சைபீரியா,ஏப்ரல் 27 : உலக அறிவியல் அரங்கில் பெரும் வியப்பையும் ஆச்சரியத்தையும் ஏற்படுத்தும் வகையில் சைபீரியாவின் ஆழமான பனிப்பகுதியில் சுமார் 24000 ஆண்டுகள் உறைந்து கிடந்த அரிய நுண்ணுயிர் ஒன்றை விஞ்ஞானிகள் வெற்றிகரமாக மீண்டும் உயிர்ப்பித்துள்ளனர்.ரஷ்யாவின் முக்கிய ஆராய்ச்சி நிறுவனங்களைச் சேர்ந்த விஞ்ஞானிகள் குழு மேற்கொண்டுள்ள இந்த அசாதாரண கண்டுபிடிப்பு ஒட்டுமொத்த உயிரியல் மற்றும் எதிர்கால மருத்துவ ஆராய்ச்சிகளில் முற்றிலும் புதிய பாதைகளைத் திறந்துவிட்டுள்ளது.
பனிப்பாறைகளுக்கு அடியில் கண்டெடுக்கப்பட்ட இந்த நுண்ணுயிர் பெடலாய்டு ரோட்டிபர் (Bdelloid Rotifer) எனப்படும் ஒரு சிறிய நன்னீர்வாழ் உயிரினமாகும்.மிகச்சிறிய வடிவம் கொண்ட இந்த உயிரினங்கள் பொதுவாகவே கடுமையான சுற்றுச்சூழல் மாறுபாடுகளையும் தாங்கி உயிர் பிழைக்கும் அசாத்திய விநோதத் திறன் கொண்டவை என்று அறியப்பட்ட நிலையில் தற்போது பல்லாயிரக்கணக்கான ஆண்டுகள் உறைபனிக்குள் இருந்தும் இவை தப்பியிருப்பது உறுதியாகியுள்ளது.
TVK தலைவர் விஜய் ‘நாமினேஷன்’ வழக்கில் பெரிய திருப்பம்: சென்னை உயர்நீதிமன்றம் மனு தள்ளுபடி
ரஷ்யாவின் எடோமா பெர்மாபிராஸ்ட் (Yedoma permafrost) என்று அழைக்கப்படும் நிலத்தடி பனி அடுக்குப்பகுதியில் அலாசேயா ஆற்றின் அருகே இந்த வரலாற்று முக்கியத்துவம் வாய்ந்த மாதிரிகள் சேகரிக்கப்பட்டன.மைனஸ் 20 டிகிரி செல்சியஸ் என்ற உறைநிலைக்குக் கீழான கடுமையான குளிரில் ஆயிரக்கணக்கான ஆண்டுகளாகப் பழமையான இயற்கை சூழல் மாறாமல் பாதுகாக்கப்பட்ட பனி அடுக்கு இதுவாகும்.அங்கிருந்து சேகரிக்கப்பட்ட மண் மற்றும் பனி மாதிரிகளை விஞ்ஞானிகள் தங்களின் நவீன ஆய்வகத்திற்குக் கொண்டு வந்து மிக மெதுவாக உருகச் செய்தபோதுதான் அந்த வியத்தகு அறிவியல் நிகழ்வு சாத்தியமாகியிருக்கிறது.
கார்பன் காலக்கணிப்பு (Radiocarbon testing) சோதனைகளின் மூலம் இந்த குறிப்பிட்ட நுண்ணுயிர் தோராயமாக 24000 ஆண்டுகளுக்கு முந்தைய வரலாற்றுக்கு முற்பட்ட காலத்தைச் சேர்ந்தது என்பது விஞ்ஞானப்பூர்வமாக நிரூபிக்கப்பட்டுள்ளது.ஆய்வகத்தில் பனி உருகத் தொடங்கிய சில நாட்களிலேயே அந்த நுண்ணுயிர் மெதுவாக நகரத் தொடங்கியதோடு தன்னிச்சையாக உணவை உட்கொள்ளவும் ஆரம்பித்துள்ளது.அதன் அனைத்து இயல்பான உயிரியல் செயல்பாடுகளும் எவ்வித தடையுமின்றி மீண்டும் செயல்படத் தொடங்கியதே இந்த ஒட்டுமொத்த ஆராய்ச்சியின் மிகப்பெரிய மைல்கல்லாகக் கருதப்படுகிறது.
சர்வதேச ஊடகங்கள் சில இந்த விநோத நிகழ்வை ஜாம்பி புழு (Zombie Worm) என்று வர்ணித்துக் செய்திகளை வெளியிட்டு வரும் நிலையில் இந்த ஆய்வின் முதன்மை விஞ்ஞானியான ஸ்டாஸ் மலாவின் அந்தப் பெயரைத் திட்டவட்டமாக மறுத்துள்ளார்.இது குறித்து அவர் விளக்குகையில் இந்த உயிரினம் இடைப்பட்ட காலத்தில் இறந்து போகவில்லை என்றும் மாறாகத் தன் உடலின் ஒட்டுமொத்த செயல்பாடுகளையும் முற்றிலுமாக நிறுத்திவிட்டு ‘சஸ்பெண்டட் அனிமேஷன்’ (Suspended animation) எனப்படும் ஒரு நீண்டகால தற்காலிக உறக்க நிலைக்குச் சென்றுவிட்டதாகவும் குறிப்பிட்டுள்ளார்.அதாவது அதன் உயிர் அழியாமல் செல்கள் மற்றும் திசுக்களின் இயக்கம் தற்காலிகமாக முடக்கி வைக்கப்பட்டிருந்தது என்பதே உண்மை.
ஆய்வகத்தில் இந்த நுண்ணுயிர் உயிர்பெற்ற சில தினங்களிலேயே ஆண் துணையின்றி தானாகவே இனப்பெருக்கம் செய்யத் தொடங்கியதும் விஞ்ஞானிகளை ஆச்சரியத்தில் ஆழ்த்தியுள்ளது.பார்த்தினோஜெனீசிஸ் (Parthenogenesis) எனப்படும் இந்த கன்னிப் பிறப்பு முறையில் அது தன் குட்டிகளை உருவாக்கியுள்ளதுடன் அவ்வாறு பிறந்த அடுத்த தலைமுறை உயிரினங்கள் அனைத்தும் தாயின் அசல் நகலாக (Exact clone) இருந்ததும் கண்டறியப்பட்டுள்ளது.தசை நரம்பு மற்றும் செரிமான மண்டலங்கள் போன்ற சிக்கலான உடல் அமைப்புகளைக் கொண்ட ஒரு பல்லுயிர் இவ்வளவு நீண்ட காலம் டிஎன்ஏ (DNA) சிதைவு ஏதுமின்றி எப்படிப் தப்பிப் பிழைத்தது என்ற கேள்விக்கான விடையை நோக்கி தற்போது ஆராய்ச்சிகள் தீவிரமடைந்துள்ளன.
இந்தக் கண்டுபிடிப்பானது வெறும் அறிவியல் ஆச்சரியத்தோடு நின்றுவிடாமல் மனித மருத்துவத் துறையில் மிகப்பெரிய மாற்றங்களை விதைக்கக் கூடியது என்று நிபுணர்கள் கருதுகின்றனர்.குறிப்பாக விண்வெளிப் பயணங்களின் போது மனித உடலின் செயல்பாடுகளைத் தற்காலிகமாகத் தடுத்து நிறுத்தும் தொழில்நுட்பங்கள் மற்றும் அவசர அறுவை சிகிச்சைகளுக்காக மனித உடல் உறுப்புகளைப் பல்லாண்டுகள் கெடாமல் பாதுகாக்கும் அதிநவீன குளிர் பதன பாதுகாப்பு (Cryopreservation) உத்திகளை மேம்படுத்த இந்த நுண்ணுயிரின் செல் கட்டமைப்பு பெரிதும் உதவக்கூடும்.பனிப்பாறைகள் உருகி வரும் தற்போதைய உலகளாவிய காலநிலை மாற்ற சூழலில் இது போன்ற பழமையான உயிரினங்கள் வெளியில் வருவது புதிய மருத்துவ வாய்ப்புகளையும் அதே நேரத்தில் சாத்தியமான உயிரியல் சவால்களையும் ஒருசேரக் கவனிக்க வேண்டிய அவசியத்தை உலகிற்கு உணர்த்தியுள்ளது.
