சென்னை ,ஜூன் 16 : தமிழகத்தின் நிதி மேலாண்மை குறித்து வெளியிடப்பட்டுள்ள புதிய ‘வெள்ளை அறிக்கை’ (TN_White_Paper_English-2026.pdf) ,கடந்த காலங்களில் அரசு நிர்வாகத்தில் நிலவிய கடுமையான குளறுபடிகளையும் ,திட்டமிடல் இல்லாத போக்கையும் அம்பலப்படுத்தியுள்ளது. கொரோனாவுக்குப் பிந்தைய பொருளாதார மீட்சி காலத்தை மற்ற மாநிலங்கள் தங்களின் நிதி நிலையைச் சீரமைக்கப் பயன்படுத்திய வேளையில் ,தமிழகம் அந்த நல்வாய்ப்பைத் தவறவிட்டு ,மிக மோசமான வருவாய் பற்றாக்குறையிலும் கடன் வலையிலும் சிக்கியிருப்பதாக இந்த அறிக்கையில் தெரிவிக்கபட்டுள்ளது .
பக்கத்து மாநிலங்களான குஜராத் ,கர்நாடகா ,மகாராஷ்டிரா போன்ற தொழில்மயமான மாநிலங்கள் தங்களின் நிதிப் பற்றாக்குறையைக் குறைத்து உன்னத நிலையை எட்டியுள்ள போது ,தமிழகத்தின் முக்கிய நிதி ஆதாரங்கள் மற்றும் குறிகாட்டிகள் வரலாறு காணாத வீழ்ச்சியைச் சந்தித்துள்ளன.
கொரோனாவுக்குப் பிந்தைய பொன்னான வாய்ப்பு வீணடிக்கப்பட்டது எப்படி?
கடந்த 2021-22 முதல் 2025-26 வரையிலான ஐந்தாண்டு காலம் மாநிலங்களின் பொருளாதாரத்தை மீட்டெடுக்க மிகவும் சாதகமாக இருந்தது. இந்த காலகட்டத்தில் மாநிலங்களின் மொத்த உற்பத்தி மதிப்பு (GSDP) சராசரியாக 13 முதல் 14 சதவீதம் வரை வளர்ந்தது. 2022 ஜூன் வரை மத்திய அரசின் முழுமையான ஜிஎஸ்டி இழப்பீட்டுத் தொகையும் (GST Compensation) கிடைத்து வந்தது.
இந்த நல்வாய்ப்பைப் பயன்படுத்தி ,கொரோனா காலத்தில் வாங்கிய கூடுதல் கடன்களை அடைத்து ,வருவாய் பற்றாக்குறையைச் சமன் செய்திருக்க வேண்டும். ஆனால் ,முந்தைய அரசு இந்த வாய்ப்பைக் கோட்டைவிட்டது. 2022-23 ஆம் ஆண்டில் வருவாய் பற்றாக்குறை தற்காலிகமாகக் குறைந்ததாகத் தோன்றினாலும் ,அது அரசு எடுத்த எந்தவொரு ஆக்கப்பூர்வமான சீர்திருத்தத்தாலும் நடக்கவில்லை. கொரோனா காலத்தில் அரசு ஊழியர்களுக்கான அகவிலைப்படி முடக்கம் ,ஈட்டிய விடுப்பு ஒப்படைப்பு (EL Surrender) நிறுத்தம் போன்ற தற்காலிகக் கட்டுப்பாடுகளாலும் ,முடங்கிக்கிடந்த முத்திரைத் தாள் மற்றும் வாகனப் போக்குவரத்து வரிகள் திடீரென வசூலானதாலும்தான் அந்தப் பற்றாக்குறை தற்காலிகமாகக் குறைந்தது.
இந்த தற்காலிகக் காரணிகள் மறைந்தவுடன் ,2023-24 ஆம் ஆண்டு முதல் மாநிலத்தின் நிதி நிலை அனைத்துத் துறைகளிலும் மிக வேகமாகச் சரிவடையத் தொடங்கியது. இது எந்தவொரு வெளிப் பொருளாதார நெருக்கடியாலும் ஏற்படவில்லை ,முற்றிலும் முந்தைய அரசின் தவறான கொள்கை முடிவுகளாலேயே நிகழ்ந்துள்ளது என வெள்ளை அறிக்கை தெளிவுபடுத்துகிறது .
நிதி வீழ்ச்சிக்குக் காரணமான 4 முக்கிய நிர்வாகச் சீர்கேடுகள்
தமிழகத்தின் இந்த தற்போதைய நிதி நெருக்கடிக்கு முந்தைய அரசின் நான்கு முக்கிய நிர்வாகத் தோல்விகள் காரணமாக முன்வைக்கப்படுகின்றன:
1. வருவாய் ஆதாரங்களை பெருக்காமல் அறிவிக்கப்பட்ட தொடர் செலவினங்கள்:
தமிழகத்தின் சமூக நலத்திட்டங்கள் மற்றும் இலவசத் திட்டங்கள் மாநிலத்தின் அடையாளமாகத் திகழ்பவை ,அதில் மாற்றுக் கருத்து இல்லை. ஆனால் ,’கலைஞர் மகளிர் உரிமைத் திட்டம்’ ,விவசாயக் கடன் தள்ளுபடி ,பெண்களுக்கு இலவசப் பேருந்துப் பயணம் ,மாணவ-மாணவியருக்கான நேரடி பணப்பரிமாற்றத் திட்டங்கள் (DBT) போன்ற புதிய மற்றும் விரிவாக்கப்பட்ட திட்டங்களை அமல்படுத்திய போது ,அதற்கேற்ற கூடுதல் வருவாய் ஆதாரங்களை அரசு பெருக்கவில்லை. இதனால் ,2024-25 ஆம் ஆண்டிற்குள் இந்தத் திட்டங்களுக்கான தொடர் செலவினம் மட்டும் ₹20,000 கோடியைத் தாண்டியது. இது அந்த ஆண்டின் ஒட்டுமொத்த வருவாய் பற்றாக்குறையில் பாதியாகும்.
2. சொந்த வரி வருவாய் வீழ்ச்சியும் ,முறைகேடுகளும்:
2017 முதல் 2022 வரையிலான 5 ஆண்டு ஜிஎஸ்டி இடைக்காலக் குஷனைப் பயன்படுத்தி மாநில அரசு தனது சொந்த வரி வருவாயைப் பெருக்கியிருக்க வேண்டும். இந்த ஐந்து ஆண்டுகளில் தமிழகத்திற்கு ₹66,185 கோடி இழப்பீடாகக் கிடைத்த போதிலும் ,சொந்த வரி விதிப்பு முறைகளை அரசு பலப்படுத்தவில்லை.
வணிக வரித் துறையில் (Commercial Taxes Department) நிலவிய முறையான ஊழல் மற்றும் வரி நிர்வாகக் குளறுபடிகள் காரணமாக ,கணக்கில் வராத வரி இழப்புகளும் ,வருவாய் கசிவுகளும் பெருமளவில் ஏற்பட்டதாக அறிக்கை சுட்டிக்காட்டுகிறது.
- முத்திரைத் தாள் வழிகாட்டி மதிப்பு (Stamp Duty Guideline Values): ரியல் எஸ்டேட் சந்தை வேகமாக வளர்ந்த போதிலும் ,வழிகாட்டி மதிப்புகள் சந்தை மதிப்பை விட மிகக் குறைவாகவே வைக்கப்பட்டிருந்தன. இதனால் வர வேண்டிய பெருமளவு வருவாய் இழக்கப்பட்டது.
- மாநில கலால் வரி (State Excise): அண்டை மாநிலங்களுடன் ஒப்பிடுகையில் தமிழகத்தின் கலால் வரி வருவாய் மிகக் குறைவு. கர்நாடகாவின் கலால் வரி வளர்ச்சி 11.7% ஆக இருந்த போது ,தமிழகத்தில் அது வெறும் 9.5% மட்டுமே இருந்தது. அரசுப் பெட்டகத்திற்கு வராமல் ,இணையாக நடந்த முறைகேடான வசூல்களே இதற்கு முக்கியக் காரணம்.
இதன் விளைவாக ,மாநிலத்தின் சொந்த வரி வருவாய் மற்றும் ஜிஎஸ்டி விகிதம் (SoTR/GSDP) 2022-23ல் 6.33% ஆக இருந்தது ,2025-26ல் 5.45% ஆகக் குறைந்தது. 2022-23 நிதியாண்டின் வருவாய் திறனை அரசு தக்கவைத்திருந்தாலே ,கடந்த 3 ஆண்டுகளில் ₹51,000 கோடி வருவாய் இழப்பைத் தவிர்த்திருக்கலாம்.
3. மூலதனச் செலவினங்கள் (Capital Expenditure) புறக்கணிப்பு:
அரசு தனது அன்றாடச் செலவுகளுக்கும் ,இலவசத் திட்டங்களுக்கும் கடன் வாங்கியதே தவிர ,புதிய சொத்துக்களை உருவாக்கவோ ,பொருளாதாரத்தை மேம்படுத்தவோ முதலீடு செய்யவில்லை. மூலதனச் செலவின விகிதம் 2021-22ல் 1.79% லிருந்து 2025-26ல் 1.44% ஆகக் குறைந்தது.
அதே நேரத்தில் ,குஜராத் மாநிலம் தனது மொத்த உற்பத்தியில் 2.9% தொகையையும் ,கர்நாடகா மற்றும் மகாராஷ்டிரா மாநிலங்கள் 1.9% தொகையையும் புதிய உள்கட்டமைப்புகளுக்காகச் செலவிடுகின்றன. தமிழகம் மூலதனச் செலவினத்தைக் குறைத்ததால் கடந்த 3 ஆண்டுகளில் ₹28,217 கோடி முதலீட்டை இழந்துள்ளது. இந்தத் தொகையைக் கொண்டு 1,000 கி.மீ தூரத்திற்கு 4 வழி விரைவுச் சாலைகள் ,30 பெரிய பன்னோக்கு மருத்துவமனைகள் அல்லது 2,000 மேல்நிலைப் பள்ளிக் கட்டிடங்களைக் கட்டியிருக்க முடியும். உள்கட்டமைப்பு இல்லாத மாநிலங்களை நோக்கிப் புதிய தனியார் முதலீடுகள் வராது என்பதால் ,தமிழகத்தின் எதிர்காலத் தொழில் வளர்ச்சி இதனால் பாதிக்கப்பட்டுள்ளது.
4. பட்ஜெட்டுக்கு வெளியே வாங்கிய கடன்கள் (Off-Budget Borrowings):
பொதுத்துறை நிறுவனங்களின் நஷ்டத்தைச் சீரமைக்காமல் ,அவற்றின் பெயரில் பட்ஜெட்டுக்கு வெளியே பெருமளவில் கடன்கள் வாங்கிக் குவிக்கப்பட்டன. அரசின் உத்தரவாதக் கடன்கள் (State Government Guarantees) 2021-22ல் ₹91,975 கோடியாக இருந்தது ,2025-26ல் ₹1,79,782 கோடியாக – அதாவது ₹88,000 கோடி வரை உயர்ந்துள்ளது.
அதேபோல் ,தமிழ்நாடு நுகர்பொருள் வாணிபக் கழகத்தின் (TNCSC) மூலதனக் கடன் ,அரசு வழங்க வேண்டிய மானிய நிலுவைகள் காரணமாக ₹17,500 கோடியிலிருந்து ₹27,181 கோடியாக உயர்ந்தது. இது பட்ஜெட்டில் கடனாகக் காட்டப்படாவிட்டாலும் ,இறுதியில் அரசுதான் வட்டியோடு அடைக்க வேண்டும்.
அண்டை மாநிலங்களுடன் ஒப்பீடு: தமிழகம் தனித்து விடப்பட்டது ஏன்?
கர்நாடகா ,மகாராஷ்டிரா ,குஜராத் போன்ற மாநிலங்கள் தங்களின் ஒட்டுமொத்தக் கடனைக் கணிசமாகக் குறைத்துள்ளன. ஆனால் ,தமிழகம் வெறும் 0.4% மட்டுமே கடனைக் குறைத்து ,28.3% என்ற அபாயகரமான கடன் விகிதத்தில் உள்ளது (நிர்ணயிக்கப்பட்ட இலக்கு 25.2% மட்டுமே).
2025-26 நிதியாண்டில் குஜராத் மாநிலம் உபரி வருவாயைக் (0.8% Surplus) காட்டியுள்ளது. கர்நாடகா (-0.8%) மற்றும் மகாராஷ்டிரா (-0.7%) மாநிலங்கள் மிகக் குறைந்த பற்றாக்குறையைக் கொண்டுள்ளன. ஆனால் ,தமிழகத்தின் வருவாய் பற்றாக்குறை மட்டும் 2.2% (₹78,324 கோடி) ஆக உயர்ந்து ,வரலாற்று சாதனை படைத்துள்ளது. நிதி ஆரோக்கியத்தில் தமிழகம் தனது அண்டை மாநிலங்களை விட மிகவும் பின்தங்கியுள்ளது.
2026-27 இடைக்கால பட்ஜெட்டில் நடந்த கணக்கு மோசடிகள் அம்பலம்!
தேர்தல் ஆண்டான 2026-27 ஆம் ஆண்டிற்கான இடைக்கால பட்ஜெட்டில் (Interim Budget Estimates) முந்தைய அரசு காட்டிய கணக்குகள் அனைத்தும் முற்றிலும் யதார்த்தத்திற்குப் புறம்பானவை என்பதை வெள்ளை அறிக்கை புள்ளிவிவரங்களுடன் நிரூபித்துள்ளது.
- வருவாயை அதிகமாகக் காட்டுதல்: மாநிலத்தின் சொந்த வரி வருவாய் (SOTR) 19% வளர்ச்சியடைந்து ₹2,29,579 கோடியாக உயரும் என பட்ஜெட்டில் கணக்குக் காட்டப்பட்டுள்ளது. ஆனால் ,கடந்த இரு ஆண்டுகளில் வரி வளர்ச்சி முறையே 6.8% மற்றும் 7.7% மட்டுமே இருந்தது. தற்போதைய சூழலில் 8% வளர்ச்சி மட்டுமே சாத்தியம் என்பதால் ,வருவாய் கணக்கில் கிட்டத்தட்ட ₹21,000 கோடி அதிகமாகக் காட்டப்பட்டுள்ளது. மேலும் ,மத்திய அரசுடன் ‘மும்மொழிவழிக் கொள்கை’ விவகாரத்தில் நிலவும் மோதலால் நிறுத்தி வைக்கப்பட்டுள்ள ‘சமக்ர சிக்ஷா அபியான்’ திட்டத்தின் ₹5,000 கோடி நிதியும் பட்ஜெட்டில் வரும் என்று சேர்க்கப்பட்டுள்ளது.
- செலவுகளை மறைத்தல்: மின்சார வாரியத்திற்கு (TNPDCL) ஆண்டுதோறும் வழங்கப்படும் ₹16,000 கோடி நஷ்ட ஈட்டுத் தொகை பட்ஜெட்டில் சேர்க்கப்படவே இல்லை. மேலும் ,உச்ச நீதிமன்ற உத்தரவுப்படி மின்சார வாரியத்தின் பழைய நஷ்டங்களைச் சரிசெய்ய வழங்க வேண்டிய ₹11,800 கோடியும் கணக்கில் காட்டப்படவில்லை. இதன் மூலம் ₹27,800 கோடி செலவினங்கள் பட்ஜெட்டில் மறைக்கப்பட்டுள்ளன.
உண்மையான நிதிப் பற்றாக்குறை நிலவரம்: இந்தத் தவறான கணக்குகளைச் சீரமைத்தால் ,பட்ஜெட்டில் கூறப்பட்ட ₹48,696 கோடி வருவாய் பற்றாக்குறை என்பது ,உண்மையில் ₹90,500 கோடியாக உயரும். அதேபோல் ,₹1.22 லட்சம் கோடி எனக் கணிக்கப்பட்ட ஒட்டுமொத்த நிதிப் பற்றாக்குறை (Fiscal Deficit) ₹1,63,750 கோடியாக அதிகரிக்கும்.
கடன் வாங்குவதிலும் சிக்கல் – அடுத்த தலைமுறை மீதான சுமை
அரசியலமைப்புச் சட்டம் 293(3)-ன்படி ,ஒரு மாநில அரசு நினைத்தபடி கடன் வாங்க முடியாது. மத்திய அரசு விதித்துள்ள 3% ஜிஎஸ்டி வரம்பின்படி ,தமிழகத்தால் இந்த ஆண்டு அதிகபட்சமாக ₹1.14 லட்சம் கோடி மட்டுமே நிகரக் கடனாகப் பெற முடியும். இதர சிறப்பு சீர்திருத்தக் கடன்களையும் சேர்த்தால் அதிகபட்சமாக ₹1,52,144 கோடி மட்டுமே கடன் வாங்க இயலும்.
இதன் காரணமாக ,பட்ஜெட் பற்றாக்குறையைச் சமாளிக்க இன்னும் ₹11,600 கோடி பற்றாக்குறை நிலவுகிறது. வரி வருவாய் மேலும் குறைந்தால் இந்த இடைவெளி இன்னும் அதிகரிக்கும்.
இன்றைய நிலையில் ,தமிழகத்தின் ஒட்டுமொத்தக் கடன் மற்றும் பொறுப்புகள் சேர்த்து ₹13.18 லட்சம் கோடியாக உள்ளது. அரசு வாங்கும் கடனுக்கான வட்டி மட்டும் ஆண்டுக்கு ₹67,050 கோடி செலுத்த வேண்டியுள்ளது. இது மாநிலத்தின் மொத்த வருவாயில் 23% மற்றும் சொந்த வரி வருவாயில் 35% ஆகும். அதாவது ,புதிய திட்டங்களை உருவாக்குவதை விட பழைய கடன்களுக்கு வட்டி கட்டுவதற்கே தமிழக அரசு ஒட்டுமொத்தப் பணத்தையும் செலவிடுகிறது.
தமிழகத்தின் உழைக்கும் மக்கள் தொகையின் விகிதம் (Demographic Dividend) மற்ற மாநிலங்களை விட வேகமாகச் சுருங்கி வரும் வேளையில் ,இந்த இமாலயக் கடன் சுமை அடுத்த தலைமுறையின் தோள்களில் மிகப்பெரிய சுமையாக மாறப்போகிறது.
இனி இருக்கும் ஒரே வழி என்ன?
தமிழகத்தின் உண்மையான நிதி நிலவரத்தைப் பொதுமக்கள் முழுமையாகத் தெரிந்துகொள்ள வேண்டும் என்ற ஒரே நோக்கத்திற்காகவே இந்த வெள்ளை அறிக்கை தயாரிக்கப்பட்டுள்ளது.
நிதி நிலைமை மிகவும் மோசமாக இருந்தாலும் ,இதிலிருந்து மீள வழியே இல்லை என்று கூற முடியாது. வருவாய் துறைகளில் நிலவும் ஊழல்களையும் ,கசிவுகளையும் இரும்புக்கரம் கொண்டு ஒடுக்குவது ,பொதுத்துறை நிறுவனங்களைச் சீரமைப்பது ,மக்களுக்குக் கூடுதல் சுமை தராமல் புதிய வருவாய் ஆதாரங்களைக் கண்டறிவது மற்றும் கடுமையான நிதி ஒழுக்கத்தைக் கடைப்பிடிப்பது மட்டுமே தமிழகத்தை மீண்டும் வளர்ச்சிப் பாதைக்குக் கொண்டு செல்லும் ஒரே வழியாகும் என்று வெள்ளை அறிக்கை திட்டவட்டமாகத் தெரிவிக்கிறது.
