திருச்சி , ஏப்ரல் 27: திருச்சி மாவட்டம் மணப்பாறையில் பாரதிய ஜனதா கட்சி நிர்வாகி தாக்கப்பட்ட வழக்கில் கைது செய்யப்பட்ட திராவிட முன்னேற்றக் கழக நிர்வாகி ஆரோக்கியசாமிக்கு, திருச்சி நீதிமன்ற மேஜிஸ்ட்ரேட் 15 நாட்கள் நீதிமன்ற காவல் விதித்து உத்தரவிட்டுள்ளார். கைது நடவடிக்கையைத் தொடர்ந்து தனக்கு நெஞ்சுவலி இருப்பதாகக் கூறி அவர் மருத்துவமனையில் அனுமதிக்கப்பட்ட நிலையில், நீதிபதியின் நேரடி விசாரணையைத் தொடர்ந்து இந்த உத்தரவு பிறப்பிக்கப்பட்டுள்ளது.
மணப்பாறை பகுதியில் அண்மையில் டாஸ்மாக் பார் ஒன்றில் ஏற்பட்ட தகராறில், பாரதிய ஜனதா கட்சியின் நிர்வாகி ஒருவர் மீது தாக்குதல் நடத்தப்பட்டது. இந்தச் சம்பவத்தில் தாக்குதலை நடத்துவதற்காக மூவருக்குப் பணம் கொடுத்து தூண்டியதாக மணப்பாறையைச் சேர்ந்த திமுக நிர்வாகி ஆரோக்கியசாமி மீது காவல் துறையினர் வழக்குப் பதிவு செய்தனர். மேலும் இவர் மீது ஏற்கனவே மணல் கடத்தல் உள்ளிட்ட பல்வேறு வழக்குகள் நிலுவையில் இருப்பதாகக் காவல் துறை தரப்பில் தெரிவிக்கப்படுகிறது.
ALso : டெல்லி மதுபான கொள்கை வழக்கு: கோர்ட்டில் ஆஜராக மறுத்த கெஜ்ரிவால்
இதைத் தொடர்ந்து விசாரணைக்காக ஆரோக்கியசாமியைக் காவல் துறையினர் அழைத்துச் சென்றபோது, மணப்பாறை காவல் நிலையத்தை அவரது ஆதரவாளர்கள் நூற்றுக்கணக்கானோர் முற்றுகையிட்டனர். அவரை உடனடியாக விடுவிக்கக் கோரி அவர்கள் போராட்டத்தில் ஈடுபட்டதால் அந்தப் பகுதியில் பெரும் பரபரப்பும் பதற்றமும் நிலவியது. எனினும், காவல் துறையினர் பாதுகாப்பு ஏற்பாடுகளை பலப்படுத்தி, சட்ட ஒழுங்குப் பிரச்சினைகள் ஏற்படாத வண்ணம் சூழ்நிலையைக் கட்டுக்குள் கொண்டு வந்து ஆரோக்கியசாமியை முறைப்படி கைது செய்தனர்.
கைது செய்யப்பட்ட ஆரோக்கியசாமியின் கைப்பேசியை ஆய்வு செய்தபோது, தேர்தல் நாளன்று வாக்குச்சாவடி ஒன்றில் வன்முறையைத் தூண்டும் வகையிலான தகவல்கள் பரிமாறப்பட்டிருப்பது கண்டறியப்பட்டதாகப் போலீசார் தரப்பில் கூறப்படுகிறது. தேர்தல் நாளில் மணப்பாறையின் குறிப்பிட்ட ஒரு வாக்குச்சாவடியில் ஏற்பட்ட தகராறு, அதனைத் தொடர்ந்து போலீசார் நடத்திய தடியடி மற்றும் பொதுமக்கள் காயமடைந்த சம்பவங்களுக்கும் இந்த வழக்குக்கும் நேரடித் தொடர்பு இருப்பதாக விசாரணையில் தெரியவந்துள்ளது.
கைது நடவடிக்கைக்குப் பின் வழக்கமான மருத்துவப் பரிசோதனைக்காக ஆரோக்கியசாமி திருச்சி அரசு மருத்துவமனைக்கு அழைத்துச் செல்லப்பட்டார். அப்போது அவர் தனக்கு திடீரென கடுமையான நெஞ்சுவலி இருப்பதாகக் கூறியதை அடுத்து, உடனடியாக அவசர சிகிச்சைப் பிரிவில் அனுமதிக்கப்பட்டார். அங்கு அவருக்கு உரியப் பரிசோதனைகளை மேற்கொள்ள மருத்துவர்கள் முயன்றபோது, அவர் அதற்கு முழுமையாக ஒத்துழைக்கவில்லை என்று கூறப்படுகிறது.
இதுகுறித்த தகவல் நீதிமன்றத்திற்குச் சென்றதை அடுத்து, சம்பந்தப்பட்ட மேஜிஸ்ட்ரேட் நேரடியாக திருச்சி அரசு மருத்துவமனைக்குச் சென்று நேரில் ஆய்வு நடத்தினார். ஆரோக்கியசாமியின் உடல்நிலை குறித்து அங்கிருந்த மருத்துவர்களிடம் நீதிபதி கேட்டறிந்தபோது, அவரது உடல்நிலை முற்றிலும் சீராக இருப்பதாகவும், நெஞ்சுவலி எனக் கூறுவது காவலில் எடுக்கப்படுவதைத் தவிர்ப்பதற்கான ஒரு முயற்சியாகத் தெரிவதாகவும் மருத்துவர்கள் தரப்பில் நீதிபதியிடம் விவரிக்கப்பட்டதாகத் தெரிகிறது.
இதனைத் தொடர்ந்து, உடல்நிலை சீராக இருக்கும் பட்சத்தில் உடனடியாகக் காவலில் அனுப்ப நேரிடும் என்று ஆரோக்கியசாமியிடம் நீதிபதி எச்சரித்தார். இந்த எச்சரிக்கையைத் தொடர்ந்து, முன்னதாகக் கடுமையான நெஞ்சுவலி இருப்பதாகக் கூறிய ஆரோக்கியசாமி, தனக்கு லேசான வலி மட்டுமே இருந்ததாகவும் தற்போது உடல்நிலை நன்றாக இருப்பதாகவும் நீதிபதியிடம் தெரிவித்துள்ளார். இந்தத் திடீர் மாற்றத்தை அடுத்து, சட்ட நடைமுறைகளின்படி அவரை 15 நாட்கள் நீதிமன்ற காவலில் வைக்க நீதிபதி உத்தரவிட்டார்.
