சென்னை , ஏப்ரல் 27 : தமிழ்நாடு சட்டமன்றத் தேர்தல் வாக்குப்பதிவு நிறைவடைந்துள்ள நிலையில் ஒட்டுமொத்த மாநிலத்தின் பார்வையும் மே 4ஆம் தேதி நடைபெறவுள்ள வாக்கு எண்ணிக்கையை நோக்கித் திரும்பியுள்ளது. இந்தச் சூழலில் நடிகர் சி. ஜோசப் விஜய் தலைமையிலான தமிழக வெற்றிக் கழகம் வாக்கு எண்ணிக்கை நாளுக்கான ஆயத்தப் பணிகளில் தீவிரமாக இறங்கியுள்ளது. குறிப்பாக தேர்தலுக்கு முந்தைய கடைசி 4 நாட்களில் வாக்காளர்களின் மனநிலையில் மிகப்பெரிய மாற்றம் ஏற்பட்டுள்ளதாக அக்கட்சியின் முக்கிய நிர்வாகி ஆதவ் அர்ஜுனா தெரிவித்துள்ள கருத்து அரசியல் வட்டாரங்களில் புதிய விவாதத்தைக் கிளப்பியுள்ளது.
தமிழகத்தில் இம்முறை சுமார் 85 சதவீத அளவிற்கு வாக்குப்பதிவு சாதனை அளவாகப் பதிவாகியுள்ளது. இந்த அதீத வாக்குப்பதிவு வழக்கம் போல நடக்கும் தேர்தல் கணக்குகளை முற்றிலும் மாற்றியமைத்துள்ளதாக அரசியல் ஆய்வாளர்கள் கருதுகின்றனர். குறிப்பாகப் பெண்கள் மற்றும் இளம் வாக்காளர்களின் எழுச்சி புதிய வாக்காளர்களின் மனமாற்றம் மற்றும் பாரம்பரிய அரசியல் கட்சிகள் மீதான சலிப்பு ஆகியவையே இந்த உயர்விற்குக் காரணம் என தவெக தரப்பில் கூறப்படுகிறது. இத்தகைய வாக்குப்பதிவை ஒரு வரலாற்றுத் தருணம் என்று வர்ணித்துள்ள கட்சித் தலைவர் விஜய் இது தமிழக அரசியலில் ஒரு புதிய மாற்றத்தின் தொடக்கம் என்று நம்பிக்கை தெரிவித்துள்ளார்.
தேர்தல் களம் முடிவடைவதற்கு முந்தைய இறுதி நான்கு நாட்களில் அடிமட்டத்தில் நிலவிய சூழல் முற்றிலும் மாறியதாக ஆதவ் அர்ஜுனா தனது பேட்டியில் சுட்டிக்காட்டியுள்ளார். தவெகவினர் வீடு வீடாகச் சென்று நடத்திய தீவிரப் பிரச்சாரம் மற்றும் பண விநியோகக் குற்றச்சாட்டுகளுக்கு எதிராகப் பொதுமக்கள் மத்தியில் உருவான தன்னிச்சையான எதிர்ப்பு நிலை ஆகியவை இந்த மாற்றத்திற்குக் காரணம் என்று அக்கட்சி நம்புகிறது. ஐம்பது வருடத் தமிழக அரசியல் வரலாற்றில் இதுவரை இல்லாத ஒரு மாற்றுத் தீர்ப்பை இந்தத் தேர்தல் வழங்கும் என்பதே தவெகவின் தற்போதைய கணிப்பாக உள்ளது.
புதிய கட்சியாக இருந்தாலும் வாக்கு எண்ணும் மையங்களில் முறைகேடுகளைத் தவிர்க்க மைக்ரோ லெவல் எனப்படும் மிக நுணுக்கமான கண்காணிப்புப் பணிகளை அக்கட்சி திட்டமிட்டுள்ளது. மாநிலத்தின் 234 தொகுதிகளிலும் வாக்கு எண்ணிக்கையைத் துல்லியமாகக் கண்காணிக்க ஒவ்வொரு வேட்பாளருக்கும் தனித்தனிக் குழுக்கள் அமைக்கப்பட்டுள்ளன. இவற்றுடன் சட்டரீதியான சிக்கல்களை எதிர்கொள்ள வழக்கறிஞர்கள் குழுவும் தயார் நிலையில் வைக்கப்பட்டுள்ளது. மின்னணு வாக்குப்பதிவு இயந்திரங்கள் வைக்கப்பட்டுள்ள காப்பகங்களை (Strong Room) 24 மணி நேரமும் மூன்று ஷிப்டுகளாகப் பிரிந்து தவெகவினர் தீவிரமாகக் கண்காணித்து வருகின்றனர். ஒவ்வொரு சுற்று வாக்கு எண்ணிக்கையையும் உடனுக்குடன் சரிபார்ப்பதற்கான சிறப்புப் பயிற்சியும் முகவர்களுக்கு வழங்கப்பட்டுள்ளது.
தேர்தல் இறுதிக் கட்டத்தை எட்டியபோது ஆளுங்கட்சியான திமுக சில இடங்களில் அத்துமீறல்களில் ஈடுபட்டதாகவும் பண பலத்தைப் பயன்படுத்தியதாகவும் தவெக தரப்பில் சில கடுமையான புகார்கள் முன்வைக்கப்பட்டுள்ளன. எனினும் இந்த விவகாரங்கள் குறித்து அதிகாரப்பூர்வமான ஆதாரங்கள் எதுவும் இதுவரை வெளியாகவில்லை. தேர்தல் ஆணையமும் மாநிலத்தில் மறுவாக்குப்பதிவு நடத்துவதற்கான எந்தவொரு சூழலும் எழவில்லை என்பதைத் தெளிவுபடுத்தியுள்ளது.
