ற இந்நிகழ்ச்சிக்கு அஞ்சல் துறை உயர் அதிகாரி செந்தில்குமார் தலைமை தாங்கி சிறப்பு அஞ்சல் உறையை முறைப்படி வெளியிட்டார். இந்த சிறப்பான வரலாற்று ஆவணப் பதிவினை திருச்சபையின் பேராயர் டாக்டர் இருபன் மார்க் அஞ்சல் துறை அதிகாரிகளிடமிருந்து பெற்றுக் கொண்டார்.
நிகழ்ச்சியில் சி.எஸ்.ஐ. திருநெல்வேலி பேராயர் டாக்டர் பர்னபாஸ், பாளையங்கோட்டை சேகர தலைவர் பால்சன் கனகராஜ் ஆகியோர் முன்னிலை வகித்து வாழ்த்துரை வழங்கினர். மேலும் இச்சிறப்பு வெளியீட்டுப் பணிகளை ஒருங்கிணைத்த அஞ்சல் துறை கண்காணிப்பாளர் ஜடா ஏசுதாசன் ராஜன் உள்ளிட்ட துறை சார்ந்த உயர் அதிகாரிகளும், திருச்சபையின் முக்கியப் பொறுப்பாளர்களும் இந்த நிகழ்வில் கலந்து கொண்டனர்.
