புதுக்கோட்டை , ஜூன் 16: புதுக்கோட்டை மாவட்டம் திருமயம் பகுதியில் நிலத்தை அளவீடு செய்து கொடுப்பதற்காகப் புகார்தாரரிடம் 14,000 ரூபாய் லஞ்சம் வாங்கிய நில அளவையரை லஞ்ச ஒழிப்புத்துறை போலீஸார் செவ்வாய்க்கிழமை கையும் களவுமாகப் பிடித்துக் கைது செய்தனர்.
இதுகுறித்து போலீஸ் தரப்பில் கூறப்படுவதாவது: புதுக்கோட்டை மாவட்டம் திருமயம் அருகே உள்ள மழுக்கன்பட்டி கிராமத்தைச் சேர்ந்தவர் பாலமுருகன்.இவருக்குச் சொந்தமாக அந்தப் பகுதியில் இரண்டு பிளாட்டுகள் உள்ளன.இந்த இரண்டு பிளாட்டுகளையும் முறைப்படி நில அளவை (சர்வே) செய்து தருமாறு கோரி திருமயம் நில அளவையர் அலுவலகத்தில் பாலமுருகன் விண்ணப்பித்திருந்தார்.
இதனைத் தொடர்ந்து அங்கு நில அளவையராகப் பணிபுரிந்து வரும் செல்வராஜ் (35) என்பவரைப் பாலமுருகன் நேரில் அணுகித் தனது நிலத்தை அளந்து தருமாறு கேட்டுள்ளார்.அப்போது இரண்டு பிளாட்டுகளையும் சர்வே செய்து கொடுப்பதற்குப் பிரதிபலனாக 14,000 ரூபாய் பணத்தைக் லஞ்சமாகக் கொடுக்க வேண்டும் என்று செல்வராஜ் நிபந்தனை விதித்ததாகக் கூறப்படுகிறது.லஞ்சம் கொடுக்க விரும்பாத பாலமுருகன் இதுகுறித்து புதுக்கோட்டை மாவட்ட லஞ்ச ஒழிப்புத்துறை போலீஸாரிடம் புகார் அளித்தார்.
புகாரின் அடிப்படையில் லஞ்ச ஒழிப்புத்துறை போலீஸாரின் ஆலோசனையின்படி ரசாயனம் தடவிய ரூபாய் நோட்டுகளுடன் பாலமுருகன் திருமயம் நில அளவையர் அலுவலகத்திற்குச் சென்றார்.அங்கு நில அளவையர் செல்வராஜிடம் பாலமுருகன் 14,000 ரூபாய் பணத்தைக் கொடுத்தபோது அங்கு மறைந்திருந்த லஞ்ச ஒழிப்புத்துறை அதிகாரிகள் அவரைச் சூழ்ந்து பிடித்தனர்.
புதுக்கோட்டை லஞ்ச ஒழிப்புத்துறை டிஎஸ்பி ராதாகிருஷ்ணன் தலைமையில் ஆய்வாளர் பீட்டர் உள்ளிட்ட லஞ்ச ஒழிப்புத்துறை அதிகாரிகள் இந்த அதிரடி சோதனையை நடத்தினர்.பாலமுருகனிடம் இருந்து லஞ்சப் பணத்தைப் பெற்றபோது கையும் களவுமாகப் பிடிபட்ட நில அளவையர் செல்வராஜை அதிகாரிகள் முறைப்படி கைது செய்தனர்.இதனைத் தொடர்ந்து லஞ்ச ஒழிப்புத்துறையினர் அவரிடம் தீவிர விசாரணை மேற்கொண்டு வருகின்றனர்.
