நெல்லை . மே 27 : நெல்லை டவுன் பகுதியில் கணவருடன் ஏற்பட்ட குடும்பத் தகராறு காரணமாக, தனது மூன்று பிள்ளைகளையும் அழைத்துக் கொண்டு தாய் திடீரென மாயமான சம்பவம் அப்பகுதியில் பெரும் பரபரப்பை ஏற்படுத்தியுள்ளது. இது குறித்து நெல்லை டவுன் போலீசார் வழக்குப்பதிவு செய்து தீவிர விசாரணை மேற்கொண்டு வருகின்றனர்.
நெல்லை டவுன் பாரதியார் தெருவில் உள்ள ஒரு குடியிருப்பில் வசித்து வருபவர் வெங்கி சுப்பிரமணியன். இவரது மனைவி சாந்தி (39). காதலித்து திருமணம் செய்து கொண்ட இவர்களது இல்லற வாழ்க்கை 20 ஆண்டுகளைக் கடந்துள்ளது. இந்த தம்பதிக்கு காளிஸ்ரீ (17), கங்காஸ்ரீ (15) என்ற இரு மகள்களும், சூர்ய பாண்டியன் (11) என்ற மகனும் உள்ளனர்.
காதல் திருமணமாக இருந்தாலும், கடந்த சில காலமாகவே கணவன்-மனைவி இடையே குடும்பப் பிரச்சினை காரணமாக அடிக்கடி வாக்குவாதங்களும், தகராறுகளும் ஏற்பட்டு வந்ததாகக் கூறப்படுகிறது. இந்த நிலையில், கடந்த 15-ஆம் தேதி இரவு இவர்களுக்குள் மீண்டும் கடுமையான குடும்பத் தகராறு வெடித்தது.
வாக்குவாதம் முற்றிய நிலையில், ஆத்திரமடைந்த வெங்கி சுப்பிரமணியன், சாந்தியிடம் எங்கேயாவது போய் தொலையுமாறு கூறி கடுமையான வார்த்தைகளால் சச்சரவில் ஈடுபட்டதாகத் தெரிகிறது. இந்த மனக்கசப்புக்கு இடையே, மறுநாள் (16-ஆம் தேதி) காலை வெங்கி சுப்பிரமணியன் தனது வேலை விஷயமாக தென்காசி மாவட்டம் பாவூர்சத்திரத்திற்குப் புறப்பட்டுச் சென்றார்.
அங்கு தனது பணிகளை முடித்துவிட்டு, கடந்த 17-ஆம் தேதி இரவு 10 மணியளவில் அவர் நெல்லை டவுனில் உள்ள தனது வீட்டிற்குத் திரும்பியுள்ளார். அப்போது வீட்டின் கதவு பூட்டப்பட்டுக் கிடப்பதைக் கண்டு அதிர்ச்சியடைந்தார். உள்ளே சென்று பார்த்தபோது மனைவி சாந்தி மற்றும் பிள்ளைகளான காளிஸ்ரீ, கங்காஸ்ரீ, சூர்ய பாண்டியன் ஆகிய நால்வரும் வீட்டில் இல்லை என்பது தெரியவந்தது. கணவர் கோபத்தில் கூறிய வார்த்தைகளால் மனமுடைந்த சாந்தி, தனது மூன்று பிள்ளைகளையும் கூட்டிக்கொண்டு வீட்டை விட்டு வெளியேறியது தெரியவந்தது.
இதனைத் தொடர்ந்து, பதற்றமடைந்த வெங்கி சுப்பிரமணியன் உடனடியாக அக்கம்பக்கத்தினரிடமும், உறவினர்கள் மற்றும் நண்பர்களின் வீடுகளிலும் சாந்தி மற்றும் பிள்ளைகளைத் தீவிரமாகத் தேடிப் பார்த்தார். சாந்தியின் கைபேசி எண்ணிற்குத் தொடர்பு கொள்ள முயன்றபோது, அது ‘சுவிட்ச் ஆஃப்’ செய்யப்பட்டிருந்தது.
அனைத்து இடங்களிலும் தேடியும், நான்கு நாட்களாகியும் அவர்கள் குறித்து எவ்விதத் தகவலும் கிடைக்காததால், செய்வதறியாது திகைத்த வெங்கி சுப்பிரமணியன் இறுதியாக நெல்லை டவுன் காவல் நிலையத்தில் இது குறித்துப் புகார் அளித்தார்.
அவரது புகாரின் பேரில், நெல்லை டவுன் காவல் ஆய்வாளர் சுரேஷ் தலைமையிலான போலீசார் வழக்குப் பதிவு செய்து, மாயமான தாய் மற்றும் அவரது மூன்று பிள்ளைகளையும் தேடும் பணியில் ஈடுபட்டுள்ளனர்.
இச்சம்பவம் குறித்து டவுன் காவல் ஆய்வாளர் சுரேஷ் பேசுகையில், “புகார் பெற்ற உடனே விசாரணையைத் தொடங்கிவிட்டோம். முதற்கட்டமாக சாந்தியின் கைபேசி சிக்னல் (Cell Phone Signal) மூலம் அவர்கள் இருக்கும் இடத்தை அறிய தொழில்நுட்ப ரீதியிலான தேடுதல் வேட்டையை நடத்தினோம். எனினும், கைபேசி அணைக்கப்பட்டுள்ளதால் தற்போதைக்குத் துல்லியமான இருப்பிடத்தைக் கண்டறிவதில் சுணக்கம் ஏற்பட்டுள்ளது. இருப்பினும், நகரின் முக்கியப் பகுதிகள் மற்றும் பேருந்து நிலையக் கண்காணிப்புக் கேமரா பதிவுகளை ஆய்வு செய்து, அவர்களைத் தீவிரமாகத் தேடி வருகிறோம்” என்று தெரிவித்தார்.
