சென்னை , ஜூன் 18 : தமிழக அரசியலில் நீண்ட நெடிய இடதுசாரிப் பாரம்பரியம் கொண்ட இந்திய கம்யூனிஸ்ட் கட்சியின் (சிபிஐ) மூத்த தலைவர்களில் ஒருவரான சி.மகேந்திரன் சமீபத்தில் நடிகர் விஜய் தலைமையிலான தமிழக வெற்றிக் கழகத்தில் (தவெக) இணைந்தது அரசியல் வட்டாரத்தில் பெரும் விவாதங்களை ஏற்படுத்தியிருந்தது. இந்த நிலையில் தான் ஏன் கம்யூனிஸ்ட் இயக்கத்தை விடுத்து தமிழக வெற்றிக் கழகத்தில் இணைந்தேன் என்பது குறித்து அவர் தற்போது பொதுவெளியில் மனம் திறந்து விரிவான விளக்கமளித்துள்ளார்.
சென்னையில் நடைபெற்ற தவெக கூட்டத்தில் அக்கட்சியின் பொதுச்செயலாளர் மற்றும் நிர்வாகிகள் முன்னிலையில் உரையாற்றிய சி.மகேந்திரன் தனது அரசியல் பயணம் குறித்தும் இந்த திடீர் முடிவின் பின்னணி குறித்தும் பேசினார். தான் அரசியலில் எப்போதுமே ஒரு வித்தியாசமான பாதையைத் தேர்ந்தெடுத்தவன் என்று குறிப்பிட்ட அவர் தனது 18 வயது முதல் இன்று வரை கம்யூனிஸ்ட் இயக்கத்திற்காகவே உழைத்ததாகக் கூறினார். கம்யூனிஸ்ட் கொள்கைகளுக்காகத் தமிழ்நாட்டின் பல்வேறு சிறைச்சாலைகளில் போராட்டங்களில் பங்கேற்றுச் சிறைவாசம் அனுபவித்தவன் என்பதைச் சுட்டிக்காட்டிய அவர், தவெக-வில் இணைந்த பின்னரும் தனது அடையாளத்தை மாற்றிக்கொள்ளப் போவதில்லை என்பதைத் தெளிவுபடுத்தினார்.
Also : white Paper Explained: வெள்ளை அறிக்கை என்றால் என்ன? ஏன் வெளியிடுகிறார்கள்? முக்கிய தகவல்கள்
அரசியல் களத்தில் தமிழக வெற்றிக் கழகத்தில் இணைந்தாலும், தன்னுடைய சிகப்புத் துண்டை எடுக்காமல் அதைத் தோளில் போட்டுக் கொண்டேதான் இந்த இயக்கத்திலும் தொடர்ந்து செயல்பட விரும்புவதாக அவர் குறிப்பிட்டார். இதற்கான பிரதானக் காரணியாக அவர் முன்வைத்தது ஊழல் ஒழிப்பு என்ற ஒற்றை இலக்கைத் தான். தனது வாழ்நாள் முழுவதும் சிந்தித்து பல்வேறு போராட்டங்களை நடத்தியும் ஒழிக்க முடியாமல் போன ஊழல் என்ற பெரும் பிரச்னையைத் தவெக தலைவர் விஜய் ஒழித்துக் காட்டுவார் என்ற நம்பிக்கை தனக்கு ஏற்பட்டுள்ளதாக மகேந்திரன் தெரிவித்தார்.
தற்போதைய சமூகக் கட்டமைப்பு என்பது மேல்தட்டு மக்களுக்கும் ஆதிக்கக்காரர்களுக்கும் மட்டுமேயான வசதிகளைச் செய்து கொடுக்கும் ஒன்றாக இருப்பதாகத் தனது உரையில் சாடினார். என்னதான் மேடைகளில் அரசியல் பேசினாலும் ஒடுக்கப்பட்ட ஒரு சாமானியனுக்கு அரசாங்கத்தின் பணமும் அதன் பலன்களும் முழுமையாகப் போய்ச் சேருவதில்லை என்று குறிப்பிட்ட அவர் அந்தச் சாத்தியக் கூறுகளைத் தவெக தலைவர் விஜய் தனது அரசியல் செயல்பாடுகள் மூலம் சாத்தியப்படுத்திக் காட்டியுள்ளதாகக் கூறினார். இந்த மாற்று அரசியல் முயற்சி தமிழ்நாட்டின் வெற்றி மட்டுமல்லாது ஒட்டுமொத்த இந்தியாவின் வெற்றியாகவே தான் கருதுவதாகவும், இப்படி ஒரு வெற்றியை இந்தியாவில் வேறெங்குமே பார்க்க முடியாது என்றும் அவர் சிலாகித்துப் பேசினார்.
தன் நீண்டகால அரசியல் அனுபவத்தில் வியந்து பார்த்த பல விஷயங்களை விட தவெக முன்னெடுத்த தேர்தல் களம் ஜாதியையும் மதத்தையும் ஒழித்துக் காட்டியிருப்பதாக அவர் புகழாரம் சூட்டினார். ஜாதியை ஒழிக்க வேண்டும் என்று பலரும் காலம் காலமாகப் பேசி வந்தாலும் அதனை நடைமுறையில் ஒழிக்க முடியாமல் இருந்த சூழலில் இக்கட்சி அதைச் சாத்தியமாக்கியுள்ளது என்றார். மேலும் ஏழை மற்றும் பணக்காரன் என்ற சமூகப் பொருளாதார வேறுபாடுகளைப் போக்கி, இந்திய ஜனநாயகத்தில் ஒரு சராசரி குடிமகனும் தேர்தலில் நின்று வெற்றி பெற முடியும் என்ற புதிய வரலாற்றைத் தவெக தலைவர் தளபதி விஜய் உருவாக்கியுள்ளதாக அவர் பெருமிதம் தெரிவித்தார்.
கடந்த 2012ஆம் ஆண்டு பிரான்ஸ் நாட்டின் பாரிஸ் மாநகரில் நடைபெற்ற உலகத் தலைவர்கள் பங்கேற்ற ஒரு சர்வதேச மாநாட்டைத் தனது உரையில் நினைவு கூர்ந்தார் சி.மகேந்திரன். அந்த மாநாட்டில் தற்காலச் சூழலில் ஒரு சாதாரண ஏழையால் சட்டமன்றத்திற்கோ அல்லது நாடாளுமன்றத்திற்கோ செல்ல முடியுமா என்ற பிரதான கேள்வி உலகத் தலைவர்களால் எழுப்பப்பட்டதை அவர் சுட்டிக்காட்டினார். ஆனால் இன்றைய சூழலில் பணம் இல்லாதவன், காசு இல்லாதவன் கூடத் தேர்தலில் நின்று வெற்றி பெற்று மக்கள் பிரதிநிதியாகச் செல்ல முடியும் என்ற நிலையைத் தமிழக வெற்றிக் கழகத்தின் தேர்தல் களம் நிரூபித்துக் காட்டியுள்ளதாகக் கூறினார். இதனை இந்திய ஜனநாயகத்தில் ஏற்பட்டுள்ள ஒரு புரட்சிகரமான மாற்றமாகவே தான் பார்ப்பதாக அவர் குறிப்பிட்டார்.
அரசியல் கட்சிகள் மற்றும் தங்களுக்குள் இருக்கும் கொள்கை வேறுபாடுகள், மாறுபாடுகளைக் கடந்து எளிய மக்களுக்கான ஒரு மாபெரும் அரசியலாக இது மாற வேண்டும் என்பதே தனது விருப்பம் என்றார் மகேந்திரன். முற்காலத்தில் மகாத்மா காந்தி, தந்தை பெரியார், அண்ணல் அம்பேத்கர் போன்ற தலைவர்கள் எளிய மக்களுக்காக எடுத்த மாபெரும் மக்கள் இயக்கங்களைப் போலத் தமிழக வெற்றிக் கழகமும் வளர வேண்டும் என்றும் அதற்கான விதை தற்போது துல்லியமாகப் போடப்பட்டுவிட்டது என்றும் அவர் விவரித்தார்.
இனி வரும் காலங்களில் அனைவரும் ஒருங்கிணைந்து செயல்பட வேண்டியதன் அவசியத்தை வலியுறுத்திய அவர், கம்யூனிசப் பொதுவுடைமை தத்துவம் மேலும் பலப்படக்கூடிய விதத்திலேயே தான் தமிழக வெற்றிக் கழகத்தில் இணைந்து செயல்படுவது என்ற தீர்க்கமான உறுதிப்பாட்டை எடுத்திருப்பதாக மகிழ்ச்சியுடன் தெரிவித்துள்ளார்
