சென்னை , ஜூன் 25: தமிழக அரசியல் களத்தில் ‘வெள்ளை அறிக்கை’ குறித்த விவாதங்கள் பரபரப்பை ஏற்படுத்தியிருந்த சூழலில் அடுத்தகட்ட முக்கிய நகர்வாக முன்னாள் அமைச்சர்கள் ஏ.வ.வேலு மற்றும் செந்தில் பாலாஜி ஆகியோரது தொடர்புடைய இடங்களில் லஞ்ச ஒழிப்புத் துறையினர் அதிரடி சோதனையில் இறங்கியுள்ளனர். சென்னை, திருவண்ணாமலை, கரூர் உள்ளிட்ட 13-க்கும் மேற்பட்ட இடங்களில் இந்தச் சோதனைகள் முன்னெடுக்கப்பட்டுள்ளன.
நெடுஞ்சாலைத் துறையில் சாலைகளை அமைக்காமலேயே பல கோடி ரூபாய் முறைகேடு செய்ததாக எழுந்துள்ள புகாரின் அடிப்படையில், முன்னாள் அமைச்சர் ஏ.வ.வேலு மீது லஞ்ச ஒழிப்புத் துறை தற்போது வழக்குப் பதிவு செய்துள்ளது. இந்த விவகாரத்தில் கரூரைச் சேர்ந்த பொறியாளர்கள் உட்பட 11 பேர் மீது கூட்டுச் சதி மற்றும் ஊழல் தடுப்புச் சட்டத்தின் கீழ் வழக்குப் பதிவு செய்யப்பட்டு சட்டப்பூர்வ நடவடிக்கைகள் தீவிரப்படுத்தப்பட்டுள்ளன.
சென்னையில் உள்ள ஏ.வ.வேலுவின் ஆழ்வார்பேட்டை இல்லத்தில் லஞ்ச ஒழிப்புத் துறை அதிகாரிகள் சோதனையில் ஈடுபட்டு வருகின்றனர். அதேபோல திருவண்ணாமலையில் உள்ள அவரது வீடு மற்றும் அவருக்குச் சொந்தமான கல்வி நிறுவனங்களிலும் நான்கு மணி நேரத்திற்கும் மேலாக இந்தச் சோதனை தொடர்ந்து நீடித்து வருகிறது.
இச்சோதனையின் ஒரு பகுதியாக சென்னை ஆழ்வார்பேட்டை இல்லத்திற்கு நெடுஞ்சாலைத் துறை அதிகாரி ஒருவரை லஞ்ச ஒழிப்புத் துறையினர் நேரில் அழைத்து வந்து விசாரணையை மேற்கொண்டுள்ளனர். நெடுஞ்சாலைத் துறை ஒப்பந்த டெண்டர்கள் தொடர்பான முக்கிய ஆவணங்களை அந்த அதிகாரி எடுத்து வந்த நிலையில் அந்த ஆவணங்களின் அடிப்படையிலேயே தற்போதைய விசாரணை தீவிரமாக முன்னெடுக்கப்பட்டு வருவதாகத் தெரிகிறது.
முன்னாள் அமைச்சர் ஏ.வ.வேலுவின் இல்லத்தில் நடத்தப்பட்டு வரும் இந்த லஞ்ச ஒழிப்புத் துறை சோதனைக்கு திமுக தலைவரும் முன்னாள் முதலமைச்சருமான மு.க.ஸ்டாலின் கடும் கண்டனம் தெரிவித்துள்ளார். இது குறித்து அவர் வெளியிட்டுள்ள அறிக்கையில் இந்தச் சோதனைகள் யாவும் அரசியல் பழிவாங்கும் நோக்கம் கொண்ட மிரட்டல்கள் என்றும் இத்தகைய நடவடிக்கைகளைச் சட்டப்படி எதிர்கொண்டு நீதிமன்றத்தில் தங்களின் நியாயத்தை நிரூபிப்போம் என்றும் திட்டவட்டமாகக் குறிப்பிட்டுள்ளார்.
மின்சாரத் துறை தொடர்பான வெள்ளை அறிக்கை விவகாரம் மற்றும் அதனைத் தொடர்ந்த இந்த லஞ்ச ஒழிப்புச் சோதனை நடவடிக்கைகள் தமிழக அரசியலில் பெரும் விவாதங்களை ஏற்படுத்தியுள்ளன.
இதற்கிடையே சமூக வலைத்தளங்களில் பரவி வரும் மற்றொரு முக்கிய விவகாரம் குறித்தும் தமிழக அரசு விளக்கம் அளித்துள்ளது. ‘நான் முதல்வன்’ திட்டத்தின் கீழ் வழங்கப்படும் உதவித்தொகை நிறுத்தப்பட்டுவிட்டதாகச் சமூக ஊடகங்களில் பரவி வரும் செய்தி முற்றிலும் தவறானது என்று அரசுத் தரப்பில் தெரிவிக்கப்பட்டுள்ளது. இது தொடர்பாகத் தமிழக அரசின் சரிபார்ப்பகம் (Fact Check) வெளியிட்டுள்ள தகவலில் ஜூன் மாதத்திற்கான உதவித்தொகை தகுதியுள்ள பயனாளிகளின் வங்கித் கணக்குகளில் முறையாக வரவு வைக்கப்பட்டுள்ளதாகத் தெளிவுபடுத்தப்பட்டுள்ளது.
